អន្តរជាតិ៖ តាមរយៈកញ្ចក់ទូរទស្សន៍នៅថ្ងៃទី១៩ ខែតុលា លោក រ៉ូឌ្រីហ្គោ ឌូទើតេ ប្រធានាធិបតីហ្វីលីពីន បានបញ្ជាក់ថា បើមានករណីស្លាប់ណាមួយកើតឡើងអំឡុងសង្គ្រាមគ្រឿងញៀន លោកព្រមទទួលខុសត្រូវ ហើយអាចនាំលោកទៅកាន់តុលាការកាត់ទោសបាន។ «ខ្ញុំគ្មានបញ្ហាឡើយ។ បើខ្ញុំបម្រើប្រទេសខ្ញុំដោយចូលដេកគុកនោះ [ខ្ញុំ] រីករាយ»។ នេះបើតាមការចុះផ្សាយដោយទីភ្នាក់ងារព័ត៌មាន AP ។
ប្រធានាធិបតីហ្វីលីពីនរូបនេះ អះអាងបន្ថែមថា លោកព្រមទទួលខុសត្រូវចំពោះករណីស្លាប់ច្រើនពាន់នាក់ ក្រោមយុទ្ធនាការប្រឆាំងគ្រឿងញៀនរបស់លោក។ មិនតែប៉ុណ្ណោះ លោកត្រៀមខ្លួនប្រឈមបទចោទប្រកាន់ ដែលអាចធ្វើឲ្យលោកជាប់គុកផងដែរ តែពុំមែនបទចោទឧក្រិដ្ឋកម្មប្រឆាំងមនុស្សជាតិឡើយ។
លោក ឌូទើតេ ក៏បានប្រកាសថា ករណីសម្លាប់ប្រឆាំងគ្រឿងញៀន ដែលមិនកើតឡើងអំឡុងប្រតិបត្តិការរបស់ប៉ូលីស ពុំគួរទម្លាក់កំហុសមកលើលោកទេ ហើយលោកបន្ថែមថា ការស្លាប់ទាំងនោះ ប្រហែលកើតឡើងដោយសារពួកពាលស៊ីពាលទៅវិញទេ។ ជាក់ស្តែលោក ឌូទើតេ បានចាប់ផ្ដើមយុទ្ធនាការប្រឆាំងគ្រឿងញៀន ក្រោយឡើងកាន់អំណាចក្នុងពាក់កណ្ដាលឆ្នាំ២០១៦មក។ ជនសង្ស័យពាក់ព័ន្ធគ្រឿងញៀនជិត ៦ពាន់នាក់ ត្រូវបានរាយការណ៍ថាត្រូវបានសម្លាប់ដោយប៉ូលីសក្នុងប្រតិបត្តិការនេះ តែខាងអង្គការសិទ្ធិមនុស្សអន្តរជាតិមួយចំនួនអះអាងថា អ្នកស្លាប់មានច្រើនជាងនេះឆ្ងាយណាស់។
ពាក្យបណ្ដឹងចំនួនពីរទាក់ទងឧក្រិដ្ឋកម្មប្រឆាំងមនុស្សជាតិនិងការសម្លាប់រង្គាលក្នុងសង្គ្រាមប្រឆាំងគ្រឿងញៀនរបស់លោក ឌូទើតេ កំពុងស្ថិតក្រោមការត្រួតពិនិត្យរបស់រដ្ឋអាជ្ញាតុលាការព្រហ្មទណ្ឌអន្តរជាតិ (ICC) ។ ការស៊ើបអង្កេតបឋមរបស់ស្ថាប័ន នឹងបើកឈានដល់ការស៊ើបអង្កេតពេញលេញ បើរកឃើញភស្តុតាងគ្រប់គ្រាន់ដើម្បីដាក់បន្ទុកនោះ។
លោក ឌូទើតេ បានឆ្លើយតបនឹងពាក្យបណ្ដឹងទាំងនេះ ដោយដកហូតប្រទេសហ្វីលីពីនចេញពីសាលាក្តីពិភពលោកនេះកាលពី២ឆ្នាំមុន។ទោះបីជាដកខ្លួនចេញមែន រដ្ឋអាជ្ញា ICC លើកឡើងថា ការត្រួតពិនិត្យក្នុងសំណុំរឿងសង្គ្រាមប្រឆាំងគ្រឿងញៀនរបស់លោក ឌូទើតេ នឹងនៅតែបន្តដដែល។
ទោះជាយ៉ាងណាមិញ លោកប្រធានាធិបតីមាត់ឆៅរូបនេះ នៅថ្ងៃទី១៩ ខែតុលា បានសាកសួរទៅកាន់ ICC ថា ហេតុអ្វីបានជាគ្រឿងញៀនក្លាយទៅជាមនុស្សជាតិទៅវិញ? លោក ឌូទើតេ ចាត់ទុកពួកញៀនថ្នាំជាបញ្ហាសន្តិសុខជាតិ និងការគំរាមកំហែងសាធារណៈ ដូចទៅនឹងពួកឧទ្ទាមកុម្មុយនីស្ត ដែលរដ្ឋាភិបាលត្រូវកម្ទេចចោលដូច្នោះដែរ។
លោក ឌូទើតេ លើកឡើងទៀតថា៖«ប្រសិនបើរឿងនេះ [បញ្ហាគ្រឿងញៀន] ត្រូវបានអនុញ្ញាតឲ្យកើតមានបន្ត ហើយប្រសិនបើគ្មានសកម្មភាពណាមួយជាក់លាក់ ត្រូវបានដាក់ចេញប្រឆាំងពួកវាទេនោះ វានឹងបង្កគ្រោះថ្នាក់ដល់សន្តិសុខរដ្ឋ»។
គួរបញ្ជាក់ថា បើយោងតាមតួលេខរបស់ស្ថាប័នប៉ូលីសហ្វីលីពីន ជនសង្ស័យយ៉ាងតិច ៥៨៥៦នាក់ ត្រូវបានសម្លាប់ចោលក្នុងប្រតិប្តតិការឆែកឆេរ ហើយជាង២៥៦ ០០០ នាក់ផ្សេងទៀត ត្រូវបានចាប់ឃាត់ខ្លួន ចាប់តាំងពីប្រកាសសង្គ្រាមប្រឆាំងគ្រឿងញៀនមក។ ក៏ប៉ុន្តែក្រុមសិទ្ធិមនុស្សខ្លះចោទថាអាជ្ញាធររាយការណ៍ករណីស្លាប់ទាបជាងរបាយការណ៍ពិតប្រាកដ៕ដោយ៖ស តារា
