ភ្នំពេញ ៖ ជនសង្ស័យ៤នាក់ ក្នុុងនោះមានស្រីម្នាក់ត្រូវបាន កម្លាំងអាវុធហត្ថខណ្ឌពោធិ៍សែនជ័យ រួមសហការណ៍ជាមួយ កម្លាំងការិយាល័យជំនាញអាវុធហត្ថក្រុង បង្ក្រាបក្របួចចាប់បាន នៅក្នុងបន្ទប់ជួលលេខ២ ផ្លូវបេតុង ក្រុម៤ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង៤និង៣០នាទីរសៀលថ្ងៃទី១៥ ខែមិថុនា ឆ្នាំ២០១៦ និងដកហូតថ្នាំញៀន២កញ្ចប់ សម្ភារៈ សម្រាប់ជក់ និងឧបករណ៍មួយចំនួនទៀតបន្ទាប់ពីកម្លាំងជំនាញស្រាវជ្រាវអស់ជាច្រើនថ្ងៃខែ រហូតទាល់ចាប់ឃាត់ខ្លួនជនសង្ស័យបាន ។ ជនសង្ស័យទាំង៤នាក់ ទី១ ឈ្មោះ ណុប ជ៏វ័ន ភេទប្រុស អាយុ២៣ឆ្នាំ មុខរបរ មិនពិតប្រាកដ ។ ទី២ឈ្មោះ ចាន់ ផ្លី ភេទស្រី អាយុ១៧ឆ្នាំ មុខរបរ លក់ទឹកក្រឡុក ក្បែរកន្លែងកើតហេតុ ។ ទី៣ឈ្មោះ តាំង ស៊ាងហុ៊យ ភេទប្រុស អាយុ៣១ឆ្នាំ មុខរបរ លក់ដូរ ជាម្ចាស់បន្ទប់ ។ ទី៤ ឈ្មោះ ឈឿន ផល្លី ភេទប្រុស អាយុ២១ឆ្នាំ ។
តាមមន្ត្រីកងរាជអាវុធហត្ថបានឲ្យដឹងថា ក្នុងប្រតិបត្តិការបង្ក្រាបចាប់ជនសង្ស័យខាងលើ រកឃើញនិងដកហូតបាន ថ្នាំញៀន ចំនួន២កញ្ចប់ ឧបករណ៍ សម្រាប់ជក់គ្រឿងញៀន សម្ភារៈប្រើ ក្នុងបទល្មើសមួយចំនួនទៀត មូ៉តូចំនួន៤គ្រឿង ម៉ាក ស្កុបពី ពណ៌ស លាយផ្កាឈូក ពាក់ស្លាកលេខ ភ្នំពេញ 1AS-5583 ម៉ាកស្តេប ពណ៌ស ពាក់ស្លសកលេខ បន្ទាយមានជ័យ 1E-0581 ម៉ាក វ៉េវ ពណ៌ខ្មៅ ពាក់ស្លាកលេខ ភ្នំពេញ 1AR-3850 មូ៉តូម៉ាក សុីធីផ្លើស ពណ៌ក្រហម កញ្ចាស់ គ្មានស្លាកលេខ ។
មន្រ្តីអាវុធហត្ថបានបន្តឲ្យដឹងទៀតថា កម្លាំងជំនាញ របស់អាវុធហត្ថខណ្ឌពោធិ៍សែនជ័យ បានធ្វើការស្រាវជ្រាវ អស់ជាច្រើនខែ រហូតចាប់ខ្លួនបាន ។
ជនសង្ស័យ ក្រោយពីឃាត់ខ្លួនបាន រួមជាមួយវត្ថុតាង ក៏បាននាំទៅកាន់ការិយាល័យជំនាញ អាវុធហត្ថក្រុងភ្នំពេញ ដើម្បីសាកសួរ និងកសាងសំណុំរឿងចាត់ការទៅតាមនីតិវិធី៕
ដោយៈសុខាសែនជ័យ
