ភ្នំពេញ៖ បុរសជនជាតិវៀតណាមម្នាក់ក្នុងចំណោម ត្រូវបានសមត្ថកិច្ចនគរបាលខណ្ឌច្បារអំពៅឃាត់ខ្លួន បន្ទាប់ពីពួកគេបានធ្វើសកម្មភាពលួចយកន្ទុយរ៉ឺម៉កប្រជាពលរដ្ឋពីភូមិព្រែករុន ឃុំព្រែកគយ ស្រុកស្អាង ខេត្តកណ្ដាលមក ហើយមកស្នាក់នៅសង្កាត់ច្បារអំពៅ ខណ្ឌច្បារអំពៅ ក៏ត្រូវនគរបាលឃាត់ខ្លួនបាន កាលពីវេលាម៉ោង៣ និង៤០នាទីរសៀល ថ្ងៃទី១៣ ខែវិច្ឆិកា ឆ្នាំ២០១៥។
ជនជាតិវៀតណាមដែលត្រូវបានឃាត់ខ្លួនទាំង២នាក់ ១-ឈ្មោះ វ្វៀង យ៉ាំងឌឿង ភេទប្រុស អាយុ ៣១ឆ្នាំ ស្នាក់សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ (ឃាត់ខ្លួន) និង២-ឈ្មោះ តាំង ភេទប្រុស អាយុ ៤២ឆ្នាំ ជនជាតិវៀតណាម នៅរាជធានីភ្នំពេញ បានគេចខ្លួនបាត់។
ប្រភពពីនគរបាលបានឲ្យដឹងថា នៅមុនថ្ងៃកើតហេតុ ជនសង្ស័យទាំង២នាក់បានលួចរ៉ឺម៉ក នៅចំណុចភូមិព្រែករុន ឃុំព្រែកគយ សណ្តោងដោយម៉ូតូយកទៅផ្ទះរបស់ឈ្មោះ វ្វៀង យ៉ាំងឌឿង នៅសង្កាត់ច្បារអំពៅ។ លុះព្រឹកឡើងថ្ងៃទី១៣ ឈ្មោះ វ្វៀង យ៉ាំងឌឿង បានយកថ្នាំមកលាបលើរ៉ឺម៉ក ដើម្បីប្តូពណ៌ពីខៀវ ទៅជាពណ៌ពងមាន់ ពេលនោះសមត្ថកិច្ចខណ្ឌច្បារអំពៅឃើញសង្ស័យ ក៏បានឃាត់ខ្លួនឈ្មោះ វ្វៀង យ៉ាំងឌឿង សាកសួរ ចំណែកឈ្មោះ តាំង បានគេចខ្លួនបាត់។
ក្រោយពីត្រូវសមត្ថកិច្ចឃាត់ខ្លួន ឈ្មោះ វ្វៀង យ៉ាំងឌឿង បានសារភាពថាពួកខ្លួនបានលួចរ៉ឺម៉កនេះមកពីស្រុកស្អាង ។ នៅថ្ងៃដដែលវេលាម៉ោង១១និង១០នាទី សមត្ថកិច្ចនគរបាលខណ្ឌច្បារអំពៅ បានទំនាក់ទំនងមកអធិការដ្ឋាន នគរបាលស្រុកស្អាង ដើម្បីប្រគល់ជនសង្ស័យឈ្មោះ វ្វៀង យ៉ាំងឌឿង និងវត្ថុតាងមកអធិការដ្ឋានស្រុក ដើម្បីស្វែងរកម្ចាស់រ៉ឺមកក និងកសាងសំណុំរឿងបន្តចាត់ការតាមនីតិវិធី៕
ដោយ៖ វិបុល
