ភ្នំពេញ៖​ យុវជនម្នាក់ត្រូវក្រុមជនសង្ស័យមួយក្រុមមានគ្នាបួននាក់ប្រដាប់ដោយដាវនិងកាំភ្លើងខ្លីមួយដើមធ្វើសកម្មភាពកាប់និងគំរាមបាញ់ប្លន់យកម៉ូតូឌ្រីមសង់សេរីឆ្នាំ២០១៦ មួយគ្រឿងខណៈដែលជនរងគ្រោះជិះម៉ូតូមកយកសង្សានៅខាងមុខវិទ្យាល័យព្រះសីុសុវត្ថិ។ ​

ហេតុការណ៍​កាប់ប្លន់និងគំរាមបាញ់ដ៏សាហាវនេះបានកើតឡើងនៅវេលាម៉ោង១និង៣០នាទីរំលងអាធ្រាត​ ឈានចូលថ្ងៃទី២៣​ ខែមិនា​ ឆ្នាំ២០១៦​ នៅចំណុចខាងមុខវិទ្យាល័យព្រះសីុសុវត្តិ​ តាមបណ្ដោយមហាវិថីព្រះនរោត្តមកែងនិងផ្លូវលេខ១៨៤​ ក្នុងសង្កាត់​ ផ្សារថ្មី៣​ ខណ្ឌដូនពេញ​ រាជធានីភ្នំពេញ​។ ​

ជនរងគ្រោះមានឈ្មោះ​ កេត​ សុភ័ក្ត្រា​ ភេទប្រុស​ អាយុ២២ឆ្នាំ​ មានទីលំនៅផ្ទះលេខ២៨៤៣​ ផ្លូវលំ​ ភូមិខ្នរ សង្កាត់ព្រែកលៀប​ ខណ្ឌជ្រោយចង្វា​ រាជធានីភ្នំពេញ​។ ចំណែកម៉ូតូដែលត្រូវក្រុមជនសង្ស័យយកទៅនោះម៉ាកឌ្រីមC125សេរីឆ្នាំ២០១៥​ ពណ៌ខ្មៅ​ ពាក់ស្លាកលេខ​ ភ្នំពេញ1CS-9881 ។ ​

បើតាមការរៀបរាប់ពីនារីជាសង្សាររបស់ជនរងគ្រោះបានអោយដឹងថា​ នៅមុនពេលកើតហេតុជនរងគ្រោះទើបតែចេញពីខារ៉ាអូខេ​ ហ្សង់ឡឺហ្សេ​ ហើយបានតេទូរស័ព្ទហៅរូបនាងអោយមកជួយឌុបផងព្រោះរូបគេស្រវឹង​ ហើយក៏បានណាត់ជួបគ្នានៅខាងមុខវិទ្យាល័យព្រះសីុសុវត្ថិ។ ពេលនោះរូបនាងបានជិះតាក់សីុចេញពីផ្ទះមកឈប់ចាំនៅខាងមុខវិទ្យាល័យព្រះសីុសុវត្ថិបានមួយសន្ទុះជនរងគ្រោះក៏បានមកដល់ដែរ។ ​

ប្រភពបានបន្តថា ពេលដែលជនរងគ្រោះបានឈប់ម៉ូតូភ្លាម​ ស្រាប់លេចមុខក្រុមជនសង្ស័យមួយក្រុមមានគ្នាបួននាក់ជិះម៉ូតូឌ្រីមសង់មួយគ្រឿងនិងមួយគ្រឿងទៀតមិនចាំម៉ាកនិងប្រដាប់ដោយដាវសាំម៉ូរៃមួយដើមនិងកាំភ្លើងខ្លីមួយដើម​ បានធ្វើសកម្មភាពកាប់ទៅលើជនរងគ្រោះនិងដកកាំភ្លើងគំរាមបាញ់ថែមទៀត។ ក្រោយពីកាប់រួចជនសង្ស័យបានយកម៉ូតូជនរងគ្រោះជិះគេចខ្លួនបាត់ស្រមោលសូន្យឈឹង។ ​

ក្រោយពីកើតហេតុជនរងគ្រោះបានទំនាក់ទំនងទៅមិត្តភ័ក្រអោយមកជួយដឹកទៅព្យាបាលរបួសនៅមន្ទីរពេទ្យ​ ក្រោយមកទើបទៅដាក់ពាក្យបណ្ដឹងនៅប៉ុស្ដិ៍ផ្សារថ្មី៣​ ដោយខ្លួនឯង។ ​

សូមបញ្ជាក់ថានៅក្នុងទឹកដីខណ្ឌដូនពេញគឺតែងតែមានករណីប្លន់ប្រដាប់អាវុធនិងករណីឆក់កាបូបពីជនជាតិខ្មែរក៏ដូចជាជនបរទេសស្ទើរតែជារៀងរាល់យប់​ តែមិនដែលឃើញកម្លាំងសមត្ថកិច្ចបង្ក្រាបបានម្ដងណាឡើយ៕ដោយ៖ ព្រែកជ័យ