ភ្នំពេញ ៖ មនុស្សប្រុស៤នាក់បានរងរបួសធ្ងន់និងស្រាល ដោយសារតែរថយន្តកូរ៉េ១គ្រឿងបើកក្នុងល្បឿនយ៉ាងលឿនហើយទំនងអ្នកបើកងងុយដេក បានរេចង្កូតជ្រុលទៅបុកចូលផ្ទះប្រជាពលរដ្ឋផ្ទុះបណ្តាលអោយឆេះរងការខូចខាតធ្ងន់ធ្ងរ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតមានឡើងកាលពីវេលាម៉ោង២នឹង៤០រំលងអាធ្រាត្រឈានចូលថ្ងៃទី១៨ ខែឧសភា ឆ្នាំ២០១៦ ស្ថិតក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ ។
ប្រភពព៍ត៌មានបានឱ្យដឹងថា នៅមុនពេលកើតហេតុគេបានឃើញរថយន្តកូរ៉េ ពណ៍ស ពាក់ស្លាកលេខ ភ្នំពេញ 3B-0464 បើកបរតាមបណ្តោយផ្លូវជាតិលេខ៦ ទិសដៅពីត្បូងទៅជើង ក្នុងល្បឿនយ៉ាងលឿន ហើយទំនងអ្នកបើកងងុយដេក ពេលមកដល់ចំណុចកើតហេតុបានរេចង្កូតបុកតូបកាត់សក់ និងបុកចូលផ្ទះប្រជាពលរដ្ឋចំនួន២ខ្នង ផ្ទុះឆេះបណ្តាលឱ្យរងការខូចខាតធ្ងន់ធ្ងរ និងរបួសធ្ងន់ស្រាលមនុស្ស៤នាក់ ជាមួយនឹងរថយន្តម្ចាស់ផ្ទះខូចខាត១គ្រឿងផងដែរ បង្កឱ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចចុះជួយអន្តរាគមន៍ យកទឹកនិងបំពង់ពន្លត់អគ្គីភ័យបានពន្លត់ឱ្យរលត់ទាន់ពេលវេលា ។ ប្រភពបន្តថា ជនរងគ្រោះ២នាក់ដែលរងរបួសធ្ងន់ឆេះរោលពេញខ្លួនត្រូវបានដឹកយកទៅសង្គ្រោះនៅមន្ទីរពេទ្យ ចំណែក២នាក់ទៀតគេចខ្លួនបាត់ ។
តាមសមត្ថកិច្ចបានអោយដឹងថា អ្នកបើក រថយន្តបង្កហេតុ ទំនងជាងងុយដេក បើកលឿនងោគមួយភាំងហើយក៏ជួបស្ថានការគ្រោះថ្នាក់ចរាចរណ៍ ជាន់ហ្វ្រាំងមិនទាន់ បង្កអោយមានគ្រោះថ្នាក់ដូចនេះ សំណាងហើយដែលបានមានបំពង់ បាញ់ពន្លត់បានទាន់ពេលវេលា និងមិនបង្កអោយមានការឆេះរាលដាលដល់ផ្ទះប្រជាពលរដ្ឋផ្សេងទៀតនោះ។ ក្រោយមកសមត្ថកិច្ចជំនាញបានចុះមកធ្វើការអូសយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយតាមនីតិវិធី ច្បាប់នៅពេលក្រោយ៕

ព្រែកជ័យ