ភ្នំពេញ​ៈ រថយន្តឡិចស៊ីសមួយគ្រឿងបើកបរដោយបុរសម្នាក់ក្នុងល្បឿនលឿនដោយមិនបានមើលមុខជ្រុលបុករថយន្តដឹកគ្រួសដែលកំពុងសាងសង់ផ្លូវបណ្តាលអោយរងការខូចខាតយ៉ាងដំណំសំណាងមិនមានអ្នករបួស។
​ ហេតុការណ៍នេះបានកើតឡើងកាលពីវេលាម៉ោង៤ទាបភ្លឺឈានចូលថ្ងៃទី១​ ខែមិថុនា​ ឆ្នាំ​២០១៦​ នៅចំណុចមុខស្ថានីយ៍ប្រេងឥន្ធនះSVMតាមបណ្តោយផ្លូវមហាវិថីសហព័ន្ធរ៉ុស្សី​ ស្ថិតក្នុងភូមិក្បាលដំរី​ សង្កាត់កាកាប​ ​ខណ្ឌពោធិ៍​សែន​ជ័យ។
​ តាមសាក្សីនៅកន្លែងកើតហេតុបានអោយដឹងថានៅមុនពេលកើតហេតុគេបានឃើញ​ក្រុមការដ្ឋានសំណង់ជួសជុលផ្លូវកំពុងជួសជុលនិងរថយន្តដឹកគ្រួសម៉ាកកូរ៉េមួយគ្រឿងនៅកណ្តាលផ្លូវដែលមានស្លាកសញ្ញាត្រឹមត្រូវភ្លាមនោះស្រាប់តែមានរថយន្តឡិចស៊ីសRX300 ពណ៍ស​ ពាក់ស្លាកលេខភ្នំពេញ2AJ 9287 បើកបរដោយបុរសម្នាក់ធ្វើដំណើរតាមបណ្តោយផ្លូវមហាវិថីសហព័ន្ធរុស្សី​ ក្នុងទិសដៅពីកើតទៅលិចក្នុងល្បឿនលឿនដោយមិនបានមើលមុខសង្ស័យងោកមួយភាំងក៏ជ្រុលបុករថយន្តដឹកគ្រួសពីក្រោយពេញទំហឹងបណ្តាលអោយរងការខូចខាតតែសំណាងមិនមានរបួសដល់កម្មករ។
​ ក្រោយពេលកើតហេតុបុរសបើករថយន្តបង្កបានខលហៅបងប្អូនមកដោះស្រាយដោយចេញថ្លៃខូចខាតទៅភាគីខាងរងគ្រោះចំនួន១៥៥០ដុល្លារដើម្បីបញ្ចប់រឿង៕

សុខាសែនជ័យ