ភ្នំពេញ៖ ប្រភពព័ត៌មានច្បាស់ការណ៍ ថ្លែងថា លោក កែវ មុនី ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី៥ ខែសីហា ឆ្នាំ២០១៥ បានសម្រេចឃុំខ្លួនសកម្មជនគណបក្សសង្គ្រោះជាតិពីរនាក់ក្នុងសំណុំរឿងចូលរួមកុបកម្មដោយហិង្សានៅលើស្ពាននាគក្បែរទីលានប្រជាធិបតេយ្យ ។ សកម្មជនទាំងពីរនាក់នេះឈ្មោះ យឹម គឹមហួរ និងឈ្មោះ នឿន ចាន់តា ហៅ ត្រា។ សកម្មជន៣នាក់ទៀតដែលតុលាការចេញដីកាចាប់ខ្លូនតែពុំទាន់ចាប់បាន ។
គួររំលឹកថា លោក លឹម មករន្ទ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី២១ ខែកក្កដា ឆ្នាំ២០១៥ បានប្រកាសសាលក្រមផ្តន្ទាទោសសកម្មជននិងមន្ត្រីគណបក្សសង្រ្គោះ១១នាក់ ដាក់ពន្ធនាគារពី៧ឆ្នាំទៅ២០ឆ្នាំ ក្នុងសំណុំរឿងដឹកនាំបង្កហិង្សានៅលើស្ពាននាគក្បែរទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤ រួចបញ្ជូនទៅគុកព្រៃសភ្លាមៗ ។
លោកចៅក្រម បានផ្តន្ទាទោសឈ្មោះ មាជ សុវណ្ណារ៉ា ប្រធាននាយកដ្ឋានព័ត៌មាននិង ប្រព័ន្ធផ្សព្វផ្សាយនៃគណបក្សសង្គ្រោះជាតិ ឈ្មោះ ឃិន រឿន ហៅ ឃិន ជំរឿន ប្រធានចលនាយុវជនរាជធានីភ្នំពេញ នៃគណបក្សសង្គ្រោះជាតិ និង ឈ្មោះ អឿ ណារិត មន្រ្តីទទួល បន្ទុកកិច្ចការ សាធារណៈ នៃគណបក្សសង្គ្រោះជាតិនិងជាជំនួយការផ្ទាល់ របស់អ្នក ស្រីមូរ សុខហួរ ដាក់ពន្ធនាគារម្នាក់ៗ២០ឆ្នាំ ។
ចំណែកឈ្មោះ ស៊ុំ ពុទ្ឋី សមាជិកក្រុមប្រឹក្សាខណ្ឌច្បារ អំពៅនៃគណបក្សសង្គ្រោះជាតិ ឈ្មោះ កែ ឃីម ហៅវីន ឌី សកម្មជនគណបក្សសង្គ្រោះជាតិ ឈ្មោះទេព ណារិន សមាជិកចលនាមហាជនរបស់គណបក្សសង្គ្រោះជាតិ ឈ្មោះ អ៊ុក ពេជ្រសំណាង សកម្មជនគណបក្សសង្គ្រោះជាតិ លោកនាង សុឃុន ប្រធានសម្ព័ន្ធយុវជនជាតិខ្មែរ និងជាហិរញ្ញិកចលនាយុវជនគណបក្សសង្គ្រោះជាតិនៅខណ្ឌច្បារអំពៅ ឈ្មោះ សាន គឹមហេង ប្រធានចលនាយុវជនគណបក្សសង្គ្រោះជាតិ និងជាសមាជិកក្រុមប្រឹក្សាខណ្ឌទួលគោក ឈ្មោះ សាន សីហៈ លេខាធិការគណបក្សសង្គ្រោះជាតិ និង ឈ្មោះអាន បឋម ហៅ សុខុម យុវជនគណបក្សសង្គ្រោះជាតិ ដាក់ពន្ធនាគារម្នាក់ៗ៧ឆ្នាំ ។ ការសម្រេចនេះ គឺធ្វើតាមមាត្រា៣៥៣នៃក្រមនីតិវិធីព្រហ្មទណ្ឌ ៕
ដោយ៖ ចាន់ធឿន
