ភ្នំពេញៈកម្លាំងសមត្ថកិច្ចកងរាជអាវុធហត្ថខណ្ឌពោធិសែនជ័យឃាត់ខ្លួនជនសង្ស័យម្នាក់ជាក្រុមលួចដោយប្រើហឹង្សា វាយយកម៉ូតូជនរងគ្រោះកាលពីវេលាម៉ោង៤និង៥០នាទីរសៀលថ្ងៃទី២៤ ខែឧសភា ឆ្នាំ២០១៦នៅចំណុចជិតផ្សារកាណាឌីយ៉ា ឋិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ។ ដោយឡែកបក្ខពួក២នាក់ទៀតត្រូវបានគេចខ្លួនបាត់ បន្ទាប់ពីធ្វើសកម្មភាពវាយប្លន់យកម៉ូតូ កាលពីវេលាម៉ោងប្រហែល១ទាបភ្លឺឈានចូលថ្ងៃទី២៤ ខែឧសភា ឆ្នាំ២០១៦ នៅចំនុចផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ យកបានម៉ូតូមួយគ្រឿងម៉ាកC125ពណ៌ខ្មៅស៊េរីឆ្នាំ២០០៩ ។
សមត្ថកិច្ចបានអោយដឹងថាៈ ក្រោយពេលធ្វើសកម្មភាពហើយជនសង្ស័យបានកាច់ស្លាកលេខម៉ូតូក្រវាត់ចោលនៅជិតកន្លែងលក់ទឹកត្នោតជូ ម្តុំទួលពង្រ ទើបឈានដល់ក្តាប់មុខសញ្ញាឃាត់ខ្លួនបានម្នាក់។
នៅចំពោះមុខសមត្ថកិច្ចជនសង្ស័យបានសារភាពថាៈ កន្លងមកខ្លួនធ្លាប់ធ្វើសកម្មភាពវាយយកម៉ូតូបានមួយគ្រឿងម្តងដែរនៅម្តុំដីថ្មី ខណ្ឌមានជ័យក្នុងអំឡុងឆ្នាំ២០១៤ គឺម៉ូតូម៉ាកឃ្លីក នឹងបានយកទៅលក់នៅម្តុំទួលពង្របានលុយ៣០០ដុល្លារ និងវាយអ្នកដំណើរយកទូរស័ព្ទបាន២ដងនៅម្តុំកាណាឌីយ៉ា។
សមត្ថកិច្ចបញ្ជាក់ថាៈ ជនសង្ស័យទើបចេញពីពន្ធនាគារបាន
ជាងមួយខែ ដោយធ្លាប់ជាប់រយះពេល២ឆ្នាំ ពីបទ ចែកចាយគ្រឿងញៀន។ បច្ចុប្បន្នសមត្ថកិច្ចកំពុងធ្វើការសាកសួរដើម្បីបន្តនិតិវិធី៕
សុខ ខេមរា