ខេត្តបន្ទាយមានជ័យ ៖ បុរសវ័យចំណាស់ម្នាក់មានទំនាស់ជាមួយបុរសម្នាក់ទៀតជាយូរមកហើយទើបថ្ងៃនេះនឹកឃើញចង់សងសឹកក៏យកកាំបិតខ្វែវទៅកាប់គូសត្រូវបណ្តាលឲ្យបែកក្បាលនិងរបួសដៃរងរបួសធ្ងន់ តែត្រូវបានកម្លាំងកងរាជអាវុធក្រុងប៉ោយប៉ែតចុះឃាត់ខ្លួនជនសង្ស័យបានភ្លាមនៅវេលាម៉ោង១២យប់ ចូលថ្ងៃទី២០ខែវិចិ្ឆកា ឆ្នាំ២០១៩ នៅចំណុចភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ត្រី នួន នីណារ៉ូ បានឲ្យដឹងថា យោងពាក្យបណ្តឹងរបស់ភាគីជនរងគ្រោះឈ្មោះ សំ វាសនា ភេទ ស្រី អាយុ ៣៤ឆ្នាំរស់នៅក្នុងភូមិ សង្កាត់ កើតហេតុខាងលើបានបំភ្លឺឲ្យដឹងថា៖ជនសង្ស័យឈ្មោះ ឡាយ ឃាង ភេទ ប្រុស អាយុ ៥៤ឆ្នាំកន្លងមកធ្លាប់មានទំនាស់ពាក្យសម្តីគ្នាពីមុនមកជាមួយគាត់។លុះនៅថ្ងៃកើតហេតុខណៈគាត់កំពុងអង្គុយលេងនៅមុខជណ្តើរ សុខៗស្រាប់តែឈ្មោះ ឡាយ ឃាង កាន់កាំបិតដើរសំដៅមករកគាត់ ហើយក៏បានប្រតាយប្រតប់គ្នាឡើង។ពេលនោះជនសង្ស័យកាប់ទៅលើរូបគាត់២កាំបិតត្រូវចំក្បាល និងដៃ បណ្តាលឲ្យរបួសធ្ងន់។
យ៉ាងណាក្នុងករណីនេះក្រោយទទួលបានពាក្យបណ្តឹង កម្លាំងជំនាញបានចុះធ្វើការឃាត់ខ្លួនជនសង្ស័យបានភ្លាមៗហើយបានបញ្ជូនមកបញ្ជាកាដ្ឋានកងរាជអាវុធហត្ថខេត្តដើម្បីសាកសួរបន្ត។
ប្រភពដដែលបន្តថា ក្រោយពីបញ្ចប់ការស៊ើបអង្កេតយោងតាមការបំភ្លឺរបស់ជនរងគ្រោះ និងតាមចម្លើយសារភាពរបស់ជនសង្ស័យ ឃើញមានភាពស៊ីសង្វាក់គ្នា បង្ហាញពីតម្រុយនៃបទល្មើសយ៉ាងជាក់លាក់ ដូច្នេះជនសង្ស័យត្រូវបានចោទប្រកាន់ពីបទហិង្សាដោយចេតនា ហើយជនសង្ស័យត្រូវបានកម្លាំងជំនាញការិយាល័យព្រហ្មទណ្ឌកងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់៕
ដោយ៖ សហការី
