អន្តរជាតិ៖ បើតាមការប្រកាសរបស់សម្ពន្ធ GAVI ដែលបានផ្ចុងផ្ដើមបង្កើត COVAX បានបញ្ជាក់ថា កូរ៉េខាងជើង ដែលនៅតែអះអាងថា ប្រទេសមួយនេះ គ្មានករណីឆ្លងកូវីដ-១៩ សូម្បីមួយករណីនោះទេ មិនតែប៉ុណ្ណោះ ក៏បានស្នើសុំវ៉ាក់សាំងពីយន្តការ COVAX ដែរ។ ខណៈកូរ៉េខាងជើង រំពឹងអាចទទួលបានវ៉ាក់សាំង AstraZeneca-Oxford ជិត២លានដូសនៅដើមឆ្នាំ២០២១នេះ ដែលបរិមាណនេះមិនខុសគ្នាប៉ុន្មានឡើយពីប្រទេសជាច្រើនទៀតដែលត្រូវទទួលវ៉ាក់សាំងដែរនោះ។
ជាក់ស្តែងក្នុងការប្រកាសរបស់ GAVI នៅថ្ងៃទី៣ ខែកុម្ភៈថ្មីៗនេះ វ៉ាក់សាំងនេះ ត្រូវការការយល់ព្រមឱ្យប្រើប្រាស់បន្ទាន់ពីសំណាក់អង្គការសុខភាពពិភពលោក (WHO) សិន មុនដំណើការដឹកជញ្ជូន ដែលអាចចាប់ផ្ដើមនៅចុងខែកុម្ភៈ។ បន្ទាប់ពីក្នុងរបាយការណ៍គម្រោងចែងចាយបណ្ដោះអាសន្នរបស់ COVAX កូរ៉េខាងជើង នឹងទទួលបានវ៉ាក់សាំងរបស់ក្រុមហ៊ុន AstraZeneca ដែលផលិតដោយក្រមហ៊ុន Serum Institute របស់ឥណ្ឌាចំនួន១,៩៩លានដូស។
សូមជម្រាបថា ចំពោះការប្រកាសរបស់សម្ពន្ធ GAVI ជាការបញ្ចេញព័ត៌មានលើកដំបូងដែលកូរ៉េខាងជើង សុំជំនួយអន្តរជាតិជាផ្លូវការ។ ព្រោះកូរ៉េខាងជើង ស្ថិតក្នុងចំណោមប្រទេសដែលមានហេដ្ឋារចនាសម្ព័ន្ធសុខាភិបាលទន់ខ្សោយ ហើយប្រឈមមុខខ្លាំងនឹងការរាលដាលជំងឺកូវីដ-១៩ ជាមួយប្រព័ន្ធសុខាភិបាលយ៉ាប់យ៉ឺននោះ។
បើទោះបីជាយ៉ាងណាក៏ដោយ ខណៈជំងឺកូវីដ-៩ រាលដាលស្ទើរពេញពិភពលោកទៅហើយនោះ ប៉ុន្តែកូរ៉េខាងជើង នៅតែអះអាងថា ខ្លួនមិនមានករណីឆ្លងឡើយសូម្បីតែមួយ។ ប្រទេសនេះក៏ចាត់វិធានការដ៏តឹងរ៉ឹងផងដែរក្នុងការទប់ស្កាត់ករណីឆ្លង។ កាលពីខែវិច្ឆិកា ឆ្នាំ២០២០ ទីភ្នាក់ងារចារកម្មកូរ៉េខាងត្បូងបានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានបញ្ជាឱ្យប្រហារជីវិតមនុស្ស២នាក់ និងបានដាក់បម្រាមនេសាទនៅដែនសមុទ្រ ព្រមទាំងបិទរដ្ឋធានីព្យុងយ៉ាង ដើម្បីប្រយុទ្ធប្រឆាំងនឹងជំងឺកូវីដ-១៩ ។
ជាមួយគ្នានេះ ទីក្រុងព្យុងយ៉ាង ក៏បានប្រតិកម្មខ្លាំងលើការអធិប្បាយណាមួយទាក់ទងស្ថានភាពក្នុងប្រទេសផងដែរ។ អំឡុងខែធ្នូ ឆ្នាំ២០២០ ប្អូនស្រីលោក គីម ជុងអ៊ុន រិះគន់មិនសំចៃមាត់លើរដ្ឋមន្ត្រី ការបរទេសកូរ៉េខាងត្បូង Kang Kyung-wha ចំពោះការសង្ស័យថា គ្មានករណីវិជ្ជមានសូម្បីតែមួយនេះ៕ដោយ៖ស តារា
រូបភាព៖AFP
