ខេត្តសៀមរាបៈ អំពើឃាតកម្មមួយបានកើតឡើងលើយុវវ័យចំនួន៣នាក់បណ្ដាលអោយស្លាប់យ៉ាងអាណោចអាធម ជាបន្ដបន្ទាប់កាលពីវេលាម៉ោង១២ថ្ងៃត្រង់ ថ្ងៃទី២ ខែមករា ឆ្នាំ២០១៦ស្ថិតនៅចំនុចខ្នងភ្នំពើងតានាន់ ក្នុងភូមិគោកដូង ឃុំគោកដូង ស្រុកអង្គរជុំ ខេត្តសៀមរាបខាងកើតសាលាឃុំគោកដូងចំងាយ១១គឺឡូម៉ែត្រ។
បើតាមប្រភពពត័មានពីនគរបាលប៉ុស្ដិគោកដូងបានអោយដឹងថា ជនរងគ្រោះជិះម៉ូតូឌុបគ្នា៣នាក់ត្រឡប់មកពីចំការមកដល់ចំនុចកើតហេតុក៏មានករណីប្លន់យកម៉ូតូដោយជនសង្ស័យប្រដាប់ដោយអាវុធ ពូថៅកាប់មកលើជនរងគ្រោះទាំង៣នាក់បណ្ដាលអោយស្លាប់ជាបន្ដបន្ទាប់ ទី១មានឈ្មោះ មាត់យ៉ា ភេទប្រុស អាយុ ១៣ឆ្នាំ ទី២ ឈ្មោះ ម៉ិចក្អាត់ ភេទប្រុស អាយុ១៦ឆ្នាំ ទាំង២នាក់រស់នៅភូមិគោកត្របែក ឃុំគោកដូង និងទី៣ឈ្មោះ អ៊ាំង សូយ ភេទប្រុសអាយុ ៨ឆ្នាំ រស់នៅភូមិគោកដូង ឃុំគោកដូង ស្រុកអង្គរជុំ ខេត្តសៀមរាប បានស្លាប់នៅមណ្ឌលសុខភាពគោកដូង។
សមត្ថកិច្ចបានកំណត់មុខសញ្ញារកឃើញនិងចាប់បានជនល្មើសដែលជាឃាតករមានឈ្មោះ ឈន់ឈេន អាយុ១៧ឆ្នាំរស់នៅភូមិពង្រថ្មី ឃុំគោកដូង ស្រុកអង្គរជុំ ខេត្តសៀមរាប ហើយបញ្ចូនឃាតកររូបនេះមកកងរាជអាវុធហត្ថខេត្តសៀមរាបនិងកសាងសំនុំរឿងបញ្ចូនបន្ដទៅតុលាការដើម្បីចាត់វិធានការតាមច្បាប់ ចំណែកសាកសពសមត្ថកិច្ចប្រគល់អោយសាច់ញាតិបងប្អូនយកទៅធ្វើបុណ្យតាមប្រពៃណីព្រះពុទ្ធសាសនា៕ប៊ុន រិទ្ធី
