ព្រះសីហនុ៖ នាយឧត្តមសេនីយ៍ ប៉ុល សារឿន សមាជិកគណៈអចិន្ត្រៃយ៍ និងជាគណៈកម្មាធិការកណ្តាល ប្រធានក្រុមការងារ ចុះជួយខេត្តព្រះសីហនុ បានជូបសំណេះសំណាល និងសាកសួរសុខទុក្ខ សមាជិកគណបក្សប្រជាជនកម្ពុជា និងបងប្អូន ប្រជាពលរដ្ឋខ្មែរឥស្លាមក្រីក្រ ប្រមាណ៤៩១នាក់ មកពី ៤សង្កាត់ ក្នុងខេត្តព្រះសីហនុ ។ ពិធីសំណេះសំណាលនេះ ក៏មានវត្តមានរបស់លោក អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី លោក ហ្សាការីយ៉ា អាដាម រដ្ឋមន្រ្តីមន្រ្តីប្រតិភូអមនាយករដ្ឋមន្រ្តី និងលោក អភិបាលខេត្ត ព្រះសីហនុ កាលពីថ្ងៃទី ០៩ ខែសីហា ឆ្នំា២០១៥ ។
លោក អូស្មាន ហាស្សាន់ បានបញ្ជាក់ថា៖ ការផ្តល់ជូននូវ សិទ្ធិសេរីភាព និងអ្វីៗ គ្រប់បែបយ៉ាងពីសំណាក់រាជរដ្ឋាភិបាល ចំពោះបងប្អូនសាសនិកខ្មែរឥស្លាម ក៏ដូចជាប្រជាពលរដ្ឋទូទៅ គឺជាគោលនយោបាយដ៏ត្រឹមត្រូវ និង យុត្តិធម៌ក្រោមការដឹក នាំដ៏ឈ្លាសវៃរបស់ប្រមុខថ្នាក់ដឹកនាំ ដែលមានសម្តេចតេជោ ជានាយករដ្ឋមន្រ្តី។
លោកបន្តថា៖ ថ្មីៗនេះរាជរដ្ឋាភិបាលសម្រេចបញ្ចូលក្របខណ្ឌ និង ផ្តល់ប្រាក់បៀវត្ស ដល់គ្រូខ្មែរឥស្លាម គឺជាការដោះបន្ទុកប្រជាពលរដ្ឋ ក៏ដូចជាការលើកកំពស់វិស័យអប់រំផងដែរ ពីព្រោះថា កន្លងមកប្រាក់ឧបត្ថម្ភរបស់ពួកគាត់ គឺបានមកពីការរៃអង្គាស ពីបងប្អូន ដែលអាចផ្តល់ផលពិបាកខ្លះដល់បងប្អូន។ ដូច្នេះហើយគ្រូៗ ដែលមានជីវភាពខ្វះខាត ពីដើមមក រវល់តែនឹងការស្វែងរកការងារក្រៅដើម្បីបំពេញតម្រូវការចំណាយប្រចាំថ្ងៃ ធ្វើឲ្យ រអាក់រអួលដល់កិច្ចការងារបង្រៀន របស់គាត់ និងបង្កការប៉ះពាល់ទៅកាន់គុណភាពអប់រំធម៌សាសនាដល់ស្រទាប់កុមារ និង យុវជនខ្មែរឥស្លាម គឺពីពេលនេះទៅលែងជាបញ្ហាចោទអ្វីទៀតឡើយ។
លើសពីនេះទៅទៀត ដើម្បីថ្លែងអំណរគុណដល់គ្រូៗ ចំណាស់មានអាយុលើសពី ៦០ឆ្នាំ ដែលបានតស៊ូបង្រៀន ដោយស្ម័គ្រចិត្ត គ្មានប្រាក់បៀវត្សរ៍ រាប់សិបឆ្នាំមកហើយនោះ រាជរដ្ឋាភិបាលបានសម្រេចបញ្ចូល ពួកគាត់ ទៅក្នុងគ្រូជាប់កិច្ចសន្យាផងដែរ ។
ក្នុងឱកាសនោះលោក ក៏បានអំពាវនាវ ឲ្យមាតាបិតា សូមបញ្ជូនកូនចៅឲ្យចូលរៀន ទាំងផ្នែកទូទៅ និងផ្នែកសាសនា ឲ្យបានគ្រប់ៗគ្នា ដើម្បីឲ្យកូនចៅរបស់ខ្លួនមានចំណេះដឹង មានសីលធម៌ មានអនាគតល្អ ដើម្បី ការអភិវឌ្ឍន៍ ខ្លួនឯង គ្រួសារ ក៏ដូចជាការលើកកម្ពស់វិស័យអប់រំ និង គោលនយោបាយភូមិ ឃុំមានសុវត្ថិភាព ។ សូមបងប្អូន បន្តការគាំទ្ររាជរដ្ឋាភិបាល ដែលកំពុងតែផ្តល់នូវសុខសន្តិភាព សេរីភាព និងគ្មានការរើសអើង ចំពោះបងប្អូន ជារដ្ឋាភិបាលដែលកំពុងធ្វើ មិនមែនបានត្រឹមតែសន្យានោះឡើយ ។
លោក ប៉ុល សារឿន បានបញ្ជាក់ថា៖ ការពិតលោករស់នៅក្បែរៗបងប្អូន សាសនិកឥស្លាមអស់ជាងពាក់កណ្តាលជីវិតមកហើយ ឃើញថា បងប្អូនយើងមានអត្តចារឹកល្អ សុភាពរាបសារ មានប្រាស្រ័យទាក់ទងគ្នាល្អ ការរស់នៅចុះសម្រុងគ្នា ហើយពុំដែលមានបញ្ហាអ្វីឡើយ។ ក្នុងប្រវត្តិសាស្រ្តបានបង្ហាញថា បងប្អូនខ្មែរ និងបងប្អូនឥស្លាម បានមានការប្រាស្រ័យទាក់ទងគ្នាល្អ តំាងពីសម័យសង្គមរាស្ដ្រនិយមមកម្លេះ ។ រហូតមកដល់សម័យកាលបច្ចុប្បន្ននេះ យើងរឹតតែមានទំនាក់ទំនងល្អជាមួយគ្នា យ៉ាងស្អិតរមួតថែមទៀត។ ដូច្នេះ យើងត្រូវ បន្តវប្បធម៌ស្អិតរមួតនេះ ឲ្យបានយូរអង្វែងរហូតតទៅ ។
ក្នុងឱកាសនោះ លោកក៍បានស្យា កៀងគររកម្ចាស់ជំនួយ សប្បុរសជននានា ជួយរកថវិកាមក កសាងព្រះ វិហារឥស្លាម១ខ្នង ស្ថិតក្រុងព្រះសីហនុ ដែលមានសភាពចាស់ទ្រុឌទ្រោម នៅចំពោះមុខ វិហារនេះ ត្រូវបានកសាងឡើងតាំងពីឆ្នាំ១៩៦៣ មកម្លេះ ហើយវិហារនេះត្រូវបានឆ្លងកាត់សម័យសង្គ្រាម ត្រូវបានពួកខ្មែរក្រហម យកវិហារនេះ ធ្វើជាទីតាំងស្តុកស្បៀង ជាមន្ទីរពេទ្យ ជាកន្លែងចិញ្ចឹមសត្វជ្រូក មាន់ និងទា ។
ក្រោយ របបប្រល័យពូជសាស្រ្ដប៉ុលពត ត្រុវបានប្រជាពលរដ្ឋខ្មែរឥស្លាម ជួសជុល បោសសម្អាត ឡើងវិញ សម្រាប់គោរពតាមជំនឿសាសនារបស់ខ្លួន ទំាងសភាពចាស់ទ្រុឌទ្រោម រហូតដល់បច្ចុប្បន្ននេះ ។ ជាមួយគ្នានេះ លោក និងថ្នាក់ដឹកនាំ ក៍បានសន្យា នឹងខិតខំ ស្វះស្វែងរកជំនួយពីសប្បុរសជននានា ដើម្បីយកមកធ្វើការជួយជុលកសាងវិហារជាថ្មី ជូនបងប្អូន ដែលក្នុងនោះ ក៏ត្រូវសង់ឲ្យមានបណ្ណាល័យ សម្រាប់ការស្រាវជ្រាវចំនេះដឹង ផងដែរ ។
ក្នុងឱកាសនេះលោកក៏បាន នំាយកអំណោយ របស់សម្ដេចតេជោមកចែកជូន បងប្អូនសាសនិក ឥស្លាមដែល បានចូលរួម ទាំងអស់ចំនួន ៤៩១នាក់ ក្នុងម្នាក់ៗទទួលបាន សារុង០១ អាវយឺត០១ និងថវិការ ៥ម៉ឺនរៀល ៕
ដោយ៖ សំរិត
