ទីក្រុងបាងកក៖ លទ្ធផលបោះឆ្នោតនៅក្នុងប្រទេសថៃ ពេលនេះ មិនទាន់ ប្រាកដថាគណបក្សណាមួយទទួលបានជ័យជំនៈពិតប្រាកដនោះឡើយ ដោយមានព័ត៌មានខ្លះថាគណបក្សភឿថៃ ទទួលបានជ័យជំនៈ ។ ព័ត៌មានខ្លះទៀតថា គណបក្ស យោធារបស់លោកប្រាយុទ្ធចាន់អូចាទទួលបានជ័យជំនៈ។
អគ្គលេខាធិការគណបក្សភឿថៃលោក Phumtham Wechayachai បានបញ្ជាក់ថា លោកកំពុងតែរងចាំលទ្ធផលបណ្តោះអាសន្នប្រកាសដោយគណកម្មការរៀបចំការបោះឆ្នោតថៃ។ ប៉ុន្តែបានឃើញមានចំណុចខុសប្រក្រតី ជាច្រើន នៅក្នុងការរាប់សន្លឹកឆ្នោត ហើយលោកចង់ឲ្យរាប់សន្លឹកឆ្នោតខូចខាតទាំងអស់ឡើងវិញ ។
សូមបញ្ជាក់ថា មានសន្លឹកឆ្នោតមិនស្របច្បាប់ដល់ទៅ២,៨លានសន្លឹក ជាចំនួន យ៉ាងច្រើន ចំពោះពលរដ្ឋថៃដែលមានបទពិសោធន៍ នៅក្នុងការបោះឆ្នោតរាប់សិបឆ្នាំកន្លងមក ។
សារព័ត៌មាន Bloomberg បានផ្សាយថា គណបក្សយោធាថៃនាំមុខក្នុងការបោះឆ្នោត កាលពីថ្ងៃទី២៤ខែមីនា ។ ក្រោយការរាប់សន្លឹកឆ្នោតបានប្រមាណ៩២ភាគរយ បង្ហាញឲ្យឃើញថា គណបក្ស Palang Pracharath ទទួលបានសន្លឹកឆ្នោតគាំទ្រ ៧,៥លានសន្លឹក ។ចំណែកគណៈបក្ស ភឿថៃទទួលបាន៧,០៥លានសន្លឹក ។ តាមគម្រោង គណៈកម្មការរៀបចំការបោះឆ្នោតថៃ នឹង ប្រកាសលទ្ធផលបណ្តោះអាសន្ននៅវេលាម៉ោង២រសៀលថ្ងៃទី២៥ខែមីនា នេះ។
ប្រព័ន្ធផ្សព្វផ្សាយក្នុងស្រុកបានផ្សាយថា គណបក្ស Palang Pracharath ទទួលបាន ១៤៦កៅអីក្នុងព្រឹទ្ធសភា គឺគ្រប់គ្រាន់សម្រាប់ លោកប្រាយុទ្ធចាន់អូចាបន្តកាន់តំណែងជានាយករដ្ឋមន្ត្រីតាមច្បាប់បោះឆ្នោត ។ ជាមួយគ្នានេះ សមាជិកព្រឹទ្ធសភា២៥០រូប មិនឆ្លងកាត់ការបោះឆ្នោត គឺជ្រើសរើសដោយរដ្ឋាភិបាលយោធា ដូច្នេះ ល្បែងនយោបាយនៅថៃ អាចនិយាយបានថា មិនមានតម្លាភាពទៀតឡើយ ដោយ យោធាបានយកប្រៀប ទាំងស្រុងទៅលើបណ្តាគណៈបក្សនយោបាយផ្សេង៕
ដោយ៖ មែវ សាធី