ភ្នំពេញ៖ បន្ទាប់ពីរាជរដ្ឋាភិបាលកម្ពុជា បានសម្រេចឲ្យឈប់សម្រាករយៈពេល៥ថ្ងៃ គិតចាប់ពីថ្ងៃទី១៧ដល់ថ្ងៃទី២១ ខែកក្កដា ខាងមុខនេះសម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានក្រើនរំលឹកដល់អភិបាលរាជធានី-ខេត្តទាំងអស់ ឲ្យពង្រឹងវិធានការពារសន្តិសុខ និងវិធានការទប់ស្កាត់កូវីដ-១៩ តាមសហគមន៍ ។ ការថ្លែងបែបនេះ សម្ដេច ស ខេង បានធ្វើឡើងនៅថ្ងៃទី២៧ ខែកក្កដាថ្មីៗនេះ ដោយគូសបញ្ជាក់ថា វិធានការដែលត្រូវពង្រឹងនោះ ដូចជា៖ សន្តិសុខ សណ្ដាប់ធ្នាប់ គម្លាតសង្គម អនាម័យ វាស់កម្ដៅ ដោយផ្ដោតនៅតាមផ្សារភោជនីយដ្ឋាន រមណីយដ្ឋាន សណ្ឋាគារ និង ផ្ទះសំណាក់ ជាដើម។
សម្ដេចក្រឡាហោម បានថ្លែងទៀតថា ដើម្បីរក្សាការពារសន្តិសុខ និងចូលរួមទប់ស្កាត់ការឆ្លងជំងឺកូវីដ-១៩ នៅថ្ងៃឈប់សម្រាកខាងមុខនេះលោកបានស្នើឲ្យអភិបាលរាជធានី-ខេត្ត ពង្រឹងសន្តិសុខ សណ្ដាប់ធ្នាប់សាធារណៈ សម្រាប់ឆ្លើយតបតម្រូវការរបស់ពលរដ្ឋឲ្យទាន់ពេលវេលា និងវិធានការទប់ស្កាត់ការរីករាលដាលកូវីដ-១៩។ លើសពីនេះទៅទៀត អភិបាលខេត្តត្រូវណែនាំឲ្យម្ចាស់សណ្ឋាគារ ផ្ទះសំណាក់រមណីយដ្ឋាន អាហារដ្ឋាន ផ្សារលក់ទំនិញ ត្រៀមលក្ខណសម្បត្តិក្នុងទទួលភ្ញៀវទេសចរ ដែលតម្រូវឲ្យមានទឹកអាល់កុលឬជែលលាងដៃវាស់កម្ដៅ និងរក្សាគម្លាតសុវត្ថិភាពដល់អតិថិជន។
ជាមួយគ្នានេះដែរ សម្ដេចក្រឡាហោម បានណែនាំឲ្យជំរុញអាជ្ញាធរមូលដ្ឋាន ឲ្យផ្សព្វផ្សាយដល់ពលររដ្ឋតាមមូលដ្ឋានពីការបង្កើនការប្រុងប្រយ័ត្នការពារខ្លួនពីជំងឺកូវីដ-១៩ ដោយគោរពតាមគោលការរក្សាអនាម័យនិងគម្លាតសុវត្ថិភាព។
ដោយឡែករដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃទី២៧ ខែកក្កដាកន្លងទៅ ក៏បានចេញលិខិតទៅកាន់រដ្ឋមន្ត្រីក្រសួងសាធារណការ និងដឹកជញ្ជូន រដ្ឋមន្ត្រីក្រសួងទេសចរណ៍ និងអភិបាលរាជធានី-ខេត្តផងដែរ ដើម្បីស្នើឲ្យចូលរួមអនុវត្តវិធានការរបស់ក្រសួងសុខាភិបាល ក្នុងការការពារជំងឺកូវីដ-១៩។
គួរបញ្ជាក់ថា ចំពោះការធ្វើដំណើររបស់ពលរដ្ឋទាំងអស់ ត្រូវជៀសវាងការប្រើប្រាស់មធ្យោបាយសាធារណៈ ដែលផ្ទុកមនុស្សច្រើន។ បើករណីចាំបាច់ ក្នុងការធ្វើដំណើរ ត្រូវពាក់ម៉ាស់ ដាក់ទឹកអាល់កុលឬជែលលាងដៃតាមខ្លួន ហើយរក្សាគម្លាតពីគ្នាយ៉ាងតិច១ម៉ែត្រកន្លះ។ចំណែកម្ចាស់យានយន្តត្រូវ ត្រូវរៀបចំរថយន្តឲ្យមានខ្យល់ចេញចូល ជៀសវាងប្រើម៉ាស៊ីនត្រជាក់ និងលាងសម្អាត់រថយន្តឲ្យបានជាប្រចាំផងដែរ ៕ដោយ៖ស តារា
