ខេត្តឧត្តរមានជ័យ ៖ ជនរងគ្រោះឈ្មោះ រី ប៊ូនិត ហៅ កាប ភេទប្រុស អាយុ៣៣ឆ្នាំ ជនជាតិខ្មែរ មានទីលំនៅបច្ចុប្បន្នភូមិសំរោង សង្កាត់សំរោង ក្រុងសំរោងថា បានដាក់ពាក្យបណ្ដឹងឲ្យនគរបាលមូលដ្ឋានជួយស្រាវជ្រាវ និងចាប់ខ្លួនជនសង្ស័យបងផ្តន្ទាទោសតាមច្បាប់ក្នុងករណីចោរចូលលួច ឈើធ្នង់ ចំនួន ៨ដុំ នៅផ្ទះរបស់ខ្លួន។
ក្រោយបានទទួលបណ្តឹងពីជនរងគ្រោះភ្លាម កម្លាំងជំនាញ នៃអធិការដ្ឋាននគរបាលក្រុងសំរោង ក្រោមការដឹកនាំបញ្ជាផ្ទាល់ពី លោកឧត្ដមសេនីយ៍ត្រី ឡឹក សុខា ស្នងការរងទទួលផែនការងារនគរបាលព្រហ្មទណ្ឌ បានប្រើប្រាស់វិធានការជំនាញចុះស្រាវជ្រាវកំណត់បានមុខសញ្ញា និងឈានដល់ការឃាត់ខ្លួនជនសង្ស័យបានចំនួន២នាក់ កាលពីថ្ងៃទី១៦ ខែតុលា ឆ្នាំ២០១៩ វេលាម៉ោង៥និង២០នាទី មានឈ្មោះដូចខាងក្រោម ៖
១.ឈ្មោះ ម៉ឹក វណ្ណៈ ភេទប្រុស អាយុ១៨ឆ្នាំ មានទីលំនៅភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ មុខរបរមិនពិតប្រាកដ ឃាត់ខ្លួននៅចំណុចភូមិសំរោង សង្កាត់សំរោង ក្រុងសំរោង ផ្ទះរបស់ខ្លួន។
២.ឈ្មោះ ឈ្នៀង សុគា ភេទប្រុស អាយុ២៧ឆ្នាំ មានទីលំនៅភូមិគៀប ឃុំគោកខ្ពស់ ស្រុកបន្ទាយអពិល ខេត្តឧត្តរមានជ័យ មុខរបរមិនពិតប្រាកដ ឃាត់ខ្លួននៅចំណុចភូមិបុរីរដ្ឋបាល សង្កាត់សំរោង ក្រុងសំរោង ផ្ទះរបស់ឈ្មោះ ធា។
លោក ឡឹក សុខា ស្នងការរងទទួលផែនការងារនគរបាលព្រហ្មទណ្ឌ បានឲ្យដឹងថា ជនសង្ស័យទាំង២នាក់ខាងលើ បាននាំយកមកកាន់អធិការដ្ឋាន ដើម្បីសួរនាំ ក្រោយសាកសួររួច ជនសង្ស័យទាំងពីរ ក៏បានសារភាពថា ខ្លួនពិតជាបានលួចឈើរបស់ជនរងគ្រោះខាងលើពិតប្រាកដមែន ហើយបានយកទៅលក់ឲ្យ ឈ្មោះ ឆែម សារួម ភេទប្រុស អាយុ៤៣ឆ្នាំ មានទីលំនៅភូមិសំរោង សង្កាត់សំរោង ក្រុងសំរោង រំលងអធ្រាត្រ ភ្លាមៗនោះ កម្លាំងក៏បានបន្តទៅឃាត់ខ្លួន ឈ្មោះ ឆែម សារួម នៅនឹងផ្ទះ ដែលមានទីលំនៅភូមិសំរោង សង្កាត់សំរោង និងដកហូតឈើធ្នង់បានចំនួន៧ដុំ។
បច្ចុប្បន្ន ជនសង្ស័យទាំង៣នាក់ កំពុងត្រូវបានសមត្ថកិច្ចកសាងសំណុំរឿងដើម្បីចាត់ការតាមនីតិវិធី៕
ដោយ៖ សហការី
