អន្តរជាតិ៖ លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានចោទទីក្រុងប៉េកាំងថា ការណ៍ដែលរដ្ឋាភិបាលចិន រិះគន់ការរើសអើងពូជសាសន៍នៅអាមេរិក គឺជាការញុះញង់ឲ្យមានការតវ៉ាកាន់តែខ្លាំងនៅអាមេរិកតែម្ដង។
ជាក់ស្តែងនៅថ្ងៃទី២៣ ខែកញ្ញាថ្មីៗនេះ រដ្ឋមន្ត្រីការបរទេសអាមេរិករូបនេះ បានប្រាប់សមាជិកសភានៃរដ្ឋ Wisconsin ថា៖ រដ្ឋាភិបាលចិន បានអុជអាលឲ្យមានអំពើហិង្សាពូជសាសន៍នៅអាមេរិក។ បន្ថែមពីនេះលោក ប៉ុមប៉េអូ បានយោងលើហេតុផលថា ចិនបានរិះគន់ការរើសអើងពូជសាសន៍អាមេរិក អំឡុងពេលបាតុកម្មស្ទើរពេញទឹកដីអាមេរិកកាលពីប៉ុន្មានខែមុន។
ជាមួយគ្នាលោក ប៉ុមប៉េអូ នៅចំពោះមុខសមាជិកសភានាជំនួបក្នុងទីក្រុង Madison ក៏បានលើកឡើងថា បក្សកុម្មុយនីស្តចិនចង់ឲ្យប្រជាជនអាមេរិកទាមទាររកការទទួលខុសត្រូវតាមរយៈការការស្រែករិះគន់ការរើសអើងពូជសាសន៍។ លោកបន្តថា ចិនចង់ញុះញង់ឲ្យមានការតវ៉ាដែលធ្លាប់មាន Minneapolis Portland និង Kenosha ដែរ។ ទីក្រុងទាំងបីនេះ សុទ្ធសឹងជួបរលកតវ៉ាពីសំណាក់ពលរដ្ឋអាមេរិកស្បែកខ្មៅដែលប្រឆាំងអំពើហិង្សារបស់ប៉ូលិសស្បែកស។
បើតាមទីភ្នាក់ងារព័ត៌មាន AFP ដកស្រង់សម្តីប្រមុខការទូតអាមេរិករូបនេះ បានសង្កត់ធ្ងន់ថា៖«វាគួរឲ្យរអើម។ យើងមិនអាចឲ្យរឿងនេះកើតឡើងឡើយ»។
សូមជម្រាបថា ខណៈដែលប្រទេចិន និងសហរដ្ឋអាមេរិកទាស់គ្នាលើរឿងជាច្រើន ហើយជាញឹកញាប់អាមេរិករិះគន់ រដ្ឋាភិបាលចិន ខ្លាំងរឿងសិទ្ធិមនុស្សនោះ វាអាចជារឿងមិនធម្មតាមួយ នៅពេលដែលមន្ត្រីជាន់ខ្ពស់អាមេរិករុញកំហុសលើចិនលើការតវ៉ាក្នុងស្រុករបស់ខ្លួន។ជាក់ស្តែងអំឡុងពេលបាតុកម្មនេះ ប្រព័ន្ធផ្សព្វផ្សាយចិន ក៏បានរាយការណ៍មិនដាច់ពីការតវ៉ារបស់ក្រុមស្បែកខ្មៅ ដែលទំនងចង់បង្ហាញពីស្ថានភាពរើសអើងពូជសាសន៍នៅអាមេរិក។ ការស្លាប់របស់បុរសស្បែកខ្មៅ George Floyd បានដុតបញ្ឆេះឲ្យមានការតវ៉ានៅអាមេរិក ទោះជំងឺ COVID-19 កំពុងរាតត្បាតក្ដី។
គួរបញ្ជាក់ថា រដ្ឋមន្ត្រីការបរទេសអាមេរិកលោក ប៉ុមប៉េអូ ក៏បានលើកឡើងពីសំបុត្រមួយច្បាប់របស់ស្ថានទូតចិនផ្ញើឲ្យសមាជិកសភារដ្ឋWisconsin ដែលសរសេរថា ទីក្រុងប៉េកាំង ប្រឆាំងដាច់ខាតការរើសអើងពូជសាសន៍ និងការស្អប់ខ្ពើមលើសហគមន៍ជនជាតិចិននៅអាមេរិកអំឡុងពេលជំងឺ COVID-19 ។ លិខិតនេះ ទំនងចង់សំដៅសម្ដីប្រធានាធិបតី ដូណាល់ ត្រាំ ដែលតែងវីរុសបង្កជំងឺ COVID-19 ថាវីរុសចិន មិនដាច់ពីមាត់៕ដោយ៖ស តារា
