ខេត្តកំពង់ចាម៖ នាព្រឹកថ្ងៃទី២៧ មេសា ២០១៦ នៅសាលប្រជុំសាលាក្រុងកំពង់ចាម បានប្រារព្ធពិធីប្រកាសតែងតាំងលោក លី សុវណ្ណ អតីតជាអធិការរងស្រុកចំការលើ មកទទួលមុខតំណែងជា អភិបាលរងក្រុងកំពង់ចាម ក្រោមអធិបតីភាព លោកអ៊ុំភឿន គុណវឌ្ឍ អភិបាលរង នៃគណៈអភិបាលរងខេត្តកំពង់ចាម តំណាងលោក លន់ លឹមថៃ អភិបាលខេត្ត ។
បន្ទាប់ពីការអានអនុក្រិត្យ ប្រកាសរបស់រាជរដ្ឋាភិបាល ស្តីពីការតែងតាំងមុខតំណែងលោក លី សុវណ្ណ ជាអភិបាលរងក្រុងកំពង់ចាមរួចមក លោកអភិបាលរងក្រុងថ្មីក៏បានឡើងធ្វើការប្តេជ្ញាចិត្តថា នឹងបំពេញភារកិច្ច ដែលថ្នាក់លើប្រគល់ជូនឲ្យបានល្អប្រសើរ គោរពអនុវត្តដាច់ខាតតាមរដ្ឋធម្មនុញ្ញ និងលិខិតបទដ្ឋានបច្ចេកទេសនានា នៃព្រះរាជាណាចក្រកម្ពុជា ខិតខំបំពេញការងារ ឲ្យអស់ពីកម្លាំងកាយចិត្ត ដើម្បីបម្រើជាតិ មាតុភូមិ និងប្រជាពលរដ្ឋ ពិសេសការថែរក្សាស្ថេរភាព នយោបាយ សន្តិសុខ សុវត្ថិភាព និងសណ្ដាប់ធ្នាប់សាធារណៈ ជូនប្រជាពលរដ្ឋ ខិតខំអភិវឌ្ឍន៍សេដ្ឋកិច្ច និងហេដ្ឋារចនាសម្ព័ន្ធ ក្នុងក្រុងឲ្យមានសោភ័ណភាព ក្លាយជាទីក្រុងស្អាត ដើម្បីទទួលបានចំណាត់ថ្នាក់រំដួល៣ទង និងត្រៀមប្រកួតប្រជែងជាមួយទីក្រុង តាមបណ្ដាប្រទេសតំបន់អាស៊ី ។
បន្ទាប់មកលោក អ៊ុំភឿន គុណវឌ្ឍ បានមានប្រសាសន៍ផ្តាំផ្ញើដល់មន្ត្រីដែលបានតែងតាំងថ្មី និងមន្ត្រីកំពុងបំពេញការងារ ត្រូវបង្កើនទំនាក់ទំនងសាមគ្គីភាពផ្ទៃក្នុង សិក្សាអភិវឌ្ឍន៍ចំនេះដឹងបន្ថែម និងយកគំរូល្អរៀមច្បង ឬព្រឹទ្ធាចារ្យជំនាន់មុនៗ ត្រូវមានឆន្ទៈមោះមុត ម៉ឹងមាត់ ក្នុងការបំពេញភារកិច្ច បម្រើសេវាជូនប្រជាពលរដ្ឋឲ្យបានឆាប់រហ័ស និងទាន់ពេលវេលា ហើយពេលប្រឈមបច្ចុប្បន្ននេះ អភិបាលស្រុកក្រុង ត្រូវយកចិត្តទុកដាក់ មានវិធានការចំពោះប្រជាពលរដ្ឋ ពាក់ព័ន្ធនឹង បញ្ហាកង្វះទឹកស្អាតប្រើប្រាស់ និងការពារជម្ងឺផ្សេងៗផងដែរ ៕
ដោយ៖ វណ្ណះ
