ចំពោះពលរដ្ឋកូរ៉េខាងជើង ត្រូវតែគោរពមេដឹកនាំរបស់ខ្លួនដូចជាព្រះ បើអ្នកណាម្នាក់ហ៊ានប៉ះពាល់នឹងត្រូវទួលទោសពីការមិនគោរពដល់មេដឹកនាំរបស់ខ្លួន ។ក្រៅពីពលរដ្ឋកូរ៉េខាងជើងក៏ដូចគ្នាដែរ ពេលនៅទឹកដីកូរ៉េខាងជើងមិនត្រូវប៉ះពាល់នោះឡើយ។
ទាំងនោះហើយបានជាអ្នកសារព័ត៌ មានអង់គ្លេសបានប្រកាសឲ្យដឹងថា មានអ្នកកាសែត BBC ម្នាក់ឈ្មោះ Rupert Wingfield-Hayes ត្រូវបានរដ្ឋអំណាចកូរ៉េខាងជើងបណ្តេញចេញពីទឹកដីកូរ៉េខាងជើង។ លោក Rupert និងអ្នករួមការងារចំនួន ២នាក់ផ្សេងទៀតត្រូវបានក្រុងព្យុងយ៉ាងអនុញ្ញាតិឲ្យចូលទៅយកព័ត៌មានស្តីពីសមាជគណបក្សពលករកូរ៉េខាងជើងដែលកំពុងបន្តរៀបចំក្នុងទីក្រុងព្យុងយ៉ាង។ តែកូរ៉េខាងជើងបានចោទលោក Rupert ពីបទប្រឌិតព័ត៌មានខុសពីការពិត។
គ្មានអ្វីគួរឲ្យភ្ញាក់ផ្អើលទេដែលប្រទេសកុម្មុយនិស្តដូចកូរ៉េខាងជើងបានបណ្តេញរូបអ្នកកាសែតបរទេសណាដែលហ៊ានសរសេរព័ត៌មានរិះគន់ខ្លួន ឬមួយក៏ហ៊ានសរសេររឿងពិត។ គេនៅមិនទាន់ដឹងថា តើរូបអ្នកកាសែត BBC លោក Rupert Wingfield-Hayes ដែលរដ្ឋអំណាចកូរ៉េខាងជើងទើបបណ្តេញចេញបានសរសេរព័ត៌មានអ្វីខ្លះទេទាក់ទងនឹងកូរ៉េខាងជើង តែក្រុងព្យុងយ៉ាងបានផ្តល់ហេតុផលថា បទយកការណ៍របស់លោក Rupert មិនបានឆ្លុះបញ្ចាំងការពិត និងគ្មានការគោរពចំពោះរបបកុម្មុយនិស្តព្យុងយ៉ាង។ មុននឹងសម្រេចបណ្តេញចេញពីទឹកដីកូរ៉េខាងជើង លោក Rupert ត្រូវបានភ្នាក់ងារសន្តិសុខកូរ៉េខាងជើងហៅទៅសួរចម្លើយអស់រយៈពេល ៨ម៉ោងជុំវិញបទយកការណ៍មួយដែលលោក Rupert បានធ្វើនៅក្នុងមន្ទីរពេទ្យមួយជាមួយក្រុមការងាររបស់លោកចំនួន ២នាក់ផ្សេងទៀត។ អ្នកកាសែត BBC ម្នាក់ទៀតដែលបានទៅយកព័ត៌មានស្តីពីសមាជគណបក្សពលករកូរ៉េខាងជើងបានប្រាប់ឲ្យដឹងថា នៅពេលដំបូង BBC ចង់លាក់ព័ត៌មានចាប់ខ្លួន និងបណ្តេញលោក Rupert ក្នុងគោលដៅរក្សាសន្តិសុខរូបលោក Rupert និងអ្នករួមការងារចំនួន ២នាក់ផ្សេងទៀត។ តែព័ត៌មាននេះត្រូវបានទម្លាយដោយគណៈកម្មការជាតិដើម្បីសន្តិភាពកូរ៉េខាងជើង។
គណៈកម្មការជាតិដើម្បីសន្តិភាពកូរ៉េខាងជើងបានរៀបចំសន្និសីទកាសែតមួយដើម្បីពន្យល់ពីហេតុផលនៃការឃាត់ខ្លួន និងបណ្តេញលោក Rupert ចេញពីទឹកដីកូរ៉េខាងជើង។ សូមជម្រាបជូនថា នៅក្នុងឱកាសសមាជគណបក្សពលករជាប្រវត្តិសាស្រ្ត ក្រុងព្យុងយ៉ាងបានអនុញ្ញាតិឲ្យអ្នកកាសែតបរទេសប្រមាណ ១៣០នាក់ចូលទៅយកព័ត៌មាន។ តែអ្នកកាសែតបរទេសទាំងអស់បានយកព័ត៌មានស្តីពីសមាជតែតាមកញ្ចក់ទូរទស្សន៍ប៉ុណ្ណោះ ពោលមិនត្រូវបានអនុញ្ញាតិឲ្យចូលដល់ទីធ្លា ឬក្នុងវិមានរៀបចំសមាជផ្ទាល់ទេ៕
ដោយមែវ សាធី
