ភ្នំពេញ៖ លោក សាយ ណូរ៉ា តំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី ២៥ ខែមិថុនា ឆ្នាំ២០២០កន្លងទៅ បានចេញដីកាកោះហៅមនុស្សទាំង ៤នាក់ក្នុងករណីខាងលើឲ្យចូលខ្លួនទៅបំភ្លឺនៅសាលាដំបូងរាជធានីភ្នំពេញី ដើម្បីបំភ្លឺពីដំណើររឿងបណ្ដឹងរបស់លោកមេធាវី ផែង ស៊ីដេត ចុះថ្ងៃទី១៧ ខែមិថុនា ឆ្នាំ២០២០ ពីបទប្រើប្រាស់អំពើហិង្សា និងក្លែងបន្លំឯកសារសាធារណៈ។
តំណាងអយ្យការអមសាលាដំបូងរាជធានីភ្នំពេញរូបនោះ បានបញ្ជាក់ថា មនុស្សទាំង ៤នាក់ ដែលត្រូវចេញដីកាកោះហៅក្នុងនោះមានលោកចៅសង្កាត់ត្រពាំងក្រសាំង និងលោកចៅសង្កាត់រង ខណ្ឌពោធិ៍សែនជ័យ ព្រមទាំងមនុស្ស២នាក់ទៀត ក្នុងនោះម្នាក់មានតួនាទីជាអនុប្រធានភូមិក្រាំង ប្រើប្រាស់អំពើហិង្សា លួចលក់អចលនវត្ថុអ្នកដទៃ ប្រើប្រាស់ឯកសារសាធារណៈក្លែង និងក្លែងបន្លំឯកសារសាធារណៈដែលសង្ស័យថាផ្ដើមចេញពីរឿងទំនាស់ដីធ្លី។
លោក សាយ ណូរ៉ា បន្តថា អ្នកទាំង៤នាក់នេះ ទី១,ឈ្មោះ ហ៊ត រដ្ឋា ភេទប្រុស ជាចៅសង្កាត់ត្រពាំងក្រសាំង ខណ្ឌពោធិ៍សែនជ័យ (ជាសាក្សី) ឲ្យចូលខ្លួនទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី៩ ខែកក្កដា ឆ្នាំ២០២០ វេលាម៉ោង២និង៣០នាទីរសៀល។ ទី២,ឈ្មោះ ស៊ឹម ភូន ភេទប្រុស អាយុ៥៨ឆ្នាំ ជាចៅសង្កាត់រងសង្កាត់ត្រពាំងក្រសាំង មានទីលំនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ (ជាជនសង្ស័យ) ឲ្យចូលខ្លួនទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី៦ ខែកក្កដា ឆ្នាំ២០២០ វេលាម៉ោង២និង៣០នាទីរសៀល។ ទី៣, ឈ្មោះ ញ៉េង ចយ ភេទប្រុស អាយុ៥៩ឆ្នាំ មានទីលំនៅភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យរាជធានីភ្នំពេញ (ជាជនសង្ស័យ) ឲ្យចូលខ្លួនទៅកាន់អយ្យការអមសាលាដំបូង រាជធានីភ្នំពេញ នៅថ្ងៃទី៨ ខែកក្កដា ឆ្នាំ២០២០ វេលាម៉ោង១០និង៣០នាទីព្រឹក។ អ្នកទាំ៣ ត្រូវចូលខ្លួនទៅដើម្បីបំភ្លឺពីដំណើររឿងបណ្ដឹងរបស់លោកមេធាវី ផែង ស៊ីដេត ចុះថ្ងៃទី១៧ ខែមិថុនា ឆ្នាំ២០២០ដែលបានចោទពីបទប្រើប្រាស់ហិង្សាលើអ្នកកាន់កាប់អចលនវត្ថុដោយសុច្ចរិត, ធ្វើឲ្យខូចខាតដោយចេតនា, លួចលក់អចលនវត្ថុអ្នកដទៃនិងបទប្រើប្រាស់ឯកសារសាធារណៈក្លែង។
ចំណែកទី៤, ឈ្មោះ សួន សុខេន ភេទប្រុស ជាអនុប្រធានភូមិក្រាំងមានទីលំនៅភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យរាជធានីភ្នំពេញ (ជាជនសង្ស័យ) ឲ្យចូលខ្លួនទៅកាន់អយ្យការ អមសាលាដំបូងរាជធានីភ្នំពេញ នៅថ្ងៃទី៦ ខែកក្កដា ឆ្នាំ២០២០ វេលាម៉ោង៣និង៣០នាទីរសៀល ដើម្បីបំភ្លឺពីដំណើររឿងបណ្ដឹងរបស់លោកមេធាវី ផែង ស៊ីដេត ចុះថ្ងៃទី១៧ ខែមិថុនា ឆ្នាំ២០២០ ពីបទក្លែងបន្លំឯកសារសាធារណៈ ។
ដោយឡែកពាក់ព័ន្ធករណីខាងលើនេះ អង្គភាពនគរដ្រេហ្គន បានទូរស័ព្ទ សុំការបំភ្លឺពីលោក ហ៊ត រដ្ឋា ចៅសង្កាត់ត្រពាំងក្រសាំង ខណ្ឌពោធិ៍សែនជ័យ (ជាសាក្សី) កាលពីល្ងាចថ្ងៃទី៣ ខែកក្កដា ឆ្នាំ២០២០នេះ លោកបានបញ្ជាក់ថា លោកនិងចូលខ្លួនទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី៩ ខែកក្កដាខាងមុននេះ តាមពេលកំណត់ ។ ចំណែករឿងផ្សេងទៀតគាត់សុំមិននិយាយ ៕ ដោយ៖សុខា សែនជ័យ
