ខេត្តកណ្ដាល៖ នារីវ័យ២០ឆ្នាំបានស្លាប់ពេលបញ្ជូនទៅសង្រ្គោះនៅមន្ទីរពេទ្យជ័យជំនះក្រុងតាខ្មៅ ម្នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៏ម៉ូតូបុកម៉ូតូនៅលើកំណាត់ផ្លូវជាតិលេខ២១A កែងផ្លូវលេខ១០៤ ត្រង់ចំណុចសាលាគរុកោសល្យ-វិក្រិត្យការខេត្ដកណ្ដាល ស្ថិតក្នុងភូមិតាខ្មៅ១ សង្កាត់/ក្រុងតាខ្មៅ កាលពីវេលាម៉ោង១០និង៣០នាទី ថ្ងៃទី១០ ខែមេសា ឆ្នាំ២០១៦ ។

នារីស្លាប់បាត់បង់ជីវិតត្រូវគេស្គាល់ឈ្មោះ ស៊ុន ដានី ភេទស្រី អាយុប្រមាណ២០ឆ្នាំ ជិះម៉ូតូម៉ាកហុងដាអាយខុន ពណ៌ទឹកក្រូចលាយខ្មៅ ពាក់ស្លាកលេខភ្នំពេញ 1AP-1142ដោយមិនមានពាក់មួកសុវត្ថិភាព មានបំពាក់កញ្ចក់មើលក្រោយ ។ ចំណែកឯជនរងគ្រោះដែលរងរបួសធ្ងន់ឈ្មោះ ទ្រុយ ទ្រី ភេទប្រុស អាយុ១៧ឆ្នាំ មានទីលំនៅភូមិឬស្សីជ្រោយ ឃុំស្វាយប្រទាល ស្រុកស្អាង ខេត្ដកណ្ដាល ជិះម៉ូតូម៉ាកហុងដាឌ្រីម ធនសេ១២៥ ពណ៌ខ្មៅ គ្មានស្លាកលេខ គ្មានកញ្ចក់មើលក្រោយនិងមិនពាក់មួកសុវត្ថិភាព ។

សាក្សីនិយាយថា នៅមុនពេលកើតហេតុគេបានឃើញនារីរងគ្រោះជិះម៉ូតូតាមបណ្ដោយផ្លូវជាតិលេខ២១Aក្នុងទិសដៅពីជើងទៅត្បួងដោយល្បឿនមធ្យម ខណៈបើកដល់ចំណុចផ្លូវកែងក៏ជ្រុលទៅបុកជាមួយម៉ូតូម៉ាកហុងដាឌ្រីម បណ្ដាលឲ្យម៉ូតូទាំង២គ្រឿងដួលយ៉ាងច្រងាបច្រងិល ធ្វើឲ្យនារីរងគ្រោះបោកក្បាលជាមួយផ្លូវស្លាប់យ៉ាងអណោចអធ័មពេលបញ្ជូនទៅមន្ទីរពេទ្យ ។ ដោយឡែកអ្នកបើកបរម៉ូតូហុងដាឌ្រីមរងរបួសបាក់ជើងខាងស្ដាំត្រូវបានមិត្ដភក្ដិដឹកបញ្ជូនទៅសង្រ្គោះនៅមន្ទីរពេទ្យជ័យជំនះក្រុងតាខ្មៅ ។

បច្ចុប្បន្នសាកសពជនរងគ្រោះត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ។ ចំណែកឯម៉ូតូទាំង២គ្រឿងត្រូវបានសមត្ថកិច្ចនគរបាលចរាចរណ៍ក្រុងតាខ្មៅដកហូតបញ្ជូនទៅរក្សាទុកនៅអធិការដ្ឋានដើម្បីកសាងសំណុំរឿងចាត់ការតាមនីតិវិធីច្បាប់ ៕

ដោយ៖ ស្អាងជ័យ