ខេត្តសៀមរាប៖​ កាលពីវេលាម៉ោង១០ និង៣០នាទីព្រឹកថ្ងៃទី៣០ ខែឧសភា ឆ្នាំ២០១៦ នៅតាមបណ្ដោយផ្លូវជាតិលេខ៦ ស្ថិតក្នុងភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប មានករណីគ្រោះថ្នាក់ចរាចរណ៍រវាងរថយន្ត និងម៉ូតូបណ្ដាលឲ្យមនុស្សម្នាក់ស្លាប់ភ្លាមៗនៅនឹងកន្លែងកើតហេតុ ។

លោកវរសេនីយ៍ទោ ចាន់ សារ៉េន អធិការនគរបាលស្រុកក្រឡាញ់បានឲ្យដឹងថា ករណីគ្រោះថ្នាក់ចរាចរណ៍គួរឲ្យរន្ធត់ខាងលើនេះបណ្ដាលមកពីរថយន្តនិងម៉ូតូបើកបញ្ច្រាស់ទិសគ្នាពីកើតទៅលិចលុះដល់ចំណុចកើតហេតុ រថយន្ដបានបុកជាមួយម៉ូតូចំពីចំហៀងបណ្ដាលមកពីអ្នកបើកបរម៉ូតូបត់មិនមានការប្រុងប្រយ័ត្នទើបធ្វើអោយមានករណីគ្រោះថ្នាកចរាចរណ៍កើតឡើង ។ រថយន្ដបង្កហេតុម៉ាក់ FUSO ពណ៌ត្រួយចេកពាកស្លាកលេខ ភ្នំពេញ 3B:6852 បើកបរដោយបុរសម្នាក់មិនស្គាល់អត្តសញ្ញាណ​ បានចុះរត់គេចខ្លួនបាត់ក្រោយពេលកើតហេតុ ។ ដោយឡែកជនរងគ្រោះជិះម៉ូតូម៉ាក Dream C 125 ពណ៌ខ្មៅ ពាក់ស្លាកលេខ សៀមរាប 1A: 0575 បើកបរដោយបុរសវ័យចំណាស់ម្នាក់ឈ្មោះ គ្លឿង ក្រឹម អាយុ៦១ឆ្នាំ រស់នៅភូមិស្លែង ឃុំស្រណាល ស្រុកក្រឡាញ់ ខេត្តសៀមរាប។

បច្ចុប្បន្នរថយន្ត និងម៉ូតូ ត្រូវបានកម្លាំងអធិការនគរបាលស្រុកយកមករក្សាទុកនៅអធិការដ្ឋាននគរបាលស្រុករងចាំធ្វើការដោះស្រាយទៅតាមនីតិវិធីច្បាប់ ចំពោះសាកសពត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី៕​

ដោយ៖ ប៊ុន រិទ្ធី