ភ្នំពេញ៖ បុរសម្នាក់បានបែកថ្នាំ ដែលវង្វែងបាត់អស់ស្មារតី បានបើករថយន្តក្នុងល្បឿនយ៉ាងលឿន ហើយរេចង្កូតជ្រុលទៅបុករនាំងដែកពុះចែកទ្រូងផ្លូវបាក់អស់ចំនួន៧ផ្ទាំង និងជ្រុលទៅបុកយុវជនប្រុសស្រី៣នាក់ដែលកំពុងជិះម៉ូតូឌុបគ្នានិងជិះបញ្ច្រាស់ទិសគ្នា បណ្ដាលឲ្យរងរបួស
ធ្ងន់និងស្រាល ។
ក្នុងហេតុការណ៍ខាងលើនេះដែរបានបង្កឲ្យមានការភ្ញាក់ផ្អើលដល់ប្រជាពលរដ្ឋជាច្រើនមកចោមរោមមើលនិងដល់សមត្ថកិច្ចមូលដ្ឋានចុះមកអន្តរាគមន៍ដល់កន្លែងកើតហេតុភ្លាមៗ កាលពីវេលាម៉ោង១០និង០០នាទីយប់ ថ្ងៃទី១១ ខែមីនា ឆ្នាំ២០១៦ នៅចំណុចមុខភោជនីដ្ឋាន ប៉ោគី នៅតាមបណ្ដោយផ្លូវព្រះមុន្នីវង្ស ស្ថិតក្នុងសង្កាត់បឹងកេងកង១ ខណ្ឌចំការមន។
បើតាមប្រភពព័ត៌មានពីប្រជាពលរដ្ឋដែលឃើញហេតុការខាងលើនេះបានប្រាប់ឲ្យដឹងថា នៅមុនពេលកើតហេតុ គឺគេបានឃើញបុរសបែកថ្នាំម្នាក់ដែលជាម្ចាស់រថយន្តបង្កម៉ាកកាមរីបាឡែន ពណ៌ស្ក ពាក់ស្លាកលេខភ្នំពេញ2T.1626 នោះបានបើកបរតាមបណ្ដោយផ្លូវព្រះមុន្នីវង្ស ទិស ដៅពីជើងទៅត្បួង ក្នុងល្បឿនយ៉ាងលឿន ខណះមកដល់ចំណុចកើតហេតុ ក៏រេចង្កូតមកខាងឆ្វេង បុករនាំងដែកពុះចែកទ្រូងផ្លូវបាក់អស់ចំនួន៧ផ្ទាំង ហើយជ្រុលទៅបុកយុវជនប្រុស ស្រី៣នាក់ដែលជិះម៉ូតូម៉ាកហង់ដា ស្កុបពី ពណ៌ផ្កាឈូកលាយស ពាក់ស្លាកលេខភ្នំពេញ 1AU.6128 ដែលជិះបញ្ច្រាស់ទិសនិងរថយន្តបង្ក បណ្ដាលឲ្យមនុស្សស្រីម្នាក់របួសបាក់ភ្លៅម្ខាង(ធ្ងន់)និងប្រុសស្រី២នាក់ទៀតដែលជិះជាមួយគ្នារងរបួសស្រាល។
ប្រភពដដែលបានឲ្យដឹងថា បន្ទាប់ពីកើតហេតុមានប្រជាពលរដ្ឋជាច្រើនបានមកឆោមរោមមើលនិងទំនាក់ទំនងទៅសមត្ថកិច្ចចុះមកអន្តរាគមន៍ដល់កន្លែងកើតហេតុភ្លាមៗ និងបានឃាត់ខ្លួនជនបង្ក ហើយពេលនោះក៏មាននារីម្នាក់ដែលជនបង្កថា ជាក្មួយ បានមកលូកយកថ្នាំញៀនដែលនៅក្នុងប្រអប់រថយន្តបង្កនោះចំនួន១កញ្ចប់ធ្វើឲ្យធ្លាក់ដល់ដី ភ្លាមនោះសមត្ថកិច្ចដែលចុះដល់កន្លែងកើតហេតុនោះបានឃើញទាន់នារីម្នាក់នោះបានធ្វើឲ្យធ្លាក់ថ្នាំញៀនចំនួន១កញ្ចប់និងសារ៉ាងចាក់ចំនួន៣ ហើយសមត្ថកិច្ចក៏បានឆែកឆេរបន្ថែមទៀតនៅក្នុងរថយន្តបង្កនោះ ក៏រកឃើញមានថ្នាំញៀនចំនួន២កញ្ចប់ រួមទាំងសំភារះសំរាប់ប្រើប្រាស់បន្ថែមទៀត។
ក្រោយពេលសមត្ថកិច្ចឆែកឆេរួចហើយក៏បាននាំជនបង្ករួមទាំងវត្ថុតាង(ថ្នាំញៀន) និងធ្វើការវាស់វែងយករថយន្តបង្កហេតុនិងម៉ូតូរងគ្រោះទៅកាន់ការិយាល័យចរាចរណ៍ផ្លូវគោករាជធានីភ្នំពេញ ដើម្បីរងចាំដោះស្រាយតាមនីតិវិធីច្បាប់។ ដោយឡែកភាគីខាងម៉ូតូដែលរងរបួសធ្ងន់នោះ ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យឯកជនភ្លាមៗផងដែរ ៕ដោយៈជីម ភារ៉ា ដង្កោ
