ភ្នំពេញ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងនៅព្រឹកថ្ងៃចន្ទទី២៩ ខែកញ្ញា ឆ្នាំ២០២៥នេះថា៖ ជោគជ័យ នៃការរៀបចំកម្មវិធីពិព័រណ៍ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួម ជំរុញ គាំទ្រផលិតផលក្នុងស្រុក» ពិតណាស់មិនអាចកាត់ផ្តាច់បានឡើយពីកិច្ចខិតខំប្រឹងប្រែងរបស់ថ្នាក់ដឹកនាំគណៈអចិន្រ្តៃយ៍ គណៈកម្មការធិការ ក្រុមការងាររៀបចំ និងយុវជនស្ម័គ្រចិត្ត ដែលបានចូលរួមផ្តល់មតិយោបល់ គូសវាស និងអនុវត្តការងារទៅតាមគម្រោង។
លោក ហ៊ុន ម៉ានី ក៏សូមថ្លែងអំណរដល់ លោក លោកស្រី អនុប្រធាន សមាជិក សមាជិកា គណៈអចិន្ត្រៃយ៍ ស.ស.យ.ក. គណៈកម្មាធិការកណ្តាល ថ្នាក់ដឹកនាំ ស.ស.យ.ក. គ្រប់រចនាសម្ព័ន្ធដែលបានគាំទ្រ និងចូលរួមរៀបចំ សម្របសម្រួលការងារផ្សេងៗ។
ជាពិសេស លោកប្រធាន ស.ស.យ.ក សូមអរគុណ និងកោតសរសើរចំពោះ ក្រុមការងាររៀបចំ ប្អូនៗជាយុវជនស្ម័គ្រចិត្ត ដែលបានអនុវត្តភារកិច្ចរបស់ខ្លួន តាំងពីការរៀបចំការងារដំបូង រហូតដល់ថ្ងៃកម្មវិធីរយៈពេល ៣ថ្ងៃ ដែលបានបញ្ចប់ទៅដោយជោគជ័យ បន្សល់ទុកនូវស្នាមញញឹម មោទនភាព និងអនុស្សាវរីយ៍ល្អៗដល់បងប្អូនជនរួមជាតិដែលបានមកទស្សនាការតាំងពិព័រណ៍ និងកម្មវិធីអមនានា។
ជាមួយគ្នានេះ លោក ហ៊ុន ម៉ានី បានគូសបញ្ជាក់ថា ឆន្ទៈ ស្មារតី និងទឹកចិត្តរបស់សមាជិក សមាជិកាម្នាក់ៗ នៃក្រុមគ្រួសារ ស.ស.យ.ក គឺជាកម្លាំងជំរុញទឹកចិត្តឱ្យ ពួកយើងបន្តរៀបចំព្រឹត្តិការណ៍ និងយុទ្ធនាការផ្សេងៗទៀត ដើម្បីចូលរួមជាមួយរាជរដ្ឋាភិបាល និងរួមចំណែកដល់ការបណ្តុះស្មារតីរួបរួមជាធ្លុងមួយ របស់ប្រជាជាតិកម្ពុជា៕
ដោយ៖តារា
