ភ្នំពេញ៖ ហេតុការណ៍ដ៏គួរឲ្យភ្ញាក់ផ្អើលមួយបានកើតឡើងនៅវេលាម៉ោង១និង១០នាទីរំលងអាធ្រាត ឈានចូលថ្ងៃទី២ ខែមករា ឆ្នាំ២០១៦ នៅតាមបណ្ដោយផ្លូវព្រះមុនីវង្ស ទល់មុខនិងស្ថានទូតបារាំង ស្ថិតក្នុងសង្កាត់ស្រះចក ខណ្ឌដូនពេញ ដោយមានយុវជន២នាក់បានស្លាប់ភ្លាមៗនៅនិងកន្លែងកើតហេតុនិងម្នាក់ទៀតរងរបួសយ៉ាងធ្ងន់ធ្ងរ ខណះពួកគេជិះម៉ូតូក្នុងល្បឿនលឿនជ្រុលទៅបុករថយន្តមួយគ្រឿងទៀតដែលបើកបញ្ច្រាស់ទិសគ្នាពេញទំហឹង។
បើតាមសាក្សីដែលឃើញហេតុការណ៍ខាងលើនេះបានឲ្យដឹងថា មុនពេលកើតហេតុគេបានឃើញមានយុវជនរងគ្រោះទាំង៣ជិះមួយគ្រឿងម៉ាកហង់ដាស្កុបពី ពណ៌ផ្កាឈូក ពាក់ស្លាកលេខភ្នំពេញ1AQ.1208 ជិះក្នុងទិសដៅពីជើងទៅត្បួងតាមបណ្ដោយផ្លូវមហាវិថីព្រះមុនីវង្ស ក្នុងល្បឿនលឿន ខណះពេលនោះស្រាប់តែមានរថយន្តកូរ៉េ ទំងន់បីតោនកន្លះ ពាក់ស្លាកលខភ្នំពេញ3C.6319 ដែលបើកដឹកបន្លែនៅក្នុងរថយន្តជាច្រើន ហើយបានបើកបរបញ្ច្រាស់ទិសគ្នានិងម៉ូតូរងគ្រោះនោះ។ ភ្លាមនោះម៉ូតូនិងរថយន្តទាំងពីរគ្រឿងបានបុកគ្នាពេញទំហឹង នៅនិងកណ្ដាលផ្លូវ លាន់សូរដូចរន្ទះបណ្ដាលឲ្យម៉ូតូនិងអ្នកជិះអូសជិត២០ម៉ែត្រដោយយុវជន២នាក់ស្លាប់ភ្លាមនៅនិងកន្លែងកើតហេតុ និងម្នាស់ទៀតរងរបួសយ៉ាងធ្ងន់ធ្ងរផងដែរ។
ក្រោយពេលកើតហេតុម្ចាស់រថយន្តកូរ៉េ បានបើកទ្វាររត់គេចខ្លូនបាត់ស្រមោល រីឯរថយន្តនិងម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅឯការិយាល័យនគរបាលចរាចរណ៍ផ្លូវគោករងចាំដោះស្រាយតាមច្បាប់។ដោយឡែកយុវជនដែលរងរបួសធ្ងន់នោះ ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែត្រភ្លាមៗ រីឯសពរងគ្រោះមិនទាន់ស្គាល់អត្តសញ្ញាណនៅឡើយទេ ហើយត្រូវបានសមត្ថកិច្ចជំនាញ បានទំនាក់ទំនងទៅសាច់ញាតិឲ្យមកទទួលសព យកទៅធ្វើបុណ្យតាមប្រពៃណី៕
ដោយ៖ ព្រែកជ័យ
