អន្តរជាតិ៖ ប្រទេសរុស្ស៊ី ខណៈដែលវីរុសបម្លែងថ្មី Delta (មានប្រភពដើមនៅឥណ្ឌា) កំពុងរាតត្បាតខ្លាំង នៅថ្ងៃព្រហស្បតិ៍ទី០១ ខែកក្កដា ឆ្នាំ២០២១នេះ គ្រឹះស្ថានសុខាភិបាលទីក្រុងម៉ូស្គូ នៃប្រទេសមួយនេះ បានបេីកយុទ្ធនាការចាប់ផ្តើមផ្តល់ការចាក់វ៉ាក់សាំងបង្ការជំងឺ COVID-19 “ដូសទី ៣”។
ជាក់ស្ដែងបើតាមទីភ្នាក់ងារព័ត៌មាន Reuters នៅល្ងាចថ្ងៃព្រហស្បតិ៍នេះដែរ បានចុះផ្សាយថា៖ ក្រសួងសុខាភិបាលរុស្ស៉ី កាលពីថ្ងៃពុធទី៣០ ខែមិថុនាម្សិលមិញនេះ បានប្រកាសចេញគោលការណ៍ថ្មី សម្រាប់កម្មវិធីចាក់វ៉ាក់សាំង COVID-19 ថ្នាក់ជាតិ ដោយផ្តល់អនុសាសន៍ឲ្យគ្រឹះស្ថានសុខាភិបាលទាំងអស់ ចាប់ផ្តើមចាក់ដូសទី ៣ ជូនដល់អ្នកទាំងឡាយណា ដែលបានទទួលការចាក់វ៉ាក់សាំងកាលពី ៦ខែមុន ឬយូរជាងនេះ ហើយវាក៏បាននាំឲ្យរុស្ស៉ី ក្លាយជាប្រទេសដំបូងគេក្នុងលោក ដែលបានធ្វើយ៉ាងដូច្នេះជាផ្លូវការ។
សូមជម្រាបថា ក្នុងយុទ្ធនាការចាក់វ៉ាក់សាំងដូសទី៣ នេះដែរ ត្រូវបានជំរុញដោយការកើនឡើងខ្លាំងគួរឲ្យកត់សម្គាល់ នាពេលថ្មីៗនេះនៃករណីឆ្លង COVID-19 ដែលទំនងជាដោយសារវីរុសបម្លែងថ្មី Delta បូករួមជាមួយអត្រាចាក់វ៉ាក់សាំង ដែលទើបសម្រេចបានកម្រិតទាប នៅក្នុងប្រទេសរុស្ស៉ី។
គួរបញ្ជាក់ថា ប្រទេសរុស្ស៉ី បានចាប់ផ្តើមការចាក់វ៉ាក់សាំងបង្ការ COVID-19 តាំងពីខែមករា ដើមឆ្នាំ២០២១នេះក៏ពិតមែន ប៉ុន្តែមនុស្សត្រឹម ១៧លាននាក់ប៉ុណ្ណោះ ក្នុងចំណោមប្រជាជនសរុបរុស្ស៉ីសរុបជាង ១៤៤លាននាក់ ដែលចាក់បានគ្រប់ដូស។
ដោយឡែកក្រុមអ្នកវិទ្យាសាស្រ្ត ដែលអភិវឌ្ឍវ៉ាក់សាំងនាំមុខរបស់រុស្ស៉ីគឺ Sputnik កាលពីពេលកន្លងមកនេះ ក៏បានអះអាងដែរថា៖ ការការពារដែលទទួលបានពីវ៉ាក់សាំងនេះ អាចមានប្រសិទ្ធភាពប្រឆាំង COVID-19 លើសពី ៦ខែ ប៉ុន្តែដោយសារសមត្ថភាពឆ្លងរាលដាលយ៉ាងឆាប់រហ័ស នៃវីរុសបម្លែងថ្មី Delta គឺគួរតែមានការចាក់វ៉ាក់សាំងដូសទី ៣ បន្ថែម ដើម្បីរក្សាបរិមាណអង់ទីករការពារក្នុងរាងកាយ ឲ្យស្ថិតនៅកម្រិតខ្ពស់តាមតែអាចធ្វើទៅបាន។
គួរបញ្ជាក់ដែរថា កាលពីថ្ងៃពុធម្សិលមិញ រុស្ស៊ីបានរាយការណ៍ពីចំនួនមនុស្សស្លាប់ ៦៦៩នាក់ និងកាលពីថ្ងៃអង្គារមុននេះទៀតចំនួន ៦៥២នាក់។ តួលេខទាំងបីថ្ងៃនេះ គឺសុទ្ធតែខ្ពស់បំផុត ដែលរុស្ស៊ីមិនធ្លាប់ជួបប្រទះនោះឡើយ គិតចាប់តាំងពីជំងឺ COVID-19 បានរាតត្បាតប្រទេសនេះ ដំបូងកាលពីឆ្នាំ២០២០។ គិតត្រឹមថ្ងៃព្រហស្បតិ៍នេះ រុស្ស៊ីមានករណីឆ្លង COVID-19 សរុប ៥,៥៣៨,១៤២ករណី ក្នុងនោះស្លាប់ ១៣៥,៨៨៦នាក់ និងជាសះស្បើយ ៥,០១៧,៣២១៕ដោយ៖ស តារា
រូបភាព៖ឯកសារ
