អន្តរជាតិ៖ បើតាមទីភ្នាក់ងារសារព័ត៌មានថៃ Bangkok Post បានដកស្រង់ចេញផ្សាយពីក្រសួងសុខាភិបាលថៃ នៅព្រឹកថ្ងៃសុក្រទី១៣ ខែសីហា ឆ្នាំ២០២១នេះ ស្ដីពីរាយការណ៍ប្រចាំថ្ងៃនៃការរកឃើញមនុស្សឆ្លងជំងឺ COVID-19 ថ្មីៗរហូតដល់ចំនួន ២៣,៤១៨ករណីបន្ថែមទៀត ជាតួលេខខ្ពស់បំផុតថ្មីមួយទៀត គិតត្រឹមរយៈពេលមួយថ្ងៃប៉ុណ្ណោះ។ ខណៈអ្នកជំងឺចំនួន ១៨៤នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរក្នុងរយៈពេល ២៤ម៉ោងចុងក្រោយដូចគ្នា។
ជាក់ស្ដែងបើតាមក្រសួងសុខាភិបាលថៃ បានគូសបញ្ជាក់ថាក្នុងចំណោមករណីឆ្លងថ្មីៗខាងលើនេះ មាន ២៣,០៣០ករណី ត្រូវបានរកឃើញនៅលើប្រជាជនថៃទូទៅ និង ៣៨៨ករណីទៀតត្រូវបាន រកឃើញនៅលើអ្នកទោសតាមពន្ធនាគារ។ ក្រៅពីការរកឃើញករណីឆ្លងថ្មីៗ ក៏មានអ្នកជំងឺចំនួន ២០,០៨៣នាក់ផ្សេងទៀត ទើបតែត្រូវបានអនុញ្ញាតឱ្យចាកចេញពីមន្ទីរពេទ្យក្រោយជាសះស្បើយ។
សូមជម្រាបថា ប្រទេសថៃ សម្រាប់ការចាក់វ៉ាក់សាំងបង្ការ COVID-19 គិតត្រឹមព្រឹកថ្ងៃទី១១ ខែសីហាថ្មីៗនេះ សម្រេចបាន ២២.៣លានដូស ក្នុងនោះប្រជាជន ៤.៨៣លាននាក់ (៦.៩% នៃចំនួនប្រជាជនសរុប) បានទទួលការចាក់គ្រប់ដូស។
គួរបញ្ជាក់ថា ប្រទេសថៃ រហូតមកទល់ពេលនេះ បានកត់ត្រានូវករណីឆ្លងសរុប នៅទូទាំងប្រទេសចំនួន ៨៦៣,១៨៩ករណី ក្នុងនោះមានអ្នកស្លាប់ ៧,១២៦នាក់ និងអ្នកជាសះស្បើយឡើងវិញ ៦៤៣,៨៨៤នាក់៕ដោយ៖ស តារា
