អន្តរជាតិ៖ ដើម្បីបញ្ចប់នូវសម័យកាលដកថយ ក្នុងការចំណាយយោធា ក៏ដូចជា៖ ពង្រឹងតួនាទីអង់គ្លេសលើឆាកអន្តរជាតិ ជាពិសសេក្នុងបរិយាកាសនយោបាយសាកលដែលកាន់តែគ្រោះថ្នាក់ លោក បូរីស ចនសុន នាយករដ្ឋមន្ត្រីអង់គ្លេស កាលពីថ្ងៃទី១៩ វិច្ឆិកាថ្មីៗនេះ បានប្រកាសពីការបង្កើនចំណាយយោធាសម្រាប់រយៈពេល៤ឆ្នាំទៅមុខ។ ចំពោះការបង្កើនចំណាយនេះ ក៏ជាការបញ្ចេញថវិកាច្រើនបំផុតផងដែររាប់ចាប់តាំងពីការចប់ទៅនៃសង្គ្រាមត្រជាក់ផងដែរ។
ជាក់ស្តែងលោក បូរីស ចនសុន នាយករដ្ឋមន្ត្រីអង់គ្លេស ក្រោយការពិនិត្យគោលនយោបាយការបរទេស និងការពារជាតិ បានប្រកាសពីការបង្កើនការចំណាយទឹកប្រាក់២២ពាន់លានដុល្លារ សម្រាប់រយៈពេល៤ឆ្នាំទៅមុខ។ ដោយការចំណាយក្នុងវិស័យការពារជាតិរបស់អង់គ្លេសប្រចាំឆ្នាំ មានប្រមាណ៥៥ពាន់លានដុល្លារ។
បើយោងតាមសារព័ត៌មានReuters បានដកស្រង់ការថ្លែងក្នុងវីដេអូរបស់លោក ចនសុន ទៅកាន់សភាជាន់ទាបអង់គ្លេស បានបញ្ជាក់យ៉ាងដូច្នេះថា៖«សម័យកាលនៃការកាត់បន្ថយចំណាយក្នុងការការពារជាតិត្រូវបញ្ចប់ និងត្រូវបញ្ចប់ពេលនេះ»។ បន្ថែមពីនេះលោក ថាការសម្រេចចិត្តបង្កើនការចំណាយយោធា អំឡុងពេល COVID-19 និងការទាមទារផ្សេងទៀតពីសាធារណៈជន ដោយសារការការពារប្រទេស និងប្រជាជនអង់គ្លេស ត្រូវតែជាអទិភាព។
លោក ចនសុន អះអាងថា គម្រោងដែលកើតចេញពីការបង្កើនចំណាយនេះ នឹងបង្កើតការងារចំនួន១ម៉ឺនកន្លែងផងដែរ។ ព្រោះការបង្កើនចំណាយនេះ រួមមាន៖ ការបង្កើតទីបញ្ជាការអវកាស ភ្នាក់ងារប្រាជ្ញាសិប្បនិម្មិត និងការស្តារឡើងវិញនូវកងទ័ពជើងទឹងអង់គ្លេស។ បន្ថែមពីនេះ កងកម្លាំងសាយប័រនឹងត្រូវបង្កើតឡើងអមជាមួយទីបញ្ជាការអវកាស ដែលនឹងអាចមានសមត្ថភាពក្នុងការបាញ់រ៉ុក្កែតនៅឆ្នាំ២០២២។
យ៉ាងណាក្តី បក្សប្រឆាំងលើកឡើងពីសេចក្តីបារម្ភចំពោះរបៀបចំណាយរបស់រដ្ឋាភិបាល ក្រោយមានការចោទប្រកាន់ថា គម្រោងខ្លះអស់ប្រាក់ច្រើនជ្រុល និងខ្លះទៀតមានមហិច្ឆតាធំហួសមាឌ។ ជាការឆ្លើយតបទៅនឹងការបង្កើនចំណាយនេះ បក្សពលករដែលជាបក្សប្រឆាំង ក៏បានអះអាងថា វាជារឿងដែលត្រូវបានរំពឹងទុកជាយូមកហើយ បន្ទាប់ពីបក្សអភិរក្សនិយមដែលជាបក្សកាន់អំណាចបានកាត់បន្ថយកម្លាំងទ័ពចំនួន២៥ភាគរយ កាលពី១០ឆ្នាំមុន។
បើតាមរដ្ឋមន្ត្រីស្ដីទីក្រសួងការពារជាតិអាមេរិក លោក Christopher Miller អះអាងថា ការបង្កើនចំណាយនេះ បង្ហាញពីការតាំងចិត្តរបស់អង់គ្លេសចំពោះបក្សសម្ព័ន្ធNATO និងសន្តិសុខរួម។ ខណៈដែលអាមេរិក ជាសម្ព័ន្ធមិត្តចម្បងរបស់អង់គ្លេស បានស្វាគមន៍ការបង្កើនចំណាយនេះដែរ។
ដោយឡែក ចំពោះរដ្ឋាភិបាលអង់គ្លេស បានគូសបញ្ជាក់ថា ការបង្កើនចំណាយនេះ នឹងពង្រឹងចំណាត់ថ្នាក់អង់គ្លេសដែលចំណាយថវិកាខ្ពស់បំផុតលំដាប់ទី២បន្ទាប់ពីអាមេរិក ក្នុងក្របខណ្ឌ NATO។ ចំណែកអាមេរិកដែលជាសមាជិក NATO បានទាមទារឲ្យសមាជិកទាំងអស់ ចំណាយយ៉ាងហោចណាស់២ភាគរយនៃផលិតផលសរុបក្នុងស្រុក(ផសស) លើវិស័យការពារជាតិ។ ការបង្កើនចំណាយនេះ នឹងនាំឲ្យអង់គ្លេសបញ្ចេញថវិកា២.២ភាគរយនៃផលិតផលក្នុងស្រុកដែរ។
គួរបញ្ជាក់ថា ស្របពេលជាមួយគ្នានេះ ក៏មានការបារម្ភផងដែរដែលការបង្កើនការចំណាយ នឹងបណ្តាលឲ្យកាត់បន្ថយជំនួយអន្តរជាតិ។ ប៉ុន្តែលោក Ben Wallace រដ្ឋមន្ត្រីការពារជាតិអង់គ្លេស បានប្រាប់ទីភ្នាក់ងារសារព័ត៌មាន Sky News ថា ជំនួយអន្តរជាតិនឹងមិនប៉ះពាល់ឡើយ។លោករដ្ឋមន្ត្រីការពារជាតិអង់គ្លេសរូបនេះ និយាយទៀតថា ការបង្កើនចំណាយនេះមិនបានន័យថា អង់គ្លេសបោះបង់ការផ្តល់ជំនួយអន្តរជាតិឡើយ ដោយអង់គ្លេសនៅតែជាប្រទេសចិត្តល្អក្នុងការផ្តល់ជំនួយដដែល៕ដោយ៖ស តារា
