ភ្នំពេញ ៖ ដោយទ្រាំនឹងប្តីកំណាចវាយធ្វើបាបនិងមានស្រីថ្មី ធ្វើឲ្យស្ត្រីម្នាក់ដែលមានស្នាមជាំរបួសពេញខ្លួន បានបីកូនស្រីអាយុ៨ខែទៅប្តឹងនគរបាលប៉ុស្តិ៍ប្ញស្សីកែវដើម្បីសុំលែងលះគ្នាទាំងព្រឹក ។
ហេតុការណ៍នេះកើតឡើងកាលពីព្រឹកថ្ងៃទី១២ ឧសភា ២០១៦ នៅប៉ុស្តិ៍នគរបាលរដ្ឋបាលឫស្សីកែវ ខណ្ឌឫស្សីកែវ ។
មន្រី្តនគរបាលប៉ុស្តិ៍ឫស្សីកែវបានឲ្យដឹងថា ស្ត្រីរងគ្រោះឈ្មោះចាន់ ណារ៉ា អាយុ៣២ឆ្នាំ មានប្តីឈ្មោះងួន សុខ អាយុ៣៥ឆ្នាំ អតីតប៉ូលិសនៅក្រុងតាខ្មៅ មានទីលំនៅផ្ទះគ្មានលេខក្រុម២ ភូមិមិត្តភាព សង្កាត់ប្ញស្សីកែវ ខណ្ឌប្ញស្សី
។
ស្រី្តរងគ្រោះបានរៀបរាប់ប្រាប់សមត្ថកិច្ចទាំងទឹកភ្នែកថា នាងនិងប្តីរៀបការហើយរួមរស់នៅជាមួយគ្នាបានរយៈ២ឆ្នាំមកហើយ ដោយបានកូនស្រីអាយុ៨ខែម្នាក់ ។ ការរស់នៅជាមួយគ្នា មុនដំបូងល្អូកល្អិនណាស់ តែពេលបានកូនមួយ លោកប្តីមិនគិតពីរកសីុចិញ្ចឹមប្រពន្ធកូននោះទេ គិតតែពីដើរលេងផឹកសីុចាយ មិនដែលមានសេចក្តីសុខ ជាពិសេសមានស្រីថ្មីនិងប្រើហិង្សា មកលើរូបគាត់គ្មានលស់ថ្ងៃទេ ។
នៅវេលាម៉ោងប្រមាណ ៦ និង៣០នាទីព្រឹកថ្ងៃទី១២ ឧសភាឆ្នាំ២០១៦ គាត់មានបំណង់ចង់ឱ្យប្តីធ្វើការ និងរៀបចំឯកសារឱ្យប្តីទៅដាក់ពាក្យតែប្តីមិនព្រមទៅតែបែរជាបង្កទំនាស់ហើយប្តីបានចាប់វាយមកលើគាត់និងដោយទ្រាំការប្រើហិង្សានេះមិនបាន គាត់បានធ្វើដំណើរមកប្តឹងនគរបាលសុំលែងលះតែម្តងទៅ កុំឲ្យជាប់កម្មនឹងប្តីអប្រិយបែបនេះតទៅទៀត ៕
ដោយៈ ប្រាថ្នា
