ខេត្តតាកែវ-បាត់ដំបង ៖សោកនាដកម្មដែលកើតចេញពីភ្លើងប្រចណ្ឌ ធ្វើឲ្យប្តី កំណាច២នាក់មិនញញើត លើកដៃសម្លាប់ប្រពន្ធដើម្បីស្រាយកំហឹងនោះឡើយ ដោយ មួយករណីកើតឡើងនៅខេត្តតាកែវ ប្តីចាក់សាំងដុតប្រពន្ធទាំងរស់រួចអារកខ្លួនឯងជាក្រោយតែមិនស្លាប់ ចំណែកមួយករណីទៀត កើតឡើងនៅខេត្តបាត់ដំបង ប្តីកាប់ប្រពន្ធ របួសធ្ងន់រួចទើបអារកខ្លួនឯងស្លាប់ជា ក្រោយ ។
ប្រភពព័ត៌មានពីខេត្តតាកែវបានឲ្យដឹងថា នៅវេលាម៉ោង៤ទៀបភ្លឺឈានចូលថ្ងៃព្រហស្បតិ៍១១កើត ខែជេស្ឋ ឆ្នាំកុរ ឯកស័ក ព.ស.២៥៦៣ត្រូវនឹងថ្ងៃទី១៣ ខែមិថុនា ឆ្នាំ២០១៩ នៅភូមិត្រកៀត ឃុំត្រពាំងសាប ស្រុកបាទី ខេត្តតាកែវ ប្តីកំណាចបានយកសាំងចាក់ស្រោចលើប្រពន្ធដុតទាំងរស់បណ្តាលឲ្យស្លាប់នៅក្នុងមន្ទីរពេទ្យយ៉ាងវេទនា។ ឯប្តីកំណាចរូបនោះស្ទុះយកកាំបិតអារកខ្លួនឯងបំណងបញ្ចប់ជីវិតតាមប្រពន្ធដែរ តែមិនសម្រេចបានត្រឹមរបួសធ្ងន់ត្រូវ បានក្រុមគ្រសួារដឹកយកទៅសង្រ្គោះនៅ មន្ទីរពេទ្យកាល់ម៉ែតភ្លាមៗ ។
សាក្សីបានឲ្យដឹងក្នុងរឿងនេះថា នៅ ពេលព្រលប់ប្តី ឈ្មោះ ព្រំ តាំ អាយុ ៣៨ឆ្នាំ ជាកម្មករសួនសត្វភ្នំតាម៉ៅបានរៀបគម្រោងដុតប្រពន្ធជាស្រេច ដោយរៀបចំសាំងពីរ ប៊ីដុងទុកនៅលើផ្ទះ។ លុះមកដល់វេលា ម៉ោង៤ទៀបភ្លឺ ថ្ងៃនោះ គ្រាដែលប្រពន្ធដ៏ស្រស់ស្អាតមានឈ្មោះ លន់ គឹមណែ អាយុ ៣៥ឆ្នាំដេកលង់លក់ ប្តីបានយកសាំងមួយប៊ីដុងជះទៅលើប្រពន្ធ និង១ទៀតបើកគម្របទុកចោលជាស្រេច បន្ទាប់មកប្តី ក៏យកដែកកេះ កេះដុតប្រពន្ធទាំងរស់តែ ម្តង។
ភ្លាមនោះដែរប្តីបានយកកាំបិតមក អារកខ្លួនឯងតាមក្រោយ ដើម្បីបញ្ចប់ជីវិត នៅក្នុងភ្លើងជាមួយគ្នា តែសំណាងបានអ្នកជិតខាងដែលឃើញភ្លើងឆេះនៅក្នុងផ្ទះនាំគ្នារត់ទៅជួយ ប៉ុន្តែទ្វារផ្ទះបានចាក់គន្លឹះជាប់ពីក្នុងហើយដោយអ្នកជិតឃើញភ្លើងឆេះ និងលាយឡំជាសំឡេងស្រ្តីរងគ្រោះស្រែកឲ្យជួយ ក៏សម្រេចបុកទ្វារទម្លាយចូលតែម្តង ។
សាក្សីបានឲ្យដឹងទៀតថា ពេលចូលទៅដល់ គេឃើញភ្លើងកំពុងឆាបឆេះប្រពន្ធឡើងស្ទើរខ្លោចទៅហើយ ចំណែកប្តីក៏បានរត់ទៅអារកខ្លួនឯងដែរ តែមិនបានសម្រេចនៅសួនសត្វភ្នំតាម៉ៅ រួចក៏នាំគ្នា ដឹកប្រពន្ធយកទៅសង្រ្គោះនៅមន្ទីរពេទ្យព្រះកុសុមៈ។ តែក្រោយមកដោយសាររបួសធ្ងន់ធ្ងរពេកនាងក៏បាត់បង់ជីវិតទៅ។ ចំណែកបុរសជាប្តីដែលក្រុមគ្រួសារអះអាងថាមានជំងឺប្រចាំកាយ សរសៃប្រសាទឈានទៅវិកល ចរិត ប្រមាណ៥ខែមកហើយ ទោះបើយក ទៅព្យាបាលនៅក្នុង និងក្រៅប្រទេសមិន ជាសះស្បើយ ហើយរបួសធ្ងន់ដោយអារកខ្លួនឯងនោះត្រូវដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែតផងដែរ ។
ដោយឡែកករណីមួយទៀតកើតមាននៅខេត្តបាត់ដំបង ដោយសាររឿងរ៉ាវប្រចណ្ឌបែបនេះដែរ ធ្វើឲ្យប្រពន្ធរងរបួសធ្ងន់ដោយប្តីកាប់ ឯប្តីអារកខ្លួនឯងស្លាប់ជាក្រោយព្រោះនឹកស្មានថាប្រពន្ធស្លាប់បាត់ទៅហើយ។
សាក្សីបានឲ្យដឹងថា ហេតុការណ៍នេះកើតឡើងនៅវេលាម៉ោង៥និង៤០នាទីល្ងាច ថ្ងៃព្រហស្បតិ៍១១កើត ខែជេស្ឋ ឆ្នាំកុរ ឯកស័ក ព.ស.២៥៦៣ត្រូវនឹងថ្ងៃទី១៣ ខែមិថុនា ឆ្នាំ២០១៩ នៅត្រង់ចំណុចផ្ទះ លេខ១៩៦ ក្រុមទី១៣ ភូមិដំណាក់ហ្លួង សង្កាត់វត្តគរ ក្រុងបាត់ដំបង ខេត្តបាត់ដំបង។
បុរសជាប្តីឈ្មោះ រ៉ាត់ ចិត្រា ភេទប្រុស អាយុ ២៨ឆ្នាំ មានទីលំនៅកើតហេតុខាងលើ បានប្រើហិង្សាកាប់ទៅលើប្រពន្ធ ឈ្មោះ សុខ លីន អាយុ ២៧ឆ្នាំ បណ្ដាលឲ្យរបួសធ្ងន់ធ្ងរ ដោយសារប្រចណ្ឌហើយត្រូវបានក្រុមគ្រួសារ បញ្ជូនមកសង្រ្គោះបន្ទាន់នៅមន្ទីរពេទ្យយោធភូមិភាគទី៥(ព២)។ ចំណែកប្ដីស្មានថា ប្រពន្ធស្លាប់ក៏រត់ទៅផ្ទះអ្នកជិតខាងយកកាំបិតមក អារក សម្លាប់ខ្លួនឯងស្លាប់នៅកន្លែងកើតហេតុតែម្តងទៅ ។
តាមការបំភ្លឺរបស់សាក្សីឈ្មោះ គង់ សុធារិន ភេទប្រុស អាយុ ៤៧ឆ្នាំ រស់នៅភូមិកើតហេតុខាងលើបានបញ្ជាក់ថា នៅថ្ងៃកើតហេតុ ពេលខ្លួនកំពុងអង្គុយផឹកស្រាបៀរនៅមុខផ្ទះជាមួយបងប្អូន ស្រាប់តែឈ្មោះ រ៉ាត់ ចិត្រា បានដើរមកដល់ផ្ទះខ្លួន ហើយបានសុំខ្ចីកាំបិតមួយភ្លែត។ ពេលនោះខ្លួនសួរថា ឯងយកកាំបិតធ្វើអី? រ៉ាត់ ចិត្រា ប្រាប់ថា យកទៅធ្វើទូរសព្ទ័រួច គេក៏ដើរមកជិតកាំជណ្ដើរផ្ទះគាត់រួចយកកាំបិតនោះអាករខ្លួនឯងស្លាប់តែម្ដងទៅ សូម្បី គាត់ស្ទុះទៅឃាត់ ក៏ឃាត់មិនទាន់ផង ។
ក្រោយកើតហេតុសមត្ថកិច្ច ចុះដល់ ទីតាំងកើតហេតុធ្វើកោសល្យវិច័យរួចសន្និដ្ឋានថា សាកសពស្លាប់ដោយធ្វើអត្តឃាត ដោយយកកាំបិតអាករសម្លាប់ខ្លួនឯងប្រាកដមែន ករណីនេះមិនមែនជារឿងឃាតកម្មនោះឡើយរួចបានប្រគល់សពជូនក្រុមគ្រួសារធ្វើបុណ្យទៅតាមប្រពៃណី៕