តាមការប្រកាសរបស់អគ្គនាយករងក្រុមហ៊ុនអាកាសចរណ៍ Egypt Air លោក​Ahmed Adel បានបញ្ជាក់ថា​ៈ​ ក្រុមអ្នករុករកបានចូលទៅកៀកបំណែកយន្តហោះដែលប្រទះឃើញនៅដែនសមុទ្រមេឌីទែរ៉ាណេ​គឺមិនមានជាបំណែករបស់យន្តហោះMS 804 ដឹកអ្នកដំណើរ ៦៦នាក់ដែលបាត់ខ្លួននោះឡើយ។

លោក​Adel បាននិយាយទៅកាន់បណ្តាញព័ត៌មាន​ស៊ីអ៊ិនអ៊ិនថា«នៅពេលនេះយើងកំពុងតែរុករកជាបន្តទៀត ហើយបំណែកដែលយើងបានប្រទះឃើញកន្លងមកនេះមិនមែនជារបស់យន្តហោះដែលបាត់ខ្លួនឡើយ»។ នៅមុននេះបន្តិចលោក​ Adel បានប្រកាសថារកឃើញបំណែកយន្តហោះនៅលើដែនសមុទ្រ​ប៉ុន្តែក្រោយមកក៏បានបញ្ជាក់ថាមិនមែនជារបស់យន្តហោះ​MS 804។
លោក​Adel បញ្ជាក់ទៀតថា Egypt Air មិនបានចូលរួមផ្តល់ក្នុងការស្វែងរកនោះឡើយ ហើយរាល់ព័ត៌មានពាក់ព័ន្ធគឺទទួលពីរដ្ឋាភិបាលនិងកម្លាំងយោធាអេហ្ស៊ីបប៉ុណ្ណោះ។

យន្តហោះ ដឹកអ្នកដំណើររបស់ក្រុមហ៊ុន​ Egypt Air មានលេខហោះហើរ MS 804 បានបាត់ខ្លួនពីប្រព័ន្ធរ៉ាដាកាលពីថ្ងៃទី ១៩ខែឧសភា ដោយនៅលើយន្តហោះមានអ្នកដំណើរ ៥៦នាក់ និងក្រុមពហុនិកា​១០នាក់។

អេហ្សីុបនិង ក្រិចបានបញ្ជូនយន្តហោះយោធានិងនាវាចម្បាំងទៅកាន់តំបន់សមុទ្រដែលយន្តហោះខាងលើបាត់ខ្លួន។
នៅពេលនេះគេមិនទាន់អាចសន្និដ្ឋានបានថាយន្តហោះខាងលើជួបនៅបញ្ហាអ្វីនោះឡើយ ។ ប៉ុន្តែតាមឯកទេសនៅពេលដែលយន្តហោះមិនបានផ្តល់សញ្ញាអាសន្នឬសុំជំនួយនោះ មានន័យថា​យន្តហោះអាចរងការវាយប្រហារឬជួបហេតុការអាក្រក់ណាមួយធ្វើឲ្យយន្តហោះត្រូវបំផ្លាញក្នុងរយះពេលខ្លីទើបគ្មានការទំនាក់ទំនង។

ចំណែកប្រធានក្រសួងសន្តិសុខជាតិ រុស្ស៊ី លោក​Aleksandr Bornikov បញ្ជាក់ថា ហេតុការធ្លាក់យន្តហោះ gypt Air គឺកើតឡើងដោយការវាយប្រហារភេរវកម្ម។ លោក​បញ្ជាក់ថា​« ជារឿងអកុសល​ថ្ងៃនេះយន្តហោះអេហ្សីុប​ជួបគ្រោះថ្នាក់ ហើយវាជាការពិតណាស់គឺជាសកម្មភាពរបស់​ក្រុមភេរវកម្ម​ ដែលបានសម្លាប់មនុស្ស​៦៦នាក់មកពី​១២ប្រទេសនៅលើយន្តហោះខាងលើ។

យន្តហោះខាងលើដឹកអ្នកដំណើរ ៥៦នាក់ និងក្រុមពហុនិកា​១០ ហោះហើរពីប្រទេសបារាំងទៅកាន់អេហ្សីុប​។​ ក្នុងចំណោមអ្នករងគ្រោះមានជនជាតិ អេហ្សីុប​៣០នាក់ ជនជាតិបារាំង​១៥នាក់​, អីរ៉ាក់២នាក់ ,អង់គ្លេសម្នាក់,ប៊ែលហ្សិចម្នាក់ ,គុយវែតម្នាក់, អារ៉ាប៊ីសាអូឌិតម្នាក់,​ស៊ូដង់ម្នាក់, ឆាតម្នាក់, អេស្បាញម្នាក់​,អាលហ្សឺរីម្នាក់និងកាណាដាម្នាក់ផងដែរ៕​

ប្រែសម្រួល៖ ម៉ែវ​ សាធី