ខេត្តសៀមរាប៖ នៅទីបញ្ជាការដ្ឋានកងរាជអាវុធហត្ថខេត្តសៀមរាប នារសៀលទី១៦ ខែវិច្ឆិកា ឆ្នាំ២០១៥ លោកឧត្តមសេនីយ៍ទោ ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេសទទួលការងារព័ត៌មាន សន្តិសុខ និងស្រាវជ្រាវបង្ក្រាបបទល្មើស បានអញ្ជើញជាអធិបតីពិធីបិទអង្គប្រជុំបូកសរុបលទ្ធផលការងារឆ្នាំ២០១៥ និងទិសដៅឆ្នាំ២០១៦ របស់មន្ទីរយុត្តិធម៌បញ្ជាការដ្ឋានកងរាជអាវុធហត្ថខេត្តសៀមរាប លោកវរសេនីយ៍ឯក ប្រាក់ ចាន់ធឿន មេបញ្ជាការរងនិងជានាយសេនាធិការកងរាជអាវុធហត្ថខេត្តសៀមរាប បានឡើងអាចរបាយការណ៍ស្វាគមន៍ និងលើកឡើងអំពីសភាពការណ៍ និងលទ្ធផលការងារមួយចំនួនជុំវិញការងារសន្តិសុខ និងការងារយុត្តិធម៌ឆ្នាំ២០១៥ របស់កងរាជអាវុធហត្ថខេត្តសៀមរាប ក្នុងនោះបានលើកឡើងអំពីសភាពការណ៍បទល្មើស នៅក្នុងឆ្នាំ២០១៥នេះ បើប្រៀបធៀបទៅនឹងឆ្នាំ២០១៤កន្លងទៅ ក្នុងនោះបទឧក្រិដ្ឋថយចុះ កើនឡើងបទមជ្ឈិម និងបទល្មើសរក្សាទុក ដឹកជញ្ជូន ការជួញដូរដោយខុសច្បាប់នូវសារធាតុញៀនជាដើម ។
លោកប្រាក់ ចាន់ធឿនបានបន្តថា លទ្ធផលបង្ក្រាបបទល្មើស មន្ត្រីជំនាញការងារយុត្តិធម៌កងរាជអាវុធហត្ថបានខិតខំប្រឹងប្រែងអនុវត្តតាមតួនាទីភារកិច្ចទប់ស្កាត់ និងបង្ក្រាប បាននូវរាល់បទល្មើស ដែលកើតមានឡើងបានទាន់ពេលវេលា ក្នុងនោះជាលទ្ធផលរួមមាន បង្ក្រាបបទល្មើសព្រហ្មទណ្ឌ៣ករណី ស្មើនឹង៤២លើក ឃាត់ខ្លួនជនសង្ស័យ៧៤នាក់ ចាប់យកវត្ថុតាងមួយចំនួនធំ ។
លោកវរសេនីយ៍ឯកស្រី យ៉ូរ៉ា មេបញ្ជាការរង និងជាប្រធានមន្ទីរស្រាវជ្រាវយុត្តិធម៍ កងរាជអាវុធហត្ថខេត្តសៀមរាបបានថ្លែងឲ្យដឹងថា ដោយយោងតាមការណែនាំពីនាយឧត្តមសេនីយ៍អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ថ្នាក់ដឹកនាំ និងមន្ត្រីជំនាញការងារយុត្តិធម៌ កងរាជអាវុធហត្ថខេត្តសៀមរាបបានយកចិត្តទុកដាក់ ប្រឹងប្រែង អនុវត្តតាមតួនាទីភារកិច្ច បង្ក្រាបរាល់បទល្មើស លទ្ធផលនៃការបង្ក្រាបបទល្មើសគឺទទួលបានជោគជ័យ រួមទាំងការបង្ការបទល្មើសដែលអាចកើតមាននៅតាមមូលដ្ឋាននោះថែមទៀត ។
លោកឧត្តមសេនីយ៍ទោ ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស ទទួលការងារព័ត៌មានសន្តិសុខ និងស្រាវជ្រាវបង្ក្រាបបទល្មើសបានមានប្រសាសន៍ថា ដោយបានការអនុញ្ញាតដ៏ខ្ពង់ខ្ពស់ពីនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើប្រទេសបានអនុញ្ញាតឲ្យរូបលោក ចូលរួមជាអធិបតី ក្នុងពិធីបទការប្រជុំបូកសរុបលទ្ធផលការងារឆ្នាំ២០១៥ និងទិសដៅឆ្នាំ២០១៦ របស់មន្ទីរយុត្តិធម៌កងរាជអាវុធហត្ថខេត្តសៀមរាប ក្នុងនោះផងដែរ លោកមេបញ្ជាការរង ក៏បានលើកឡើងថា ការបិទប្រជុំរបស់មន្ទីរយុត្តិធម៌នៅពេលនេះគឺជាអត្ថន័យបង្ហាញច្បាស់អំពីការត្រួតពិនិត្យ ការអនុវត្តការងារជំនាញប្រចាំឆ្នាំរបស់ខ្លួន ស្របទិសដៅផែនការការងារដែលមន្ទីរបានដាក់ចេញ សម្រាប់អនុវត្តឆ្នាំ២០១៥នេះ និងសូមឯកភាព ការលើកឡើងនូវទិសដៅ អនុវត្តបន្តសម្រាប់ឆ្នាំ២០១៦ ដែលនេះជារបៀបរបបធ្វើការងារដ៏សំខាន់របស់ជំនាញ ។
លោកឧត្តមសេនីយ៍ទោ ហុង វិណុល បានបន្តទៀតថា បន្ទាប់ពីបានស្តាប់របាយការណ៍របស់លោកមេបញ្ជាការរងកងរាជអាវុធហត្ថខេត្តសៀមរាប និងលទ្ធផលកិច្ចប្រជុំរបស់មន្ទីរយុត្តិធម៌ដែលបានរាយការណ៍ជូន ក៏ដូចជាការងារដែលបានបំពេញតួនាទីជាជំនួយអំណាចឲ្យព្រះរាជអាជ្ញាអមសាលាដំបូងខេត្តសៀមរាប តាំងនាមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងក្នុងនាមលោកផ្ទាល់សូមវាយតម្លៃខ្ពស់ចំពោះលទ្ធផលការងារដែលមន្ទីរយុត្តិធម៌ខេត្តសៀមរាបសម្រេចបានក្នុងឆ្នាំ២០១៥ និងការលើកទិសដៅការងារសម្រាប់ឆ្នាំ២០១៦ ដែលនេះជាលទ្ធផលនៃការងាររបស់មន្ត្រីនគរបាលយុតិ្តធម៌ដ៏មានសារសំខាន់ និងជាផ្នែកមួយនៃភារកិច្ចរបស់កងរាជអាវុធហត្ថខេត្តសៀមរាបដែលសម្រេចបានក្នុងឆ្នាំ២០១៥ ។
លោកមេបញ្ជាការបានមានប្រសាសន៍បន្តថា កិច្ចប្រជុំរបស់យើងដែលប្រារព្ធនាពេលនេះ គឺស្ថិតក្នុងអាណត្តិទី៥ នៃរាជរដ្ឋាភិបាលស្របច្បាប់នៃរដ្ឋសភា ដែលប្រសូត្រចេញពីការបោះឆ្នោតជាសកលដោយប្រជាពលរដ្ឋ នាថ្ងៃទី២៨ ខែកក្កដា ឆ្នាំ២០១៣កន្លងមក ដឹកនាំដោយសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។ ក្នុងកម្មវិធីនយោបាយរបស់ខ្លួន និងយុត្តិសាស្ត្រចតុកោណដំណាក់កាលទី៣នៃរាជរដ្ឋាភិបាល បានសម្តែងនូវឆន្ទៈដ៏មោះមុតក្នុងការធ្វើកំណែទម្រង់ស៊ីជម្រៅគ្រប់វិស័យ ក្នុងនោះមានការប្រយុទ្ធប្រឆាំងអំពើពុករលួយ កំណែទម្រង់ច្បាប់ ប្រព័ន្ធយុត្តិធម៌ កំណែទម្រង់រដ្ឋបាលសាធារណៈ កំណែទម្រង់កងកម្លាំងប្រដាប់អាវុធដើម្បីកំណើនការងារសមធម៌ និងប្រសិទ្ធភាពនៅកម្ពុជា(ស្នួលនៃយុទ្ធសាស្ត្រចតុកោណគឺអភិបាលកិច្ចល្អ) ។
ដើម្បីចូលរួមគាំទ្រការដឹកនាំរបស់រាជរដ្ឋាភិបាល និងផ្អែកតាមតួនាទីភារកិច្ច និងបេសកកម្មរបស់ខ្លួន កងរាជអាវុធហត្ថដែលជាផ្នែកមួយនៃកងយោធពលខេមរភូមិន្ទ មានស្វ័យភាពក្នុងកិច្ចអនុវត្តច្បាប់ មានឧបនិស្ស័យជាអន្តរក្រសួង ត្រូវតែលើកកម្ពស់ស្មារតីទទួលខុសត្រូវនូវការត្រៀមចូលរួមការពារបូរណភាពទឹកដី រួមចំណែកថែរក្សាសន្តិសុខសង្គម សណ្តាប់សាធារណៈ ដោយអនុវត្តពេញលេញម៉ឺងម៉ាត់ និងមានប្រសិទ្ធភាពនូវការងារប៉ូលិសរដ្ឋបាល នគរបាលយុត្តិធម៌ តម្រូតយោធា ការផ្តល់កម្លាំងទៅជួយអន្តរក្រសួងតាមការស្នើសុំ និងបេសកកម្មទាំង៣ គឺបង្ការ បង្ក្រាប និងសង្គ្រោះ ៕ សុខ ខេមរា
