សៀមរាប៖ មន្ដ្រីនគរបាលជំនាញ នៃស្នងការនគរបាលខេត្ដសៀមរាប បានបញ្ជូនជនជាតិវៀតណាម ចំនួន១៧នាក់ ទៅកាន់ក្រសួងមហាផ្ទៃ បន្ទាប់ពីរកឃើញថា ពួកគាត់ស្នាក់នៅកម្ពុជាគ្មានច្បាប់ត្រឹមត្រូវ កាលពីថ្ងៃទី៧ខែសីហានេះ ។
មន្ដ្រីនគរបាលបានអោយដឹងនៅថ្ងៃទី០៨ខែសីហានេះថា ជនជាតិវៀតណាមចំនួន១៧នាក់ត្រូវបានបញ្ជូនទៅអគ្គនាយដ្ឋានជនអន្ដោប្រវេសន៍នៃក្រសូងមហាផ្ទៃ បន្ទាប់ពីរកឃើញមកស្នាក់នៅប្រទេសកម្ពុជាខុសច្បាប់កាលពីល្ងាចថ្ងៃទី០៧ខែសីហាម្សិលមិញ។ លោកបន្ដថា ក្រុមជនជាតិវៀតណាមទាំងនេះពួកគេសា្នក់នៅគ្មានច្បាប់ ក្នុងសង្កាត់ស្រង៉ែ និងសង្កាត់ស្វាយដង្គំក្រុងសៀមរាប ។
លោកបញ្ជាក់បន្ថែមថា មន្ដ្រីជំនាញនឹងធ្វើការពិនិត្យ ស្រាវជ្រាវ លើជនជាតិវៀត ដែលមកស្នាក់នៅក្នុងខេត្ដសៀមរាបជាបន្ដបន្ទាប់។ កាលពីខែឧសភាកន្លងទៅ ជនជាតិវៀតណាមចំនួន១៦នាក់ ត្រូវបានសមត្ថកិច្ចចាប់ខ្លួនបញ្ជូនទៅក្រសួងមហាផ្ទៃ បន្ទាប់ពីរកឃើញស្នាក់នៅខុសច្បាប់ដូចគ្នានេះដែរ ។
សូមរំលឹក ចាប់ពីឆ្នាំ២០១៤ ដល់ពាក់កណ្ដាលឆ្នាំ២០១៥នេះ ជនអន្ដោប្រវេសន៍ខុសច្បាប់ចំនួន៩៦នាក់ ក្នុងនោះស្រី២៨នាក់ ប៉ុន្ដែចំនួន៥៤ ត្រូវបានសមត្ថកិច្ចជំនាញបញ្ជូនទៅកាន់អគ្គនាយកដ្ឋានជនអន្ដោប្រវេសន៍នៃ ក្រសួងមហាផ្ទៃ ដើម្បីចាត់វិធានការទៅតាមផ្លូវកម្ពុជា ចំណែក ១៥នាក់ផ្សេងទៀត ត្រូវបានតុលាការខេត្ដ ចោទប្រកាន់ដាក់ពន្ធនាគារ នូវបទល្មើសផ្សេង ។
ប្រភពបន្ដថា ជនអន្តោប្រវេសន៍ខុសច្បាប់វៀតណាមទាំងនេះ ភាគច្រើនរកឃើញនៅ ការដ្ឋានសំណង់ ហាងលក់កាហ្វេ កាត់សក់ និង ម៉ាស្សាជាដើម ៕
ដោយ៖ សាវី បូ
