កាលពីថ្ងៃទី១៨ ខែកុម្ភៈ ឆ្នាំ២០១៦ មនុស្សរាប់ពាន់នាក់បាននាំគ្នាធ្វើបាតុកម្មនៅតាមដងផ្លូវនានា ក្នុងទីក្រុងញូវដេលី ប្រទេសឥណ្ឌាដើម្បីប្រឆាំងចំពោះសកម្មភាពរបស់អាជ្ញាធរប្រទេសនេះ ដែលបានចាប់ខ្លួននិស្សិតម្នាក់ដោយចោទប្រកាន់ពីបទញុះញង់ បង្កឲ្យមានសកម្មភាពប៉ះបោរ ។
ក្រុមបាតុករប្រមាណ៥ពាន់នាក់ ភាគច្រើនជាក្រុមនិស្សិតបានជួបជុំគ្នាធ្វើបាតុកម្មនៅតាមដងផ្លូវនានាក្នុងរដ្ឋធានី ដោយស្រែកពាក្យស្លោកទាមទារឲ្យដោះលែងនិស្សិតឈ្មោះ Kanhaiya Kumar។ ការធ្វើបាតុកម្មរបស់ក្រុមនិស្សិត ទ្រង់ទ្រាយធបែបនេះគេកម្រឃើញកើតមាននៅប្រទេសឥណ្ឌាក្នុងរយៈពេលចុងក្រោយនេះ ។
ប៉ូលិសឥណ្ឌាបានចាប់ខ្លួនប្រធានសហជីពនិស្សិតអាយុ៣២ឆ្នាំប្រចាំនៅសាកលវិទ្យាល័យ Jawaharlal Nehru ដ៏ល្បីល្បាញ់នៅក្នុងទីក្រុងញូវដេលីកាលពីថ្ងៃសុក្រសប្តាហ៍កន្លងមកនេះ បន្ទាប់ពីមានការជួបជុំធ្វើបាតុកម្មដោយស្រែកពាក្យស្លោកប្រឆាំងរដ្ឋអំណាចឥណ្ឌា ។
នៅក្នុងលិខិតមួយច្បាប់ដែលចេញដោយប៉ូលិសនោះ បានបញ្ជាក់ថា លោក Kumar បានបដិសេធន៍ថា លោកមិនបានស្ថិតនៅក្នុងចំណោមអ្នកដែលបានស្រែកពាក្យស្លោកប្រឆាំងរដ្ឋាភិបាលនោះឡើយ ព្រមទាំងថ្កោលទោសដល់សកម្មភាពនោះថែមទៀតផង ។ ប៉ុន្តែទោះបីយ៉ាងណា Kumar បានរិះគន់ជាសាធារណៈទៅលើក្រុមជាតិនិយមជ្រុល ហើយក្រុមបាតុករភាគច្រើនបានមើលឃើញថា ការចាប់ខ្លួនរបស់លោក Kumar នាពេលនេះជាការប៉ុនប៉ងមួយដើម្បីបង្ក្រាបទៅលើក្រុមប្រឆាំង ។
បាតុករមួយរូបឈ្មោះ Avik Devdas បានប្រាប់ប្រភព AFP ថា «យើងទាំងអស់គ្នាមកជួបជុំគ្នាថ្ងៃនេះ គឺដើម្បីសិទ្ធិមនុស្ស និងសិទ្ធិសេរីភាពនៅក្នុងការបញ្ចេញមតិ ។ រដ្ឋាភិបាលមិនអាចលុបបំបាត់ការប្រឆាំងរបស់ប្រជាជន ដោយរុញពួកគេឲ្យចូលពន្ធនាគារនោះឡើយ» ។
ការធ្វើបាតុកម្មកាលពីថ្ងៃទី១៧ ខែកុម្ភៈ ឆ្នាំ២០១៦ កើតឡើងមួយថ្ងៃ ក្រោយពីលោក Kumar បានទទួលរងការវាយប្រហារយ៉ាងខ្លាំងក្លាពីសំណាក់មេធាវីស្តាំនិយម អំឡុងពេលគាត់ត្រូវគ្រៀកទាំងសងខាងដោយប៉ូលិសចូលទៅកាន់បន្ទប់សវនាការ ។ សកម្មភាពបែបនេះបាននាំឲ្យមានការស្នើសុំពីតុលាការកំពូលឲ្យប៉ូលិសធានាសុវត្ថិភាពមួយភាគរយជូនលោក Kumar ។
អ្នកកាសែតដែលផ្សព្វផ្សាយករណីរបស់លោក Kumar ក៏ទទួលរងការវាយប្រហារ ហើយមេធាវីសាលាឧទ្ធរណ៍ម្នាក់ដែលបញ្ជូនឲ្យទៅស៊ើបអង្កេតនោះក៏បានទទួលរងនូវការឆាឆៅ ។ សកម្មភាពទាំងអស់នេះត្រូវគេបរិយាយប្រៀបធៀបទៅនឹងបរិយាកាសមួយនៃអំពើភេរវកម្ម ។
លោក Kumar បន្តជាប់នៅក្នុងពន្ធនាគាររហូតដល់ថ្ងៃទី២ ខែមីនា ឆ្នាំ២០១៦ ប៉ុន្តែមេធាវីរបស់លោកបានស្នើសាលាឧទ្ធរណ៍ឲ្យជួយអន្តរាគមន៍ដោយដោះលែងលោកឲ្យនៅក្រៅឃុំ និងបង់ប្រាក់ធានា ។ សវនាការនេះត្រូវកំណត់ធ្វើឡើងនៅថ្ងៃទី១៩ ខែកុម្ភៈ ។
ក្រុមនិស្សិតជាច្រើនរដ្ឋធានី ក្នុងនោះរួមមានរដ្ឋធានី Chennai, Kolkata និង Bangalore ផងដែរបាននាំគ្នាជួបជុំដង្ហែក្បួងធ្វើបាតុកម្មកាលពីថ្ងៃទី១៨ ខែកុម្ភៈ ដើម្បីបង្ហាញការសាមគ្គីជាមួយលោក Kumar និងជាមួយក្រុម JNU ដែលមានប្រវត្តិលូរលង់មកហើយក្នុងសកម្មភាពប្រកាន់ឆ្វេងនិយមនោះ ៕
ប្រែសម្រួល៖ ថាច់ យ៉ាត
