ខេត្តពោធិ៍សាត់៖ សាកសពកុមារីអាយុ៤ឆ្នាំម្នាក់ត្រូវគេរាវរកឃើញនៅក្នុងទឹកស្ទឹងពោធិ៍សាត់គួឲ្យរន្ធត់ដោយសារសពតោងបង្គោលស្ពានជាប់ទោះបីដាច់ខ្យល់ក្តី ក្រោយពីបាត់ខ្លួនអស់រយៈពេលច្រើនម៉ោង។
ហេតុការណ៏ដ៍រន្ធត់នេះបានភ្ញាក់ផ្អើលឡើងកាលពីវេលាម៉ោង៤និង៣០នាទីរសៀលថ្ងៃទី២៣ ខែមីនា ឆ្នាំ២០១៦ ត្រង់ចំណុចស្ទឹងពោធិ៍សាត់ត្រើយខាងកើត ស្ថិតក្នុងភូមិថ្នល់ជប៉ុន សង្កាត់រលាប ក្រុង ខេត្តពោធិ៍សាត់។
កុមារីរងគ្រោះត្រូវបានគេស្គាល់ឈ្មោះ ច្រឹក សៅនី អាយុ៤ឆ្នាំ រស់នៅក្នុងបន្ទុកឪពុកឈ្មោះវ៉ា ឡៃអីុ អាយុ៣៥ឆ្នាំនិងម្ដាយឈ្មោះម៉ៅ សុភី អាយុ២៨ឆ្នាំមានទីលំនៅភូមិបេង ឃុំស្នាអន្សា ស្រុកក្រគរ ខេត្តពោធិ៍សាត់ (ហើយបានមកស្នាក់នៅភូមិសង្កាត់កើតហេតុដើម្បីរៀនធ្វើពាង)។
ស្រ្តីជាម្ដាយបានរៀបរាប់ប្រាប់សមត្តកិច្ចថាៈ គាត់មានកូនប្រុសស្រីទាំងអស់ចំនួន៥នាក់ក្នុងបន្ទុកគ្រួសារ ហើយកូនរងគ្រោះនេះជាកូនទី៤។ អ្នកស្រីបន្តថាការពិតកូននេះបានបាត់តាំងពីវេលាម៉ោងប្រហែល១២ថ្ងៃត្រង់មកម្លេះ ប៉ុន្តែដោយជាប់រវល់ធ្វើពាងឲ្យគេពេកទើបភ្លេចត្រជៀកបែបនេះ លុះដល់វេលាម៉ោងប្រមាណជិត៤ទើបឆោឡោរកកូន នាំគ្នាដើររកលើគោកជិតៗផ្ទះអស់ចិត្ត ក៍នឹកឃើញនាំគ្នាចុះរាវក្នុងទឹកស្ទឹងពោធិ៍សាត់ត្រង់ចំណុចស្ពានកំពុងដងទឹកខាងក្រោយផ្ទះ ទើបប្រទះឃើញសាកសពកូនស្រីដោយតោងជាប់នឹងបង្គោលស្ពាននៅបាតដីដែលទឹកជម្រៅត្រឹមចង្កេះមនុស្សចាស់ គ្រានោះដោយមិនអស់ចិត្តក៏យកទៅដល់មន្ទីរពេទ្យបង្អែកខេត្ត ប៉ុន្ដីត្រូវបានក្រុមគ្រូពេទ្យប្រាប់ថាក្មេងបានដាច់ខ្យល់ស្លាប់បាត់ទៅហើយ ក៍នាំគ្នាយកត្រឡប់មកផ្ទះវិញដើម្បីចាត់ចែងធ្វើបុណ្យតាមប្រពៃណី។
ប្រភពដ៏ដែលបន្តទៀតថាក្រោយពីសមត្ថកិច្ចបានទទួលពត៌មាននេះភ្លាម បានចុះមកដល់ហើយធ្វើកោសល្យស្រាវជ្រាវយ៉ាងយកចិត្តទុកដាក់ខ្ពស់ឃើញថាមិនមានជាប់ពាក់ព័ន្ធនិងឃាត់កម្មអ្វីនោះទេ ហើយក៍បានប្រគល់សាកសពឲ្យឪពុកម្ដាយដើម្បីចាត់ចែងបន្តយកទៅធ្វើបុណ្យតាមប្រពៃណី៕
ដោយ៖ ប៉ឹម ពិន
