ខេត្តកំពង់ចាម៖ មិនដឹងនេះជាការណ៍ខាងមន្ទីរ-ក្រសួងសាធារណៈការ និងដឹកជញ្ជូន នោះទេ ជាទម្លាប់ឬជាចេតនាទុច្ចរិតបំផ្លាញផ្លូវជាតិប្រព្រឹត្តដោយ លោក ហេង ផល្លា…? ខណៈលោក ហេង ផល្លាប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ៦អា គាត់មិនថ្លឹងរថយន្តផ្ទុកលើសទំងន់ទេ គឺថ្លឹងលុយហ្នឹង…!!!!…?
ប្រភពពីក្រុមឈ្មួញដឹកជញ្ជូនទំនិញ និងដឹកជញ្ជូនឈើឆ្លងកាត់មុខស្ថានីយ៍ ជញ្ជីងថ្លឹងរថយន្តនៅ ស្រុកបាធាយ បានឲ្យដឹងថា ៖ លោក ហេង ផល្លា រកចំណូលតាមរយៈតួនាទីខ្លួនគ្រប់គ្រងស្ថានីយ៍នេះ បានលុយក្បាលឡានប្រចាំថ្ងៃផង ប្រចាំខែផង ក្នុងនោះគេបានបញ្ជាក់ថា៖ សម្រាប់រថយន្តដឹកឈើធុនធំ ភ្លៅ៤ ត្រូវបង់ក្នុងមួយជើងចាប់ពី១០ ម៉ឺនរៀលទៅ១៥ម៉ឺនរៀល ដោយមិន ចាំ បាច់ចូលថ្លឹងអ្វីទាំងអស់ ព្រូឡានចុះយកលុយបង់គឺចប់ ករណីខ្លះរាប់ក្បាលឡានទុក ព្រោះចាំទូទាត់ជាមួយថៅកែ។ ចំណែករថយន្តដឹកស៊ីម៉ង់ដ៏ និងដឹកទំនិញផ្សេងៗផ្ទុកធ្ងន់ ក៏ត្រូវចូលបង់លុយឲ្យ ក្រុមមន្ត្រីរបស់លោក ហេង ផល្លា ក្នុងមួយជើងពី៦ម៉ឺនទៅ១០ម៉ឺនរៀលផងដែរ ហើយសម្រាប់រថយន្តដឹកអុសត្រូវបង់ក្នុងមួយជើងពី៦ម៉ឺនរៀលទៅ១០ម៉ឺនរៀលទើបអាចឆ្លងកាត់ស្ថានីយ៍ថ្លឹងរថយន្តនោះដោយគ្មានការរំខាន។ អាចនិយាយបានថាលោក ហេង ផល្លា និងបក្ខពួកកំពុងប្រែក្លាយជញ្ជីងថ្លឹងរថយន្តឲ្យទៅជាជញ្ជីងថ្លឹងលុយព្រោះថ្នាក់ដឹកនាំក្រសួងសាធារណការនិងដឹកជញ្ជូន ជាពិសេសលោក សេង ឈួន ប្រធានជញ្ជីងថ្លឹងរថយន្តទូទាំងប្រទេសកំពុងសប្បាយប្រមូលលុយតាមរបៀបពុករលួយ ហើយទៅខេត្តណាម្តងៗ ទូរស័ព្ទរកប្រធានស្ថានីយ៍ ក្រុមឈ្មួញរកសុីដឹកទំនិញ ក្រុមហ៊ុនដឹកជញ្ជូនទំនិញ អោយមកចេញថ្លៃបាយ របស់ទ្រនាប់ដៃ ក្លាយជាអំពើរកលុយទាំងល្មើសនិងហាមឃាត់ រថយន្តដឹកផ្ទុកលើសទំងន់ ទៅយកលុយពីដឹកលើសនេះទៅវិញ។ បញ្ហានេះគួរលោក ទេសរដ្ឋមន្ត្រី ស៊ុន ចាន់ថុល ដាក់ភាពសង្ស័យ និងកំណែទម្រង់ផង។
មន្ត្រីរាជការនៅក្នុងមន្ទីរសាធារណការនិងដឹកជញ្ជូនខេត្តកំពង់ចាមបានឲ្យដឹងថា៖ បច្ចុប្បន្នលោក ហេង ផល្លា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦អា ភូមិជានា ឃុំជានា ស្រុកបាធាយ ខេត្តកំពង់ចាម និងបក្ខពួកឃុបឃិតគ្នាប្រព្រឹត្តអំពើពុករលួយកាន់តែខ្លាំងជាងមុនទៅទៀត។ ប្រភពបានឲ្យដឹងទៀតថាលោក ហេង ផល្លា និងបក្ខពួកមិនដែលធ្វើការផាកពិន័យម្ចាស់រថយន្តធំៗដឹកជញ្ជូនទំនិញលើសទម្ងន់ឬតកន្ទុយ តទ្រុង ខុសលក្ខណៈបច្ចេកទេសនោះឡើយ ហើយពួកគេគិតតែពីរឿងប្រមូលលុយចែកគ្នាធ្វើមានធ្វើបានយ៉ាងសុខស្រួល។ ការដែលលោក ហេង ផល្លា ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់ប្រធានមន្ទីរសាធារណការខេត្តកំពង់ចាម ផងដែរ ទើបអ្វីៗអាចប្រព្រឹត្តទៅដោយរលូន។ មានន័យថា៖ សមគំនិតគ្នាជាឯកច្ឆ័នបំផ្លាញផ្លូវជាតិ ដែលរដ្ឋាភិបាលកសាងសម្រាប់ជាសមិទ្ធផលជូនប្រជាជន ប្រទេសជាតិ តែអស់លោកឆ្លៀតយកតួនាទីមករកលុយ ទាំងគឃ្លើនច្បាប់។
ប្រភពដែលស្និទ្ធនឹងលោក ហេង ផល្លា បានឲ្យដឹងថា៖ អាចមានលក្ខណៈពិសេសណាមួយ ខាងប្រធានមន្ទីរសាធារណការនិងដឹកជញ្ជូនខេត្តកំពង់ចាម លោក ហេង ផល្លា បានយកឈ្មោះ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន ធ្វើជាបង្អែករឹងមាំ និងគម្រាមឈ្មួញ ទើបលោកទាំង២ រួមដៃគ្នាក្នុងការប្រព្រឹត្តអំពើពុករលួយយកលុយពីឡានផ្ទុកលើសទំងន់តាមអំពើចិត្ត«កន្លែងថ្លឹងរថយន្ត ក្លាយជាកន្លែងថ្លឹងលុយ» មន្ត្រីនៅក្នុងមន្ទីរសាធារណការនិងដឹកជញ្ជូនខេត្តកំពង់ចាម បានឲ្យដឹងទៀតថាលោក ហេង ផល្លា តែងបន្លំលួចប្រើប្រាស់ឈ្មោះលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនដើម្បីការពារអំពើពុករលួយ និងទង្វើមិនប្រក្រតីរបស់ខ្លួនដោយគ្មានសេចក្ដីអៀនខ្មាស។
បញ្ហានេះគឺជារឿងដែលលោក គួច ចំរើន អភិបាលខេត្តកំពង់ចាម និងលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ មិនគួរមើលរំលងតទៅទៀតទេ ព្រោះលោក ហេង ផល្លា ល្បីល្បាញខាងប្រព្រឹត្តអំពើពុករលួយជាយូរមកហើយ ចាត់ទុកជាប្រភពសេដ្ឋកិច្ចរបស់គាត់និងបក្ខពួក យ៉ាងឆ្ងាញ់មាត់បំផុត។
ពាក់ពន្ធ័និងការរិៈគន់ពីឈ្មួញ ក៏ដូចមន្ត្រីចោទប្រកាន់ខាងលើ អង្គភាព «នគរដ្រេហ្គន» មិនអាចសុំការបំភ្លឺបានឡើយដោយគ្មានលេខទូរស័ព្ទនាព្រឹកថ្ងៃទី១៩ ខែមករា ឆ្នាំ២០១៩៕
ដោយ៖ សុខ ខេមរា
