ភ្នំពេញ ៖ នៅក្នុងកិច្ចប្រជុំរដ្ឋបាលរាជធានីភ្នំពេញកាលពីរសៀលថ្ងៃទី១១ ខែឧសភាឆ្នាំ ២០១៦ អង្គប្រជុំបានពិភាក្សាលើគម្រោងកែលម្អទីផ្សារមួយចំនួនក្នុងរាជធានីភ្នំពេញ ជាពិសេសផ្សារ កណ្តាល និង ជម្ពូវ័ន ។
ក្នុងកិច្ចប្រជុំនាពេលនោះ លោកប៉ា សុជាតិវង្ស អភិបាលនៃគណៈភិបាលរាជធានីភ្នំពេញ មានប្រសាសន៍ថា ផ្សារទាំងអស់ក្នុងរាជធានីភ្នំពេញ ត្រូវតែបានគិតគូរពីសណ្តាប់ធ្នាប់ បរិស្ថាន អនាម័យ និងផាសុកភាពទាំងក្នុង និងក្រៅទីផ្សារ ។ ក្នុងរាជធានីភ្នំពេញបច្ចុប្បន្ន មានផ្សាររបស់រដ្ឋមានចំនួន២៥ផ្សារ ដែលចាំបាច់ត្រូវតែធ្វើការកែលម្អឲ្យមានសណ្តាប់ធ្នាប់ និងរបៀបរៀបរយល្អប្រសើរ ខណៈ ទីផ្សារមួយចំនួនមានរូបភាពរញ៉េរញ៉ៃបាត់សណ្តាប់ធ្នាប់ បង្កឲ្យប៉ះពាល់ដល់សន្តិសុខ និងបរិស្ថាន ក៏ដូចជា សុខភាពប្រជាពលរដ្ឋទាំងអ្នកលក់ និងអ្នកទិញ ព្រមទាំងសោភណភាពផងដែរ ។
លោកអភិបាលនៃគណៈភិបាលរាជធានី ក៏បានជំរុញឲ្យមន្ត្រីជំនាញ អាជ្ញាធរដែនដីពាក់ព័ន្ធត្រូវសិក្សាឲ្យបានច្រើនជម្រើសសម្រាប់ការ ពិចារណាលើប្លង់ស្ថាប្យកម្ម, ទំហំតូប, ចរន្តខ្យល់, អនាម័យ និងបរិស្ថានក្នុងផ្សារជាដើម។
ទោះយ៉ាងណាមន្ត្រីសាលារាជធានីភ្នំពេញបានឱ្យដឹងថា ផ្សារដែលគ្រប់គ្រងដោយរដ្ឋទាំង២៥ក្នុងរាជធានីភ្នំពេញ ចាំបាច់ត្រូវតែធ្វើការកែលម្អនិងពិចារណា គឺផ្សារកណ្តាល និងផ្សារជម្ពូវ័នបន្ទាប់ពីគេដឹងថា ផ្សារកណ្តាលមានតូបផ្លូវការ៨៧៤តូប, ផ្សារជម្ពូវ័ន មានតូប២០៤តូបដែរនោះ ៕
ប្រាថ្នា
