ភ្នំពេញ ៖បុរសម្នាក់រងរបួសធ្ងន់ត្រូវបញ្ជូនទៅមន្ទីរពេទ្យភ្លាមៗខណៈជួបគ្រោះថ្នាក៎ចរាចរណ៍បង្កឡើងដោយអ្នកបើករថយន្តក្រឡុកស៊ីម៉ងត៍ធុនធំខ្វះការប្រុងប្រយ័ត្នបើកបុកពីក្រោយ។
គ្រោះថ្នាក់ចរាចរណ៍នេះបានកើតឡើងនៅវេលាម៉ោង១០ ព្រឹកថ្ងៃទី ០៥ ខែឧសភាឆ្នាំ ២០២០ តាមបណ្ដោយផ្លូវ ៣០ ម៉ែត្រក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តក្រឡុកស៊ីម៉ងត៍ធុនធំមួយគ្រឿងម៉ាកហ៊ីយ៉ាន់ដាយពណ៌សពាក់ស្លាកលេខភ្នំពេញ 3C -3622 បើកបរដោយបុរសម្នាក់ក្នុងទិសដៅពីត្បូងទៅជើង លុះមកដល់ចំណុចកើតហេតុត្រង់ផ្លូវបែកជាបួនអ្នកបើកបរបានបើកជែងជាមួយនឹងរថយន្តមួយគ្រឿងទៀតក៏រេចង្កូតទៅបុកម៉ូតូសណ្ដោងរឺុម៉កដឹកប្រេងចំពីចំហៀងដែលបើកបរស្របទិសគ្នា រួចបន្តជ្រុលទៅបុកម៉ូតូកង់បីមួយគ្រឿងទៀតដែលប្រុងបើកឆ្លងផ្លូវបណ្ដាលឱ្យអ្នកបើកបរម៉ូតូសណ្ដោងរ៉ឺម៉កដឹកប្រេងរងរបួសធ្ងន់ត្រូវបានបញ្ជូនទៅមន្ទីរពេទ្យភ្លាមៗ ហើយរថយន្តមិនទាន់អស់ល្បឿនក៏ជ្រុលទៅបុកជាមួយនឹងពំនូកដីដែលនៅលើផ្លូវទើបទៅមុខលែងរួច ចំណែកឯអ្នកបើកបររថយន្តបង្កចុះរត់គេចខ្លួនបាត់ស្រមោល។
ក្រោយកើតហេតុសមត្ថកិច្ចមូលដ្ឋានបានមកដល់រួចទំនាក់ទំនងទៅសមត្ថកិច្ចជំនាញចរាចរណ៍ផ្លូវគោករាជធានីភ្នំពេញមកធ្វើការវាស់វែងយករថយន្តបង្កនិងម៉ូតូជនរងគ្រោះទៅរក្សាទុករង់ចាំធ្វើការដោះស្រាយគ្នានៅពេលក្រោយតាមផ្លូវច្បាប់៕ ដោយ៖ ចន្ទ លីហ្សា
ដោយ៖ ចន្ទ លីហ្សា
