ភ្នំពេញ៖ ការដោះលែងមេកន្ទុយលេខម្នាក់ និងកូនចៅពីរនាក់ទៀតដោយសមត្ថកិច្ចនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ត្រូវបានបែកធ្លាយដែលករណីនេះ ត្រូវបានគេសង្ស័យថា អាចនឹងមានការឯកភាព ឬមិនសុំគោលការណ៍ឯកភាពណាមួយពីព្រះរាជអាជ្ញាដោះលែងស្ងាត់ៗ ។
គួររំលឹកថា កាលពីថ្ងៃទី៦ ខែធ្នូ ឆ្នាំ២០១៥ សមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញដឹកនាំដោយ ជាវ វិបុល នាយរងការិយាល័យបានចុះបង្ក្រាបចាប់មេកន្ទុយលេខម្នាក់ រួមទាំងកូនចៅពីរនាក់ទៀត ទៅកាន់ស្នងការដ្ឋាននគរបាលរាជធានីភ្នំពេញ ប៉ុន្តែក្រោយមក នាយប់ថ្ងៃដដែលនោះ ត្រូវបានដោះលែងឲ្យត្រឡប់មកផ្ទះវិញ ។ ពុំមានព័ត៌មានជាក់លាក់ណាមួយដែលអះអាងថា មេកន្ទុយលេខរូបនោះ ត្រូវចំណាយប្រាក់ប៉ុន្មានពិតប្រាកដនៅឡើយទេ ប៉ុន្តែឮពីមាត់មួយទៅមាត់មួយ អាចជាក្រុមមិនទទួលបានលាភសក្ការបញ្ជាក់ថា ករណីដោះលែងនេះត្រូវបានចំណាយទឹកប្រាក់ជិត៤ពាន់ដុល្លារ ។
នគរវត្តមិនអាចទាក់ទងបានទេពីលោក ជាវ វិបុល នាយរងនគរបាលនៃស្នងការដ្ឋាននគរបាលរាជធានីភ្នំពេញនាព្រឹកថ្ងៃទី៩ ខែធ្នូ ឆ្នាំ២០១៥ ដោយគ្មានលេខទូរស័ព្ទ ។ ប៉ុន្តែលោក ប៊ុន សត្យា នាយការិយាល័យបានប្រាប់នគរវត្តតាមទូរស័ព្ទនាថ្ងៃដដែលនេះថា «រឿងហ្នឹង ខ្ញុំបានបញ្ជូនទៅអស់ហើយ» ។ រួចក៏បិទទូរស័ព្ទ ។ គេពុំដឹងថា នាយការិយាល័យរូបនេះត្រូវបញ្ជូនជនសង្ស័យពាក់ព័ន្ធនឹងបើកកន្ទុយលេខកសាងសំណុំរឿងតាមនីតិវិធីទៅសាលាដំបូងរាជធានីភ្នំពេញចាត់ការតាមនីតិវិធី ឬជូនមេកន្ទុយលេខ រួមទាំងគូកនទៅកាន់លំនៅឋានរបស់ពួកគេវិញឬមួយយ៉ាងណា ។ មេៗកន្ទុយលេខ រួមទាំងអ្នកបើកទីតាំងហ្គេមល្បែងស៊ីសង ភាគច្រើនពង្វក់ក្មេង និងសិស្សសាលា ក៏ដូចជាទីតាំងផ្តល់ឲ្យការសេពគ្រឿងញៀន ការលាក់ខ្លួនរបស់ជនប្រព្រឹត្តបទល្មើសក្នុងសង្គម តែងតែពាក់ព័ន្ធទៅនឹងផលប្រយោជន៍របស់សមត្ថកិច្ចអាជ្ញាធរមូលដ្ឋាន រួមទាំងខាងនគរបាលព្រហ្មទណ្ឌកម្រិតស្រាលមួយចំនួនផងដែរ ។
មួយរយៈនេះ បទល្មើស ឆក់ ប្លន់ បានកើតមានជាបន្តបន្ទាប់នៅក្នុងរាជធានីភ្នំពេញ ហើយបទល្មើសទាំងនេះផងដែរ ក៏អាចផ្តើមចេញពីប្រភពនៃបនល្បែងស៊ីសងទាំងនោះ ។ ដូច្នេះ បើសមត្ថកិច្ចចាប់ជនសង្ស័យរួចដោះលែងជាថ្នូរនឹងលាភសក្ការៈ ពិតជាអាចមានចេតនាចិញ្ចឹមបទល្មើសក៏អាចថាបាន ៕ សុខ ខេមរា
