អាមេរិក ៖ ក្រោយករណីស្លាប់របស់ George Floyd ជាជនជាតិអាមេរិកស្បែកខ្មៅ និងបន្ទាប់ពីគេមើលឃើញថា នាយកដ្ឋានប៉ូលីសក្រុងMinneapolis មិនដែលធ្វើកំណែទម្រង់ណាមួយឡើយ ។ ទើបនៅថ្ងៃទី៧ ខែមិថុនាក្រុមប្រឹក្សាក្រុង Minneapolis បានយល់ព្រមសម្រេចរំលាយ នាយកដ្ឋានប៉ូលីសនៅក្នុងក្រុង Minneapolis ចោលតែម្តង ដើម្បីធ្វើកំណែទម្រង់ឡើងវិញ ។
តាមរយៈកិច្ចប្រជុំនៅថ្ងៃទី៧ ខែមិថុនា ក្រុមប្រឹក្សាភិបាល បានបោះឆ្នោតក្នុងសម្លេងភាគច្រើន ដើម្បីបញ្ចប់ប្រព័ន្ធប៉ូលីសក្រុង Minneapolis ចោល និងធ្វើកំណែទម្រង់សារឡើងវិញ។ នេះបើតាមការបញ្ជាក់របស់លោកស្រី Alondra Cano សមាជិកក្រុមប្រឹក្សាក្រុងនៅលើបណ្តាញសង្គម Twitter របស់ខ្លួន។ ចំណែកក្រុង Minneapolis ដែលជាទីចាប់ផ្ដើមការតវ៉ា អាជ្ញាធរក្រុងនេះ បានចេញវិធានការ ជាបន្តបន្ទាប់ ដើម្បីស្តារកេរ្តិ៍ឈ្មោះរបស់ខ្លួន និងបន្ថយកំហឹងរបស់ក្រុមបាតុករ។
ការរំលាយអង្គភាពប៉ូលីសនៅក្នុងក្រុង Minneapolis មានគោលដៅរៀបចំគំរូសុវត្ថិភាពសាធារណៈថ្មី។ ប្រាប់សារព័ត៌មាន CNN ប្រធានក្រុមប្រឹក្សាក្រុង Minneapolis លោកស្រី Lisa Bender បានលើកឡើងយ៉ាងដូច្នេះថា៖ « យើងបានប្តេជ្ញារំលាយនាយកដ្ឋានប៉ូលិសនៅក្នុងក្រុងចោល និងធ្វើកំណែទម្រង់វាឡើងវិញ ដោយមានភ្ជាប់ជាមួយគំរូថ្មីនៃសុវត្ថិភាពសាធារណៈ ដែលអាចការពារសុវត្ថិភាពរបស់សហគមន៍បាន»។ យ៉ាងណាក៏ដោយ លោកស្រី Cano មិនបានបញ្ជាក់ឲ្យបានច្បាស់លាស់នៅឡើយទេ ជុំវិញការរំលាយនាយកដ្ឋានប៉ូលិសក្រុងនេះនិងគំរូថ្មីនៃសុវត្ថិភាពសាធារណៈ។
គួរបញ្ជាក់ថា ករណីស្លាប់របស់លោក George Floyd ដោយសារតែប៉ូលីសស្បែកស សង្កត់ក នៅក្នុងទីក្រុង Minneapolis បានបង្កឲ្យមានបាតុកម្មទ្រង់ទ្រាយធំជាច្រើនកន្លែងនៅក្នុងអាមេរិក និងបាតុកម្មនៅតាមបណ្តាប្រទេសមួយចំនួនដូចជា អង់គ្លេស បារាំង ដើម្បីទាមទារយុត្តិធម៌សម្រាប់លោក Floyd និងជនរងគ្រោះស្បែកខ្មៅផ្សេងទៀត និងបញ្ឈប់សកម្មភាពការរើសអើសពូជសាសន៍។
នាពេលកន្លងមកអាជ្ញាធរក្រុងនៃរដ្ឋ Minnesota ក៏បានចេញសេចក្តីសម្រេចហាមមិនឲ្យប៉ូលីសក្រុង Minneapolis ប្រើប្រាស់វិធានការរឹតកឬសង្កត់ក ជនសង្ស័យ ដែលបានប្រព្រឹត្តបទល្មើសឡើយ ហើយសេចក្តីសម្រេចនេះ ក៏ផ្តល់សិទ្ធិឲ្យមន្ត្រីក្រុងរាយការណ៍ពីសកម្មភាពរបស់ប៉ូលីសផងដែរ ប្រសិនបើប៉ូលិសក្រុងធ្វើសកម្មភាពរឹតក។
តាមការចុះផ្សាយរបស់សារព័ត៌មាន NBC ប៉ូលីសក្រុង Minneapolis បានប្រើប្រាស់វិធានការរឹតកជនសង្ស័យ ដែលបានប្រព្រឹត្តបទល្មើសរហូតដល់ ២៣៧ដងឯណោះ បើគិតចាប់ពីឆ្នាំ២០១៥កន្លងមក។ ដោយមនុស្ស ៤៤នាក់ ត្រូវបានគេរកឃើញថា មានស្ថានភាពមិនប្រក្រតីបន្ទាប់ពីប៉ូលីសប្រើប្រាស់វិធានការទាំងនោះ៕ ដោយ៖ស តារា
