ខេត្តពោធិ៍សាត់៖ សមត្តកិច្ចនគរបាលស្រុកភ្នំក្រវាញ ឃាត់ខ្លួនបុរសម្នាក់បន្ទាប់ពីបុរសរូបនេះ បានទាញយកដែកថ្នាំងអំពៅវាយស្រ្តីម្នាក់បណ្ដាលឲ្យរបួសធ្ងន់ (បាក់កំភួនដៃ) ដោយសារតែទំនាស់រឿងព្រំដី។
ហេតុការណ៏នេះបានកើតឡើងកាលពីរសៀលថ្ងៃទី៣១ ខែមីនា ឆ្នាំ២០១៦ ត្រង់ចំណុចឃ្លាំងពោត ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។
ប្រភពព័ត៌មានពីសមត្តកិច្ចនគរបាលស្រុកបានឲ្យដឹងថា បុរសត្រូវបានឃាត់ឈ្មោះ មួយ ចយ ភេទប្រុស អាយុ ២៧ឆ្នាំ រស់នៅភូមិអង្រ្គង ឃុំសំរោង ស្រុកភ្នំក្រវាញ ខេត្តពោធិ៍សាត់។ ចំណែកស្រ្តីរងរបួសធ្ងន់ (បាក់កំភួនដៃឆ្វេង) ហើយបានបញ្ជូនទៅព្យាបាលនៅមន្ទីរពេទ្យខេត្តបាត់ដំបង ត្រូវបានគេស្គាល់ឈ្មោះ ភោក រុន ភេទស្រី អាយុ ៤១ឆ្នាំ រស់នៅភូមិឃុំជាមួយគ្នា។ ប្រភពបន្តថា ការឃាត់ខ្លួនបុរសសង្ស័យខាងលើ ធ្វើឡើងបន្ទាប់ពីបុរសរូបនេះ មានទំនាស់ទាស់ទែងគ្នារឿងព្រំដីជាមួយស្រ្តីរងរបួស ដោយយកដែកថ្នាំងអំពៅវាយបណ្ដាលឲ្យបាក់កំភួនដៃខាងឆ្វេង (របួសធ្ងន់)។ ប្រភពបន្តទៀតថា សមត្តកិច្ចបានបំពេញសំណុំឯកសារបញ្ជូនខ្លួនជនសង្ស័យទៅស្នងការដ្ឋាននគរបាលខេត្តដើម្បីបន្តតាមនិតិវិធី៕
ប៉ឹម ពិន
