រថភ្លើង Amtrak របស់អាមេរិក បានបើកធ្លាក់កង់ចេញពីផ្លូវដែក ហើយធ្លាក់មួយផ្នែកនៃទូរថភ្លើងចុះទៅលើផ្លូវល្បឿនលឿននៅខាងក្រោម ។ ហេតុការគ្រោះថ្នាក់ខាងលើកើតឡើងនៅថ្ងៃទី១៨ខែធ្នូ នៅជិត ទីក្រុង Dupont រដ្ឋវ៉ាស៊ីនតោន បណ្តាលឲ្យមនុស្ស ៦នាក់ស្លាប់ ។
សារព័ត៌មាន CNN បានផ្សាយថា ក្រៅពីអ្នកស្លាប់នៅមានអ្នករបួស ៧៧នាក់បានបញ្ជូនទៅកាន់មន្ទីពេទ្យព្យាបាល ។ ចំនួនអ្នកស្លាប់អាចនឹងកើនឡើង ជាបន្តទៀត ក្នុងពេលដែលអ្នករងរបួស មានមួយចំនួនរងរបួសធ្ងន់កំពុងសង្គ្រោះបន្ទាន់។
ក្រុមហ៊ុនAmtrak បានឲ្យដឹងថានៅពេលគ្រោះថ្នាក់កើតឡើងនៅលើរថភ្លើងមានអ្នកដំណើ៧៨នាក់ និងបុគ្គលិក៥នាក់នៅលើរថភ្លើង។
ហេតុការគ្រោះថ្នាក់កើតឡើងនៅវេលាម៉ោង ៧និង៤០នាទីព្រឹក(ម៉ោងក្នុងតំបន់) ។ទិដ្ឋភាពរថភ្លើងព្យួរ នៅលើស្ពានចុះមកផ្លូវល្បឿនលឿនបង្ករឲ្យមានការផ្ញាក់ផ្អើលយ៉ាងខ្លាំង ដល់ពលរដ្ឋដែលធ្វើដំណើរទៅធ្វើការនាពេលព្រឹក។ ផ្លូវធ្វើដំណើរ ឆ្ពោះទៅភាគខាងកើតត្រូវបានបិទមួយរយ ក្រោយគ្រោះថ្នាក់ខាងលើ។
រថភ្លើងដែលធ្លាក់ផ្លូវនោះបានប៉ះជាមួយ រថយន្តធ្វើដំណើរនៅផ្លូវល្បឿនលឿនខាងក្រោម ប៉ុន្តែមិនបណ្តាលឲ្យមានអ្នកស្លាប់នោះឡើយ។
សាក្សីនៅកន្លែងកើតហេតុលោក Greg Mukai និយាយទៅបណ្តាញព័ត៌មាន CNN ថា«ខ្ញុំកំពុងតែធ្វើដំណើរទៅធ្វើការ ពេលព្រឹក ក៏ត្រូវជាន់ហ្វ្រាំងជាបន្ទាន់ដើម្បីបញ្ចៀសការប៉ះទង្គិចគ្នា ។ ពេលនោះក៏មើលឃើញរថភ្លើង ព្យួរនៅលើស្ពាន ក្រុមជួយសង្គ្រោះនិងពលរដ្ឋ បានរតទៅជួយអ្នករងរបួស»។
អភិបាលរដ្ឋវ៉ាស៊ីនតោនលោក Jay Inslee បានប្រកាស អាសន្នក្រោយហេតុការខាងលើ។ គណកម្មការសន្តិសុខចរាចរណ៍អាមេរិក បានបញ្ចូនក្រុមស្រាវជ្រាវ ដើម្បីត្រួតពិនិត្យមូលហេតុ បណ្តាលឲ្យមានគ្រោះថ្នាក់ខាងលើកើតឡើង។
ប្រធានាធិបតីអាមេរិកដូណាលត្រាំ ក៏បានរំលែកទុក្ខដល់គ្រួរសារជនរង្គ្រោះ ក្នុងហេតុការខាងលើ ។ លោកបញ្ចាក់ទៀតថា ហេតុការគ្រោះថ្នាក់ខាងលើ គឺជាមូលហេតុជម្រុញឲ្យគម្រោង កែប្រែហេដ្ឋារចនាសម្ព័ន្ធត្រូវបានអនុម័ត៕
ដោយ៖ មែវ សាធី
