មណ្ឌលគិរី៖ ចោរស្រីរួបស្រស់ម្នាក់ ក្នុងចំណោមបក្សពួក៣នាក់ ជាចោរកាច់.កម៉ូតូយ៉ាងសកម្ម លួចបានម៉ូតូពីរគ្រឿង ត្រូវបានកម្លាំងអាវុធហត្ថខេត្តក្របួចបាន កាលពីវេលាម៉ោង ១០ព្រឹកថ្ងៃទី១ ខែវិច្ឆិកា ត្រង់ចំណុចភូមិពូទ្រូ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី។
មេបញ្ជាការកងរាជអាវុធហត្ថខេត្តមណ្ឌលគិរី លោក ឧត្តមសេនីយ៍ត្រី សាក់ សារ៉ាង បានឲ្យដឹងថា កម្លាំងអាវុធហត្ថខេត្តបានបើកប្រតិបត្តិការចុះស្រាវជ្រាវ បន្ទាប់ពីទទួលពាក្យបណ្ដឹងពីម្ចាស់ម៉ូតូចំនួនពីរគ្រឿង ដែលត្រូវក្រុមចោរ ធ្វើសកម្មភាពកាច់.ក និងកាត់ច្រវ៉ាក់ កាលពីយប់ថ្ងៃទី៣០ ខែតុលា កន្លងទៅ នៅភូមិចំការតែ និងភូមិមានលាភ ក្រុងសែមនោរម្យ ខេត្តមណ្ឌលគិរី ។
លោកបន្តថាកម្លាំងអាវុធហត្ថបានធ្វើការ ត្រួតពិនិត្យនៅតាមគោលដៅសំខាន់ៗក្នុងខេត្ត និងមានការចូលរួមពីកម្លាំងប៉ូលិសចរាចរណ៍ នៃស្នងការខេត្តទើបឈានដល់ឃាត់បានបក្សពួកចោរបានម្នាក់ ព្រមទាំងម៉ូតូពីរគ្រឿង ចំណែកជនសង្ស័យពីរនាក់ទៀតរត់គេចខ្លួនចូលព្រៃបាត់ស្រមោល ។
ជនសង្ស័យដែលសមត្ថកិច្ចឃាត់ខ្លួនបានឈ្មោះ យៀង សេងថៃ ភេទស្រី អាយុ២៩ឆ្នាំ មានទីលំនៅភូមិ មេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី។ ចំណែកជនសង្ស័យពីរនាក់ទៀត ដែលរត់រួចសមត្ថកិច្ចកំពុងស្រាវជ្រាវចាប់ខ្លួន ។
សូមរំលឹកថា កាលពីយប់ថ្ងៃទី៣០ ខែតុលា ក្នុងក្រុងសែនមនោរម្យ មានករណីកាច់.កម៉ូតូ ចំនួន២ករណី ដែលកើតនៅទីតាំងខុសគ្នា គឺករណីទី១ កើតនៅភូមិចំការតែ ស្ពានមានជ័យ ក្រុងសែនមនោរម្យ ត្រូវបានក្រុមចោរធ្វើសកម្មភាពកាត់ច្រវ៉ាក់យកម៉ូតូ សង់សេរី២០១៥ ដែលមានម្ចាស់ឈ្មោះ ឌឹម ប៊ុនធឿន ភេទប្រុស អាយុ៣៩ឆ្នាំ ឯករណីទី២កើតនៅភូមិមានលាភ សង្កាត់សុខដុម ក្រុងសែនមនោរម្យ ដែលជនរងគ្រោះជាម្ចាស់ ម៉ូតូមានឈ្មោះ សឿ គីមសាន ភេទស្រី អាយុ39ឆ្នាំ។
បច្ចុប្បន្នម៉ូតូទាំង២ត្រូវបានកម្លាំងអាវុធហត្ថ យកមករក្សាទុកធ្វើការស្រាវជ្រាវ មុនប្រគល់ឲ្យម្ចាស់ដើមវិញ៕
ដោយ៖ ឦសាន
