នៅពេលដែលពិភពលោកកំពុងផ្តោតអារម្មណ៍ទៅលើការវាយប្រហារក្រុមអិស្លាមបង្កើតរដ្ឋIS អាមេរិកបែរជាស្ងាត់ៗបញ្ចូនសព្វាវុធជាច្រើនមកតំបន់អាស៊ីុដើម្បីទប់ស្កាត់ឥទ្ធិពលរបស់ចិនទៅវិញ។ ការដែលអាមេរិកមកកាន់អាស៊ីុបានដោយគ្មានការខ្វាយខ្វល់ ដោយសារតែអាមេរិកបានប្រគល់តួនាទីវាយប្រហារក្រុមអិស្លាមបង្កើតរដ្ឋនិងទប់ទល់ជាមួយរុស្សីឲ្យទៅសម្ព័ន្ធមិត្តជាអ្នកទទួលខុសត្រូវក្នុងនោះមានអាល្លឺម៉ង់ បារាំង អង់គ្លេស និងប្រទេសជាច្រើនទៀតតំបន់អឺរ៉ុប។
គោលដៅរបស់អាមេរិកនិងសម្ព័ន្ធមិត្តនៅតំបន់មជ្ឈឹមបូព៌ាគឺអូសបន្លាយពេលវេលាដើម្បីធ្វើឲ្យរុស្ស៊ីដែលជាសត្រូវពិតប្រាកដរបស់លោកខាងលិចត្រូវជាប់ផុងនៅក្នុងសង្គ្រាមប្រឆាំងIS ទើបអាចធ្វើឲ្យរុស្ស៊ីត្រូវថមថយកម្លាំងជាងមុន មិនអាចគម្រាមកំហែអដល់អាមេរិកបាន។ ទាំងនោះហើយអាចធ្វើឲ្យរុស្ស៊ីត្រូវចំណាយប្រាក់ជាច្រើនថែមទៀតនៅក្នុងសង្គ្រាម ក្នុងពេលដែលរុស្ស៊ីទទួលរងការខាតបង់ជាច្រើនដោយសារតែការដាក់ទណ្ឌកម្មពីលោកខាងលិចជុំវិញវិបត្តិនៅក្នុងប្រទេសអ៊ុយក្រែន។ ទាំងនោះហើយជាយុទ្ធសាស្ត្ររបស់លោកខាងលិចទៅលើប្រទេសរុស្ស៊ីដែលមានបំណងចង់ដណ្តើមមហាអំណាចទីមួយពីអាមេរិក។ សកម្មភាពរបស់លោកខាងលិចទៅលើប្រទេសរុស្ស៊ី កំពុងតែធ្វើឲ្យប្រទេសនេះបរាជ័យដោយមិនចាំបាច់វាយប្រហារ ។
មួយវិញទៀតអាមេរិកមានពេលវេលាគ្រប់គ្រាន់សម្រាប់បញ្ចូនកម្លាំងទាហាននិងសព្វាវុធរបស់ខ្លួនទៅកាន់តំបន់អាស៊ីុទប់ទល់ជាមួយចិន ហើយរុស្ស៊ីមិនអាចទៅជួយប្រទេសណាមួយផ្សេងទៀតបានឡើយក្រៅពីការពារខ្លួនឯង និងវាយប្រហារទៅលើក្រុមIS បើរុស្ស៊ីមិនអាចយកឈ្នះក្រុមអាយអែសទេនោះរុស្ស៊ីនឹងត្រូវប្រឈមនៅបញ្ហាជាច្រើនទៀតប៉ះពាល់ដល់សន្តិសុខជាតិគឺការវាយប្រហារបកវិញពីក្រុមIS ។ ប៉ុន្តែសង្គ្រាមវាយប្រហាររបស់រុស្ស៊ីទៅលើក្រុមIS ពេលណាអាចបញ្ចប់ ១ឆ្នាំ ២ឆ្នាំឬ១០ឆ្នាំខាងមុខទៀត ដូចការវាយប្រហាររបស់អាមេរិកទៅលើក្រុមតាលីបង់និងអាលកៃដានៅអាហ្វហ្គានិស្ថានជាដើម មកទល់ពេលនេះជិត១៥ឆ្នាំហើយ ក្រុមតាលីបង់និងអាលកៃដានៅតែខ្លាំងដដែល។
ចំពោះការវាយប្រហាររបស់លោកខាងលិចទៅលើក្រុមIS នោះត្រូវបានអ្នកវិភាគមួយចំនួនចាត់ទុកថាជាការសម្តែងតែប៉ុណ្ណោះ ដោយមិនអាចទុកឲ្យរុស្ស៊ីវាយប្រហារតែម្នាកឯង អាចកម្ចាត់ក្រុមIS បានក្នុងពេលដ៏ខ្លី ដូច្នេះការវាយប្រហាររបស់លោកខាងលិចគឺជាការរារាំងដល់សកម្មភាពរបស់រុស្ស៊ី ហើយការវាយប្រហារនោះលោកខាងលិចបែរជាផ្តល់អាវុធទៅឲ្យIS បណ្តើរវាយប្រហារបណ្តើរ ទាំងនោះហើយដែលធ្វើឲ្យសង្គ្រាមវាយប្រហារមិនអាចរកឃើញទីបញ្ចប់។
នៅពេលនេះអាមរិកអស់ក្តីបារម្ភពីរុស្ស៊ីដោយមានសម្ព័ន្ធមិត្តនាំមុខទប់ស្កាត់នៅទីនោះ អាមេរិកមានពេលវេលាគ្រប់គ្រាន់ដើម្បីបញ្ចូនកម្លាំងទៅទប់ស្កាត់ប្រទេសមួយទៀតដែលអាចគម្រាមកំហែងដល់មហាអំណាចអាមេរិកនោះគឺប្រទេសចិន។
អ្នកឯកទេសយោធារបស់ចិនបានប្រកាសថាអាមេរិកអាចនិងបញ្ចូននាវាផ្ទុកយន្តហោះបំបាំងកាយUSS Gerald R.Ford ទៅកាន់តំបន់អាស៊ីុប៉ាស៊ីុហ្វិក ដោយនៅលើនាវានោះគឺជាយន្តហោះបំបាំងកាយ សម្រប់ទប់ទល់ជាមួយចិន។
កន្លងមកថ្មីៗ អាមេរិកបានដាក់ពង្រាយយន្តហោះស៊ើុបការណ៍និងល្បាតដែនសមុទ្រ មួយគ្រឿង ឲ្យទៅនៅប្រចាំការនៅក្នុងប្រទេសសិង្ហបុរី។ ការដាក់ពង្រាយយន្តហោះជំនាញខាងដែនសមុទ្រនេះ គឺធ្វើឡើង នៅក្នុងពេលដែលអាមេរិកកំពុងប្រឈមមុខជាមួយនឹងចិន នៅក្នុងជម្លោះសមុទ្រចិនខាងត្បូង។
យន្តហោះ ដែលសហរដ្ឋអាមេរិកបញ្ជូនឲ្យទៅឈរជើងប្រចាំការនៅក្នុងប្រទេស សិង្ហបុរី នៅពេលនេះ គឺជាយន្តហោះធុន P-8 Poseidon ដែលជាប្រភេទយន្តហោះប៊ូអ៊ីង ៧៣៧ កែច្នៃជាយន្តហោះជំនាញខាងស៊ើុបការណ៍សម្ងាត់ និងខាងល្បាតដែនសមុទ្រ ហើយវាគឺជាលើកដំបូងបង្អស់ ដែលអាមេរិកដាក់ពង្រាយយន្តហោះប្រភេទនេះនៅក្នុងប្រទេសសិង្ហបុរី។
រដ្ឋមន្រ្តី ការពារជាតិអាមេរិក និងសមភាគីសិង្ហបុរីបានលើកឡើង នៅក្នុងសេចក្តីថ្លែងការណ៍រួម ចេញផ្សាយក្រោយពីជំនួបនៅរដ្ឋធានីវ៉ាសីុនតោនកាលពីថ្ងៃចន្ទម្សិលមិញថា ការដាក់ពង្រាយយន្តហោះ P-8 Poseidon នេះគឺជាផ្នែកមួយនៃការរឹតបន្តឹតកិច្ចសហប្រតិបត្តិការទ្វេភាគី អាមេរិក-សិង្ហបុរីហើយធ្វើឡើងក្នុងគោលដៅពង្រឹងប្រតិបត្តិការយោធារួមគ្នា ទាំងប្រតិបត្តិការយោធាទ្វេភាគី និងពហុភាគីនៅក្នុងតំបន់។
ក៏ប៉ុន្តែ មន្រ្តីការទូតមួយចំនួននៅក្នុងតំបន់អាស៊ាន ដែលមិនបញ្ចេញឈ្មោះ បានប្រាប់ទីភ្នាក់ងារព័ត៌មាន AFP ថា ការណ៍ដែលអាមេរិកដាក់ពង្រាយយន្តហោះស៊ើុបការណ៍និងល្បាតដែនសមុទ្រធុន ទំនើបទៅក្នុងតំបន់ក្បែរសមុទ្រចិនខាងត្បូងបែបនេះ គឺទំនងជាក្នុងគោលដៅបញ្ជាក់ប្រាប់រដ្ឋាភិបាលក្រុងប៉េកាំង ពីជំហររឹងមាំរបស់អាមេរិក ក្នុងការប្រឈមមុខជាមួយចិន នៅក្នុងជម្លោះសមុទ្រចិនខាងត្បូង។
គួរបញ្ជាក់ឡើងវិញថា ប្រទេសដែលជាប់ជម្លោះជាមួយចិន នៅក្នុងសមុទ្រចិនខាងត្បូង នៅក្នុងពេលបច្ចុប្បន្ននេះ គឺរួមមាន វៀតណាម ហ្វីលីពីន ម៉ាឡេស៊ី និងព្រុយណេ។ សិង្ហបុរីមិនមានជាប់ជម្លោះនេះទេ ក៏ប៉ុន្តែ កូនប្រទេសតូចមួយនេះ គឺជាសម្ព័ន្ធមិត្តយ៉ាងជិតស្និទ្ធបំផុតរបស់អាមេរិក នៅក្នុងតំបន់អាស៊ាន ហើយជាប្រទេសដែលមានផលប្រយោជន៍សេដ្ឋកិច្ចច្រើនពីស្ថិរភាពនៃតំបន់ សមុទ្រចិនខាងត្បូង ដោយសារតែតំបន់នេះគឺជាច្រកនាវាចរណ៍យ៉ាងសំខាន់បំផុត សម្រាប់ការដឹកជញ្ជូន និងពាណិជ្ជកម្មអន្តរជាតិ ហើយកំពង់ផែសិង្ហបុរីជាប់ចំណាត់ថ្នាក់ជាកំពង់ផែ ដែលមាននាវាពាណិជ្ជកម្មចេញចូលច្រើនជាងគេលំដាប់ទី២ នៅលើពិភពលោក។
ការដែលអាមេរិកបង្កើតកម្លាំងនៅតំបន់អាស៊ីពិសេសគឺការដាក់ពង្រាយនាវាផ្ទុកយន្តហោះនៅក្នុងប្រទេសជប៉ុន នឹងជួយបើកផ្លូវសម្រាប់ការដាក់ពង្រាយកម្លាំងទាហាននៅក្នុងប្រទេសហ្វីលីពីន។ ប៉ទោះបីហ្វីលីពីនមិនទាន់ឯកភាពតែអាមេរិកបានត្រៀមលកខណបញ្ចូនកម្លាំងទៅកាន់ទីនោះក្នុងពេលដែលហ្វីលីពីនត្រូវការ។
ការបញ្ចូននាវាផ្ទុកយន្តហោះថ្មីទៅកាន់ជប៉ុន បានបង្ហាញយ៉ាច្បាស់ថាអាមេរិកមានការព្រួយបារម្ភពីការរីកធំធុតនៃកម្លាំងទាហានចិននៅលើដែនសមុទ្រចិនភាគខាងត្បូងក៏ដូចជានៅភាគខាងកើត ។ បើអាមេរិកមិនអាចទប់ស្កាត់ចិននាពេលនេះទេសនោះនៅពេលអនាគត់ចិននឹងដណ្តើមមហាអំណាចពីអាមេរិកជាមិនខាន៕
ប្រែសម្រួល៖ ម៉ែវ សាធី
