ខេត្តកំពង់ស្ពឺ ៖ ជនសង្ស័យម្នាក់ត្រូវបានសន្តិសុខយាមនៅក្នុងរោងចក្រកាត់ដេរធ្វើការឃាត់ខ្លួនប្រគល់ឱ្យសមត្ថកិច្ចននគរបាល បន្ទាប់ពីធ្វើសកម្មភាពលួចដោះគ្រឿងបន្លាស់ម៉ូតូរបស់កម្មករធ្វើការរោងចក្របាន ហើយជិះម៉ូតូចេញមកវិញសន្តិសុខឆែកឃើញក៏ឃាត់តែម្តង ។
ករណីឃាត់ខ្លួនជនសង្ស័យប៉ុនប៉ងលួចគ្រឿងបន្លាស់ម៉ូតូ កាលពីវេលាម៉ោង០១និង៣០នាទីរសៀល ថ្ងៃទី២០ ខែកញ្ញា ឆ្នាំ២០២៥ នៅចំណុចក្នុងរោងចក្រ កាត់ដេរយីហោដេណា ស្ថិតនៅក្នុងភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ ។
មន្ត្រីនគរបាលស្រុកគងពិសីបានឱ្យដឹងថា ជនសង្ស័យដែលសន្តិសុខឃាត់ខ្លួនប្រគល់ជូនសមត្ថកិច្ចនោះ មាន ឈ្មោះ ប៉ុស បញ្ញា ភេទប្រុស អាយុ២៥ឆ្នាំ មុខរបរមិនពិតប្រាកដ រស់នៅភូមិព្រៃកំបោ ស្នំក្រពើ ស្រុកគងពិសី ខេត្តកំពង់ស្ពឺ ។
ប្រភពខាងលើបន្តថា នៅមុនពេលកើតហេតុ កម្មករ,កម្មការិនីរោងចក្រ ចូលទៅបំពេញការងារដូចសព្វមួយដង ហើយពេលនោះជនសង្ស័យខាងលើក៏បន្លំខ្លួនជិះម៉ូតូចូលទៅក្នុងរោងចក្រកាត់ដេរ យីហោ ដេណា ប៉ុនប៉ងលួចម៉ូតូ និងលួចដោះយកគ្រឿងបន្លាស់(ផ្លាក.កម៉ូតូ ) នៅចំណុចកន្លែងផ្ញើម៉ូតូ ដោយមុខសញ្ញាជនសង្ស័យខាងលើបានធ្វើសកម្មភាព ដោះយកផ្លាក.ក ម៉ូតូចំនួន០២គ្រឿង ។
ទី១-ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២៣ ពាក់ផ្លាកលេខភ្នំពេញ 1kJ-2569 ម្ចាស់មានឈ្មោះ ជាវ វ៉ាន់ឆៃ ភេទប្រុស អាយុ២៦ឆ្នាំ រស់នៅក្នុងភូមិតារាជ ឃុំកក់ ស្រុកបសេដ្ឋ ខេត្តកំពង់ស្ពឺ និងទី២- ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២៤ ពាក់ផ្លាកលេខភ្នំពេញ 1KQ-6114 ម្ចាស់ឈ្មោះ អ៊ុក វី ភេទស្រី អាយុ៣៨ឆ្នាំ រស់នៅក្នុងភូមិត្រពាំងក្រឡាញ់ ឃុំលំពង់ ស្រុកបាទី ខេត្តតាកែវ។ ពេលធ្វើសកម្មភាពរួចជន សង្ស័យបានជិះម៉ូតូខ្លួនម៉ាកហុងដាសេ១២៥ ពណ៌ខ្មៅស៊េរីឆ្នាំ២០១៨ គ្មានផ្លាកលេខចេញពីរោងចក្រ គោលបំណងគេចខ្លួន ក៏ត្រូវបានសន្តិសុខដែលយាមនៅមុខរោងចក្រខាងលើ ឃាត់ឆែកឃើញគ្រឿងបន្លាស់ (ផ្លាក.ក ម៉ូតូ និងសម្ភារៈដោះមួយចំនួន) ហើយបានប្រគល់ឱ្យមកសមត្ថកិច្ចនគរបាលស្រុកគងពិសីតែម្តង ។
នគរបាលស្រុកគងពិសី បានបញ្ជាក់ថា បច្ចុប្បន្នជន សង្ស័យខាងលើ រួមជាមួយ និងវត្ថុតាងមធ្យោបាយ និងសម្ភារៈ ត្រូវបានឃាត់ខ្លួនមកអធិការដ្ឋាននគរបាលស្រុក សួរនាំ និងកសាងសំណុំរឿងដើម្បីចាត់ការបន្តតាមផ្លូវច្បាប់ ៕
