ខេត្តត្បូងឃ្មំុ៖ កម្លាំងការិយាល័យប្រឆាំងគ្រឿងញៀន សហការជាមួយអធិការដ្ឋាននគរបាលស្រុកមេមត់ បានចុះអនុវត្តដីកា លើមុខសញ្ញាម្នាក់ ឈ្មោះ ឈុំ ចាន់ថូ ភេទប្រុស អាយុ៣៣ឆ្នាំ ជាតិខ្មែរ នៅភូមិកណ្តោល ឃុំកណ្តោលជ្រុំ ស្រុកពញាក្រែក កាលពីវេលាម៉ោង១០,៤៥នាទី ថ្ងៃទី ១៩ ខែមករា ឆ្នាំ២០១៦ ស្ថិតនៅភូមិកំបាស់ ឃុំមេមត់ ស្រុកមេមត់។
ដោយផ្អែកតាមដីកាលេខ១២ ចុះថ្ងៃទី០៧ ខែតុលា ឆ្នាំ២០១៥ របស់លោក ឈិត វិនា ចៅក្រមស៊ើបសួរសាលាដំបូងខេត្តត្បូងឃ្មុំ ពីបទចោទ រក្សាទុក ជូញដូរ សារធាតុញៀនដោយខុសច្បាប់ ដែលប្រព្រឹត្តទៅ កាលពីថ្ងៃទី០៩ ខែសីហា ឆ្នាំ២០១៥ នៅចំណុចភូមិ-ឃុំខាងលើ។
សម្មត្ថកិច្ចបានឲ្យដឹងថា នៅពេលឃាត់ខ្លួនជំនាញបានឆែកឆេររកឃើញប្រភេទម្សៅក្រាមពណ៌សថ្លា សង្ស័យជាថ្នាំញៀនចំនួន ០៥កញ្ចប់ (តូច០១កញ្ចប់)។ ហើយបន្ទាប់មកដោយមានការឯកភាពពីព្រះរាជអាជ្ញា អមសាលាដំបូងខេត្តត្បូងឃ្មុំ ក៏បន្តឆែកឆេរលំនៅឋានរបស់ជនសង្ស័យ ចំនួន២នាក់ទៀត ១-ឈ្មោះ ហុង ប្រុស ភេទប្រុស អាយុ៥១ឆ្នាំ រស់នៅភូមិកំបាស់ ឃុំមេមង ស្រុកមេមត់, ២-ឈ្មោះ ម៉ាត់ វិន ភេទប្រុស អាយុ២៦ឆ្នាំ ខ្មែរឥស្លាម រស់នៅភូមិថ្មី ឃុំពពេល ស្រុកពញាក្រែក ក្នុងនោះរកឃើញជញ្ជីងអេឡិចត្រូនិច ០១គ្រឿង ប្រាក់ដុល្លាក្លែងក្រែង ១០០$ ចំនួន ០២សន្លឹក ឧបករណ៍សម្រាប់ប្រើប្រាស់គ្រឿងញៀនមួយចំនួន។
បច្ចុប្បន្នជនសង្ស័យទាំង០៣នាក់ ត្រូវបាននាំខ្លួននៅអធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅតុលាការ៕
ដោយ៖ វណ្ណះ
