ភ្នំពេញ៖ អាជ្ញាធររាជធានីភ្នំពេញ បាសម្រេចធ្វើការកែលម្អកំណាត់ផ្លូវលេខ២៧១ ដោយចាក់កៅស៊ូបេទីមីណឺ ប្រវែង ៧៧០០ម៉ែត្រទទឹង១៨ម៉ែត្រ ដោយសារផ្លូវ១ ខ្សែនេះ រងការខួចខាតពិបាក ក្នុងការធ្វើចរាចរណ៍ របស់ប្រជាពលរដ្ឋនោះ និងក៏ដូចជាការទប់ស្កាត់ នូវការខូចរិចរិលធ្ងន់ធ្ងរផង និងក៍ដើម្បីជួយរំដោះ ចរាចរណ៍ ដែលតែងតែកកស្ទះ ជារៀងរាល់ថ្ងៃផង នៅព្រឹកថ្ងៃទី ១៩ ខែសីហា ឆ្នំា២០១៥ អាជ្ញាធររាជធានីភ្នំពេញ សម្រេចបើការដ្ឋានស្ថាបនាជួសជុល ចាប់ពីមហាវិថីសហព័ន្ធរុស្សី ដល់ស្ពានអាកាសក្បាលថ្នល់ ឡើងវិញចំណាយថវិកា អស់ប្រមាណជិក១ លានដុល្លារអាមេរិក ជាថវិការបស់សាលារាជធានីភ្នំ ពេញ ។
លោក សំា ពិសិដ្ឋ ប្រធានមន្ទីរ សាធារណៈការ និងដឹកជញ្ជូនរាជធានីភ្នំពេញ បានអោយដឹងថា៖ ផ្លូវលេខ២៧១នេះបានប្រើប្រាស់អស់រយះពេល១៦ឆ្នាំរួចមកហើយចាប់តាំងពីឆ្នាំ១៩៩៩មកម្លេះ ស្របពេលដែលមានការអភិវឌ្ឍ សំណង់អគារធំៗ និងសំណង់លំនៅដ្ឋានតម្រូវតាម កំណើនប្រជាជននិងការរីកទំហំទីក្រុងនោះ ផ្លូវនេះមានភាពសឹករេចរិល ស្រុត ប្រេះបែក ខូចគ្រឹះ មានជង្ហុក់និងដក់ទឹកដោយកន្លែង ទើបនាពេលនេះដើម្បីទប់ស្កាត់មិនអោយកំណាត់ផ្លូវនេះខូចកាន់តែធ្ងន់ធ្ងរនោះ។
សាលារាជធានីភ្នំពេញបានចាប់ផ្តើមបើកការដ្ឋានស្ថាបនាកែលម្អជាប្រភេទAC (អាសេ) ប្រវែង៧ពាន់៧រយម៉ែត្រ ទទឹង១៨ម៉ែត្រ ចាប់ពីមហាវិថីសហព័ន្ធរុស្សីដល់ស្ពាន អាកាសក្បាលថ្នល់ ដោយប្រើប្រាស់រយៈពេលនៃការស្ថាបនា៨៥ ថ្ងៃ ចំណាយថវិកាអស់ប្រមាណជិត១លានដុល្លារអាមេរិក ស្ថិតក្នុងខណ្ឌទួលគោក និងខណ្ឌចំការមន ។
លោក ប៉ា សុជាតិវង្ស អភិបាលរាជធានីភ្នំពេញ បានថ្លែងថា៖ កំណាត់ផ្លូវ១នេះពិតជាមានសារៈសំខាន់ដែល មានតួនាទីជាផ្លូវក្រវ៉ាត់ក្រុង តភ្ជាប់ចរាចរពីតំបន់ខាងជើងមកតំបន់ខាងត្បូង និងតំបន់ខាង កើតរាជធានីភ្នំពេញឆ្ពោះទៅក្រុងតាខ្មៅនិងផ្លូវជាតិលេខ១សម្រាប់ចរាចររថយន្តធន់ធ្ងន់ដែល មានសភាពយ៉ាងមមាញឹក ។
លោកបន្ដថា៖ បច្ចុប្បន្ននេះ អាជ្ញាធររាជធានីភ្នំពេញ បាននិងកំពុងធ្វើការពង្រីកស្ថាប នាផ្លូវ ស្ពាន ដើម្បីជួយរំដោះចរាចរណ៍ ដើម្បីស្របទៅនិងកំណើន ប្រជាពលរដ្ឋនៅរាជធានីភ្នំពេញ ជាក់ស្ដែង យើងកំពុងធ្វើការស្ថាបនា ស្ពានអាកាសតិចណូ ៧មករា ស្ពានអាកាសស្ទឹងមានជ័យ ក្បាល ថ្នល់ ផ្លូវនិងស្ពានទំាងនេះ ពិតជាបានដោះស្រាយបញ្ហាកកស្ទះចរាចរដ៏ល្អឥតខ្ចោះ ។
លោកបន្ដថា៖ សមិទ្ធិផលទាំងនេះ រួមនិងសមិទ្ធិផលជាច្រើនទៀតដែលកំពុងលេចរូបរាងឡើងនៅក្នុងរាជធានីភ្នំពេញ មានដូចជា អគារពាណិជ្ជកម្មទំនើបៗ ផ្លូវ ស្ពាន និងសំណង់លំនៅដ្ឋានរីកស្គុះស្គាយទាំងនោះ គឺមិនមែន កកើតឡើងដោយក្តីស្រមោលស្រម័យ ឬការសន្យាអោយតែរួចពីមាត់នោះទេ គឺវា ក៍កើតឡើងចេញពី កិច្ចខិតខំប្រឹងប្រែងរបស់រាជរដ្ឋាភិបាលយ៉ាងពិតប្រាកដ ៕
ដោយ៖ សំរិត
