សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានផ្តល់អនុសាសន៍ល្អៗដ៏មានតម្លៃមួយចំនួនដល់ប្រជាពលរដ្ឋជាង៥០០០គ្រួសារ ដែលបានមកទទួលអំណោយមនុស្សធម៌កាកបាទក្រហមកម្ពុជានៅថ្ងៃទី១០ និងទី១១ ខែមីនា ឆ្នាំ២០១៦ នៅខេត្តឧត្តរមានជ័យ។

សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានអំពាវនាវសុំឱ្យ ប្រជាពលរដ្ឋ យកចិត្តទុកដាក់ប្រុងប្រយ័ត្នចំពោះគ្រោះថ្នាក់ចរាចរណ៍គ្រប់ពេលវេលា។

គ្រោះថ្នាក់ចរាចរណ៍នៅតែជាកត្តាព្រួយបារម្ភជាងគេបំផុតនៅកម្ពុជា ដែលភាគច្រើនកើតឡើងដោយកត្តាមនុស្ស បើកបរមិនគោរពគ្នា មិនចេះអធ្យាស្រ័យ មិនគោរពច្បាប់ចរាចរណ៍ បើកបរជែងគ្នា និងបើកបរក្រោមឥទ្ធិពលនៃគ្រឿងស្រវឹង។
ក្នុងន័យនេះ អាជ្ញាធរគ្រប់ជាន់ថ្នាក់ តែងតែអំពាវនាវ ដល់អ្នកបើកបរឡានក្រុង ត្រូវមានប័ណ្ណបើកបរត្រឹមត្រូវ មានសមត្ថភាព និងមានសុជីវធម៌ល្អ ដើម្បីធានាបានសុវត្ថិភាពរបស់អ្នករួមដំណើរ។ ពិសេសជាងនេះទៅទៀត សូមពុកម៉ែបងប្អូន និងក្មួយៗយុវជនកាកបាទក្រហមនៅតាមសាលារៀន ជួយអូសទាញមិត្តភក្តិ សិស្ស ឬយុវជនដែលដើរខុសផ្លូវ ឱ្យមកដើរផ្លូវត្រូវវិញ។ សូមជៀសវាងឱ្យខានតែបាននូវ ល្បែងស៊ីសង គ្រឿងញៀន អំពើពាលាអាវាសែ ដែលជាមូលហេតុនៃការកើតឡើងអំពើហិង្សាក្នុងគ្រួសារ និងឈានដល់អំពើប្លន់ សម្លាប់មនុស្សជាដើម”៕​ សុខ​ ខេមរា