ខេត្តសៀមរាប៖ បុរសម្នាក់បានស្លាប់ភ្លាមៗ ខណៈស៊ីឈ្នួលឡើងត្នោតឲ្យគេ តែមិនប្រយ័ត្នធ្លាក់ពីលើដើមត្នោតស្លាប់តែម្តង។ ករណីនេះ បានកើតឡើងកាលពីវេលាម៉ោង១៤និង៣០នាទី ថ្ងៃទី២៣ ខែមេសា ឆ្នាំ២០២០ នៅចំណុចភូមិគោកចិន ឃុំចាន់ស ស្រុកសូទ្រនិគម ខេត្តសៀមរាប។
សមត្ថកិច្ចនគរបាលស្រុកសូទ្រនិគម បាននិយាយថា ជនរងគ្រោះមានឈ្មោះ ឈឿម ម៉ៅ អាយុ៣៣ឆ្នាំ ទីលំនៅភូមិបឹងជុំ ឃុំត្រពាំងធំ ស្រុកប្រាសាទបាគង ខេត្តសៀមរាប។
សមត្ថកិច្ចបានបន្តថា ៖ ជនរងគ្រោះមកស៊ីឈ្នួលឡើងត្នោតឲ្យគេ នៅភូមិគោកចិន ឃុំចាន់ស ស្រុកសូទ្រនិគម ដោយតម្លៃក្នុង១ដើម៦០០០រៀល ហើយជនរងគ្រោះក៏ជាមនុស្សញៀនស្រាផងដែរ។ នៅពេលឡើងដើមត្នោតហើយ ជនរងគ្រោះមិនប្រយ័ត្នក៏ធ្លាក់ពីលើដើមត្នោតស្លាប់តែម្តង។
សពជនរងគ្រោះបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ហេង សូរិយា
