ភ្នំពេញ៖ កម្លាំងព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញសហការជាមួយព្រហ្មទណ្ឌកខណ្ឌចំការមនឃាត់ខ្លួនជនសង្ស័យ២នាក់បន្ទាប់ពីធ្វើសកម្មភាពឆក់កាបូបពីបុរសជនជាតិចិនម្នាក់បានសម្រេចហើយ តែត្រូវសមត្ថកិច្ចដកកាំភ្លើងបាញ់២គ្រាប់ឡើងលើគម្រាម ទើបចាប់បាន។
ហេតុការណ៍កើតឡើងកាលវេលាម៉ោង៤ និង២០នាទី ថ្ងៃទី១៩ ខែមករា ឆ្នាំ២០១៦នៅតាមបណ្ដោយផ្លូវលេខ៥១កែងផ្លូវលេខ៣១០ ក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ ។
ជនសង្ស័យទី១មានឈ្មោះ សុខ ចំរើនអាយុ២៧ឆ្នាំ មុខរបរនិងស្នាកនៅមិនពិតប្រាកដជនសង្ស័យទី២មានឈ្មោះ ហេង ដារា៉ អាយុ២២ឆ្នាំ មុខរបរនិងស្នាកនៅមិនពិតប្រាកដ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុបុរសម្នាក់ជាជនជាតិចិនបានជិះម៉ូតូកង់បី មួយគ្រឿង ពណ៌ក្រហម ធ្វើដំណើរតាមបណ្ដោយផ្លូវព្រះសីហនុ ទិសដៅពីកើតទៅលិច ស្រាប់តែមកដល់ចំណុចកើតហេតុក៏មានជនសង្ស័យ២នាក់ជិះម៉ូតូមួយគ្រឿងម៉ាកហុងដាBeAt អត់ពាក់ស្លាកលេខបានធ្វើសកម្មភាពជិះម៉ូតូមកអែបជិះរួចឆក់យកការបូបពីរងគ្រោះបានសម្រេច ។ភ្លាមៗនោះក៏ត្រូវបានកម្លាំងព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញសហការជាមួយព្រហ្មទណ្ឌកខណ្ឌចំការមនក៏បានធ្វើដេញតាមពីក្រោយរហូតមកដល់ចំណុចផ្លូវលេខ៥១កែង ផ្លូវលេខ៣១០ទើបសមត្ថកិច្ចបានដកកាំភ្លើងបាញ់២គ្រាប់ឡើងលើគម្រាមជនសង្ស័យ ទើបឃាត់ខ្លួនបានជនសង្ស័យទាំង២នាក់ភ្លាមៗ។
បច្ចុប្បន្នជនសង្ស័យត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ចាប់បានយ៉ាងជាក់ស្តែង កសាងសំនុំរឿងទៅតាមនីតិវិធីច្បាប់៕
ដោយ៖ ស រស្មី
