ភ្នំពេញ៖ បន្ទាប់ពីបែកធ្លាយវីដេអូកាម៉ារ៉ាសុវត្ថិភាព នៅថ្ងៃទី១០ ខែមិថុនា ឆ្នាំ២០២០ អំពីសកម្មភាពថៅកែហាងផឹកស៊ីយីហោ(ធារ៉ា)បានឈ្លោះគ្នាប្តីប្រពន្ធ ហើយបុគ្គលិករបស់ខ្លួនបានចូលទៅឃាត់កុំឲ្យមានការឈ្លោះប្រកែកគ្នា ។ ប៉ុន្តែបែរជាថៅកែហាងនោះ បានប្រើអំពើហិង្សាទះកំផ្លៀងប្រពន្ធនិងវ៉ៃកូនចៅម្នាក់ បណ្តាលឲ្យរងរបួសធ្ងន់រហូតដួលសន្លប់ស្តូកស្តឹង ។ រួចមកបានធ្វើឲ្យអ្នកលេងតាមបណ្ដាញសង្គមហ្វេសប៊ុកនាំគ្នាយកទៅបង្ហោះតៗគ្នា បង្កការភ្ញាក់ផ្អើលយ៉ាងខ្លាំងដល់មហាជន និងកម្លាំងសមត្ថកិច្ចនគរបាលប៉ុស្តិ៍វត្តភ្នំ បានចុះទៅនាំខ្លួនថៅកែរូបនោះយកមកសាកសួរ ដើម្បីចាត់ការតាមច្បាប់ ។
តាមប្រភពព័ត៍មានពីលោក អ៊ុន សំអាត នាយប៉ុស្តិ៍នគរបាលរដ្ឋបាលវត្តភ្នំ បានប្រាប់ឲ្យដឹងនៅល្ងាចថ្ងៃទី១០ ខែមិថុនា ឆ្នាំ២០២០នេះថា ជនដៃដល់ជាថៅកែភោជនីយដ្ឋាន «ធារ៉ា» មានឈ្មោះថា កាន់ វុទ្ធី អាយុជាង៤០ឆ្នាំ ត្រូវបានឃាត់ខ្លួនបញ្ជូនទៅអធិការដ្ឋាននគរបាលខណ្ឌដូនពេញ ពាក់ព័ន្ធករណីហិង្សាដោយចេតនាមានស្ថានទម្ងន់ទោស ដែលប្រព្រឹត្តឡើងកាលពីថ្ងៃទី៦ ខែមិថុនា ឆ្នាំ២០២០ វេលាម៉ោង១១និង៣៥នាទីយប់ នៅចំណុចភោជនីយដ្ឋាន «ធារ៉ា» សង្កាត់វត្តភ្នំ ខណ្ឌដូនពេញ ។
ដោយឡែកជនរងគ្រោះឈ្មោះ សុត សុភ័ក្រ ជាមេការភោជនីយដ្ឋាន «ធារ៉ា» ត្រូវបានថៅកែប្រើអំពើហិង្សាយ៉ាងព្រៃផ្សៃ និងត្រូវបណ្តេញចេញពីការងារថែមទៀតនោះ ក៏បានឲ្យដឹងថា គាត់បានសម្រេចចិត្តដាក់ពាក្យបណ្តឹងចូលព្រះរាជអាជ្ញាអមសាលាដំបូងរាជធានីភ្នំពេញរួចរាល់ហើយ ពីបទហិង្សាដោយចេតនាមានស្ថានទម្ងន់ទោស ។
គួរបញ្ជាក់ថា ក្នុងសកម្មភាពឈ្លីបវីដេអូមួយ បានបង្ហាញឲ្យឃើញថា ដំបូងឡើយគេពុំបានដឹងថា លោកត្រូវជាប្ដីរបស់ថៅកែស្រីឈ្មោះធារ៉ា ដោយមិនដឹងមានរឿងអ្វីទេហើយ មកពីទីណានោះទេ គឺពេលដែលដើរឆ្លងផ្លូវពីទិសម្ខាងមក ហាក់ដូចជាស្រវឹងនឹងនិយាយទូរស័ព្ទផង ពេលដែលមកដល់តុប្រពន្ធគិតលុយក៏ចាប់ផ្តើមទាញកែវទាញចានរួមនឹងប្រអប់ក្រដាសបោកលើតុ ពេលនោះប្រពន្ធដែលជាថៅកែស្រីស្ទុះងើបឡើង ក៏ត្រូវលោកថៅកែប្រុសនោះទះកំផ្លៀង១ដៃ។ ដោយឃើញដូច្នេះកូនចៅ២នាក់ប្រុសៗ ដែលជាបុគ្គលិកនៅហាងនោះ បានស្ទុះរត់មកចាប់ឃាត់ ក៏ត្រូវលោកថៅកែប្រុសរូបនោះស្ទុះវ៉ៃ និងរួមទាំងយកកូនចានចង្កឹះគប់ចំថ្គាមបុគ្គលិកប្រុសម្នាក់ ក្នុងចំណោម២នាក់នោះ បណ្តាលឲ្យដួលសន្លប់នៅក្បែរតុ ទើបលោកថៅកែប្រុសរូបនោះ ដើរទៅទាត់ធាក់គ្នាកំពុងសន្លប់នោះថែមទៀត។
ក្រោយមកទៀតនោះ គឺថៅកែស្រីដែលជាប្រពន្ធនោះខំកៀសប្តីចេញ ដើម្បីកុំឲ្យស្ទុះទាត់ធាក់បុគ្គលិកដែលកំពុងសន្លប់នោះថែមទៀត ក៏ត្រូវប្តីរូបនោះទះមួយកំផ្លៀងថែមទៀត ទើបប្រពន្ធបានពោលពាក្យថាកុំមករញ៉េរញ៉ៃកន្លែងនេះ គ្មានសិទ្ធិទេ។ តែលោកប្តីក៏បានជេរប្រពន្ធថែមទៀត ពេលនោះប្តីហាក់ដូចជារំសាយកំហឹងបន្តិចហើយ ក៏បានស្រែកគំរាមទៅបុគ្គលិករងគ្រោះទាំងនោះថា ពួកហ្អែងមិនត្រូវចេះដឹងរឿងប្តីប្រពន្ធអញឈ្លោះគ្នានោះទេ ។
បច្ចុប្បន្នជនដៃដល់ ត្រូវបានកម្លាំងនគរបាលព្រហ្មទណ្ឌខណ្ឌដូនពេញ ឃាត់ខ្លួនបណ្ដោះអាសន្ននៅអធិការដ្ឋានខណ្ឌ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ៕ដោយ៖អឿន ភារ៉ា និង និន សុភ័ស្ភ
